"Меҳр ҳаракати" лойиҳаси доирасида эҳтиёжманд оилаларнинг фарзандларига кийим-кечаклар тарқатилди
Мамлакатимизда эҳтиёжманд, кам таъминланган оилаларга ҳар томонлама кўмаклашиш борасида хайрли ишлар олиб борилмоқда. Айниқса, бугунги қишнинг қировли кунларида қийин шароитда яшаётган оилаларга ёрдам қўлини чўзиш мақсадида Қорақалпоғистон Республикаси Жўқорғи Кенгеси ташаббуси билан “Меҳр ҳаракати” лойиҳаси доирасидаги тадбирлар изчил давом эттирилмоқда.
Мазкур ҳаракат доирасида барча шаҳар ва туманлардаги ночор шароитда яшаётган оилаларни бориб кўриш ва уларга амалий ёрдам кўрсатиш мақсадида вазирлик, бошқарма, корхона, ташкилот раҳбарларидан иборат ишчи гуруҳлар ташкил этилди ва улар эҳтиёжманд оилаларга манзилли кўмак беришмоқда.
Мазкур ҳаракат доирасида 26 декабрь куни Амударё тумани Маданият марказида туман ҳокимлиги ҳамда ҳомийлар тарафидан 130та эҳтиёжманд оилаларнинг фарзандларига қишки кийим-кечаклар тарқатилди.
Тадбирда туман ҳокими ўринбосари, Оила ва хотин-қизлар бўлими бошлиғи Гўзал Собурова, туман Мактаб ва мактабгача бўлими бошлиғи Ялғаш Шомуратов, Ёшлар ишлари агентлиги туман бўлими бошлиғи Сардор Исмоилов, кам таъминланган, эҳтиёжманд, боқувчисини йўқотган оилаларнинг фарзандлари иштирок этдилар.
Тадбирда туман ҳокими ўринбосари, Оила ва хотин-қизлар бўлими бошлиғи Гўзал Собурова сўзга чиқиб, бугунги кунда “Меҳр ҳаракати” лойиҳаси доирасида қиланаётган ишлар республикамизнинг барча ҳудудларида бўлгани каби туманимизда ҳам қизғин тус олаётганини, ҳеч ким меҳр ва эътибордан четда қолмаслигини айтиб ўтди.
Таъкидланганидек, давлатимиз раҳбари ташаббуси билан илгари сурилган “Инсон қадри учун” тамойили асосида шароити оғир, кам таъминланган оилаларнинг ҳаёти билан танишиш ва уларга ёрдам кўрсатиш бўйича белгиланган вазифалар ижросини таъминлаш, шаҳар ва туманларда, айниқса чекка ҳудудларда истиқомат қилувчи аҳоли яшаш шароитларини яхшилаш, уларнинг ҳаёт фаровонлигини таъминлаш мақсадида ташкил қилинган “Меҳр ҳаракати” лойиҳасида ҳар қандай жисмоний ва юридик шахслар иштирок этиб, имкон даражасида аҳолининг эҳтиёжманд қатламига ёрдам кўрсатиши мумкин.
Лойиҳани амалга оширишда биринчи навбатда қулай шароитга эга бўлмаган турар-жойларда яшаб, қиш кунлари уйини иситишга ўтин, кўмир сотиб олишда, фарзандларига кийим олиб беришда қийналаётган, бундан ташқари, ижарада вақтинча кун кўраётган уй-жойсиз, бошпанасиз оилаларга алоҳида эътибор қаратилади.
Ҳақиқатан ҳам, меҳр-оқибат, ҳамжиҳатлик каби инсоний хислатлар бизга авлодларимиздан мерос бўлиб келаётган қадриятлар сирасига киради. Азал-азалдан халқимиз ҳар қандай шароитда ҳам бир-бирига елка тутган, ёрдам қўлини чўзган. Кўмакка муҳтож инсонлар қўни-қўшни, қариндош-уруғ, маҳалла ҳамда элу юрт ёрдами билан ўзини тиклаб олган. Аждодларимиз турли синов ва офатлардан ҳам ана шундай бирдамлик орқали ўтган, қийинчиликларни биргаликда мардона енгган.
Янги йил байрами арафасида ташкил этилган ушбу тадбир болажонларнинг қувончига қувонч қўшди.
Тадбир якунида томошабинларга туман Маданият бўлими томонидан тайёрланган концерт дастури намойиш этилди.
Туман ҳокимлиги Ахборот хизмати
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
