Дарёбўйи ва Уйшин маҳаллалари аҳолиси иштирокида сайёр қабул бўлиб ўтди

Мамлакатимизда сўнгги йилларда халқ билан яқиндан мулоқот қилиш, инсонларнинг узоқ йиллардан бери қийнаб келаётган муммоларини ўрганиш ва уларни бартараф қилиш мақсадида ҳудудларда давлат бошқарув органлари масъулларининг сайёр қабуллари ташкил этилиши йўлга қўйилган. Амударё туманида ҳам масъул раҳбарларнинг ҳудудларда аҳоли вакиллари ҳамда ёшлар билан учрашувлари ўтказиб келинмоқда.

Режага асосан 24 февраль куни Дарёбўйи ҳамда Уйшин маҳаллалари аҳолиси иштирокида туман ҳокимлиги масъулларининг сайёр қабули бўлиб ўтди.

Сайёр қабулда туман ҳокимининг Ёшлар сиёсати, ижтимоий ривожлантириш ва маънавий-маърифий ишлар бўйича ўринбосари Нодир Камолов, тумандаги корхона-ташкилотлар масъуллари, Дарёбўйи ва Уйшин маҳалла фуқаролар йиғинлари раислари, хотин-қизлар фаоллари, ёшлар етакчилари ҳамда аҳоли вакиллари иштирок этдилар.

Сайёр қабулда мазкур маҳаллаларда яшовчи фуқаролардан турли масалалар юзасидан жами 26 та мурожаатлар келиб тушди.

Хусусан, Дарёбўйи маҳалласида яшовчи фуқаро юрак ишемик касаллиги билан, турмуш ўртоғи эса қон босими касаллиги билан касалланганлиги сабабли моддий ёрдам беришни, яна бир фуқаро юраги касаллиги, турмуш ўртоғи вафот этганлиги, ҳозирги кунда жарроҳлик амалиёти ўташи учун моддий ёрдам сўраб мурожаат қилишди. Шунингдек, фуқаролар “Амударё Агросервис” корхонаси балансидаги уйда ижарада яшаётганлиги, ўзларига тегишли ер участкасига уй қуриш учун имтиёзли кредит олишда амалий ёрдам беришни, электр энергиясининг кучланиши пастлиги сабабли янги ўрнатилган трансформаторни ишга тушириш бўйича амалий ёрдам сўраб мурожаат қилдилар.

Қолаверса, фуқаролардан бир нафари “Аёллар дафтари”га киритилганлиги, тикувчилик йўналиши бўйича касбга қайта ўқиганлигини маълум қилиб, субсидия асосида тикув машинасини олишда амалий ёрдам беришни, 3 нафар фуқаро деҳқон хўжалигини юритиш учун ер майдони ажратишда амалий ёрдам беришни сўраб туман ҳокимлиги масъулларига мурожаат қилдилар. Масъуллар 2 нафар хотин-қизларнинг гўзаллик салонини очиш учун касбга ўқитишда, яна бир фуқаронинг кредит олишда амалий ёрдам сўраб қилган мурожаатларини ҳам атрофлича ўрганиб чиқдилар.

Шунингдек, сайёр қабул мобайнида фуқаролардан тадбиркорлик фаолиятини бошлаш учун кредит олиш, олий ўқув юртларида ўқиш учун шартнома тўловларини тўлашда амалий ёрдам бериш каби масалаларда ҳам мурожаатлар келиб тушди.

Мурожаатлардаги масалаларнинг айримлари шу ернинг ўзида ҳал этилган бўлса, қолганларини бартараф этиш учун тегишли ташкилотлар масъулларига топшириқлар берилди.

Чарос Арслонова, туман ҳокимлигининг Ахборот хизмати.