Босув маҳалласи – жиноятчилик ва ҳуқуқбузарликлардан холи ҳудуд

Бугунги кунда юксак тараққий этган Янги Ўзбекистонни барпо этиш йўлидаги саъй-ҳаракатлар изчиллик билан давом эттирилмоқда. Қатор соҳаларда эришилаётган юксак марралар озод ва обод юртимизнинг нуфузини ошираяпти. Бунёдкор халқимиз ўз ривожланиш ва тараққиёт йўлидан дадил одамлаб, тинч, осуда турмуш кечираяпти.

Ана шундай фаровон ва эркин ҳаётимизни турли оқимлар ва ёвуз кучлардан асраш, бахтиёр турмуш барқарор бўлишига эришиш бугунги кундаги энг долзарб вазифалардан бирига айланган. Чунки тинчлик, осойишталик ҳукм сурган юртда юксалиш, тараққиёт бўлади. Шу боисдан-да глобаллашув жараёни шиддат билан кечаётган бугунги даврда огоҳлик ва сергаклик билан юртимиздаги осуда ҳаётининг бардавом бўлишига хизмат қилиш барчанинг вазифасидир.

Бу борадаги Амударё туманида амалга оширилаётган саъй-ҳаракатларга муносиб ҳисса қўшиш мақсадида amunews.uz сайти таҳририяти Олий Мажлис ҳузуридаги нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш жамоат фонди таъсис этган “Маҳаллаларда, оилаларда ижтимоий муҳит барқарорлигига салбий таъсир кўрсатувчи ҳолатларнинг олдини олиш” йўналишидаги грант танловида “Соғлом муҳит – соғлом ҳаёт” номли лойиҳаси билан қатнашиб, ғолиб бўлди ва айни кунларда мазкур лойиҳани муваффақиятли амалга ошириб келмоқда.

Грант лойиҳаси иш режасида маҳалла аҳли, айниқса ёшлар ўртасида жиноятчиликнинг олдини олиш, жиноят содир қилишга мойил, муқаддам судланган ва жиноят содир қилган шахслар билан ишлашиш борасида бошқаларга ўрнак бўлаётган овул ва маҳалла фуқаролар йиғинлари фаолиятини кенг тарғиб қилиш вазифаси ҳам кўзда тутилган. 19 декабрь куни таҳририят ходимлари ана шундай маҳаллалардан бири – Босув маҳалласида бўлиб, бу борада амалга оширилаётган ишлар билан яқиндан танишди.

Айтиш жоизки, ушбу маҳаллада 730та хонадонда 900та оилалар истиқомат қилади. Ўзбек, қорақалпоқ, қозоқ, қирғиз, рус миллатига мансуб 3 минг 720 нафар аҳолининг 1 минг 655 нафарини 30 ёшгача бўлганлар ташкил этади.

Маҳаллада ёш авлодни комил инсонлар қилиб вояга етказиш, ҳаётда ўз ўринларини топишлари учун уларнинг илм олишлари, касб-ҳунар ўрганишлари учун маҳалла, оила ва таълим муассасаси ўртасида мустаҳкам ҳамкорлик ўрнатилган. Оилаларда дунёга келган фарзандларни миллий урф-одатларимиз, қадриятларимизга ҳурмат руҳида, бир-бирига меҳр-оқибатли қилиб вояга етказишга алоҳида эътибор қаратилмоқда. Таълим-тарбияни бугунги кун талаблари асосида олиб бориб, юксак маънавиятли, маърифатли қилиб камолга етказишга ҳаракат қилишмоқда.

Бу ҳақда маҳаллада ўтказилган тадбирда ҳам батафсил сўз юритилди. Тадбирда 26-сонли мактаб директорининг маънавий-маърифий ишлар бўйича ўринбосари Ҳамида Ортиқова, amunews.uz сайти мухбири – лойиҳа координатори Ойгул Ражабова, ҳудуд инспектор-психологлари Ҳусниддин Сафарбоев, Дилшод Аминов, Босув маҳалла фуқаролар йиғини раиси Эркин Эшмуродов, хотин-қизлар фаоли Дилфуза Абдуллаева, маҳалла нуронийлари Ҳанифа Камолова, Қурбонбой Бобожонов, Файзулла Шукуруллаев, ёшлар вакили Шаҳзода Эрдошевалар кун тартибидаги масалалар юзасидан фикр-мулоҳазаларини билдирдилар. Сўзга чиққанлар аҳоли, айниқса ёшлар орасида жиноятчилик, ҳуқуқбузарликлар содир этилишини олдини олиш борасидаги чораларни яна ҳам кучайтириш лозимлигини таъкидладилар.

Айтиш жоизки, ҳудуддаги 26-сонли умумий ўрта таълим мактаби туманнинг энг илғор таълим муассасаларидан бири ҳисобланади. 2022-2023 ўқув йилида мактабнинг 18 нафар битирувчиларининг 14 нафари олий таълим муассасаларининг талабалари бўлишди.

Муассасада маъмурият томонидан педагогик жамоа, ўқувчилар орасида соғлом маънавий муҳит яратилганлиги, туман Ички ишлар бўлимида фаолият юритаётган инспектор-психолог Ҳусниддин Сафарбоевнинг ўқувчи-ёшлар билан яхши иш олиб бораётганлиги натижасида ўқувчилар орасида тартиббузарлик, ҳуқуқбузарлик ҳолатлари содир этилишининг олди олинаяпти. Маҳалла фуқаролар йиғини масъуллари, профилактика инспектори иштирокида ҳудудда тинчлик-осойишталик барқарор бўлиши йўлида тизимли ишлар амалга оширилаяпти. Натижада жорий йил давомида ҳуқуқбузарлик, жиноятчилик ҳолатлари содир этилмади. Профилактик ҳисобга олинган фуқаролар, ёшлар йўқ.

Ўтказилган тадбир давомида бу борадаги ишларни янада жонлантириш, туманнинг бошқа овул ва маҳаллалари ўртасида ҳам илғор тажрибаларни кенг оммалаштириш борасида фикрлар алмашилди.

Севара ИСМОИЛОВА.