ҚОРАҚАЛПОҒИСТОН РЕСПУБЛИКАСИ МИГРАЦИЯ ВА ФУҚАРОЛИКНИ РАСМИЙЛАШТИРИШ БОШҚАРМАСИ БОШЛИҒИ Ш.ТЎРАЕВ ЖУМУРОВУЛЛИК ЁШЛАР БИЛАН УЧРАШДИ
Ўзбекистон Республикаси Президентининг 2024 йил 21 февралдаги “Ўзбекистон - 2030” стратегиясини “Ёшлар ва бизнесни қўллаб-қувватлаш йили”да амалга оширишга оид давлат дастури тўғрисида”ги Фармони 1-бандига асосан 2024 йил 1 мартдан бошлаб алоҳида ишлаш талаб этиладиган, шунингдек, истеъдодли ва иқтидорли ёшлар Маҳаллаларда ёшлар билан ишлаш масалаларини мувофиқлаштириш бўйича Республика комиссияси қарори билан “Ёшлар баланси” асосида вазирлик ва идоралар, маҳаллий ижро этувчи ҳокимият органлари, давлат иштирокидаги корхона ва ташкилотлар ҳамда олий таълим ташкилотлари раҳбарларига бириктирилиши белгиланган эди.
Дастурда белгиланганидек, мазкур раҳбарлар ҳар ойда камида бир маротаба ўзларига бириктирилган ҳудуд ёшлари билан учрашиб, уларнинг муаммоларини ҳал қилиш, билим ва салоҳиятларини юзага чиқариш, уларни талаб юқори бўлган касб-ҳунарга ўқитиш орқали бандлигини таъминлаш, ҳаётда ўз ўрнини топиши, шунингдек, ҳуқуқий онги ва маданиятини юксалтиришга ҳар томонлама кўмаклашиб борилиши таъкидланган бўлиб, жойларда бу борада давлат дастури ижросини таъминлашга қаратилган ишлар бошлаб юборилди.
Хусусан, идора ва ташкилотлар ҳамда вазирликдар, ҳокимият органлари ходимлари ўзлари бириктирилган ҳудудларда бўлишиб, ёшлар муаммоларини жойига чиққан ҳолда ўрганмоқдалар. Ўрганишлар натижасида аниқланган муаммолар ечими юзасидан чора-тадбирлар режалари ишлаб чиқилиб, шу асосда тизимли ишлар йўлга қўйилмоқда. Унга кўра, ёшларнинг салоҳияти, истеъдоди ва ташаббусларини тўлақонли рўёбга чиқариш мақсадида “Беш ташаббус олимпиадаси” доирасида хорижий тилларни қунт билан ўрганаётган билимдон ёшлар беллашувлари, киберспорт мусобақалари ва “Заковат” интеллектуал ўйинларини ташкил этиш орқали салоҳиятли, иқтидорли ёшларни рағбатлантиришга алоҳида аҳамият қаратилмоқда.
Жорий йилнинг 13 март санасида Қорақалпоғистон Республикаси Ички ишлар вазирлиги Миграция ва фуқароликни расмийлаштириш бошқармаси бошлиғи Шавкат Тўраев Амударё туманида бўлиб, ўзига бириктирилган ҳудуд ёшлари билан учрашди. Жумуровул маҳалла фуқаролар йиғини ҳудудидаги 45-сонли умумтаълим мактабида бўлиб ўтган мазкур учрашув тадбирида Амударё туман ИИБ ҳузуридаги Миграция ва фуқароликни расмийлаштириш бўлими бошлиғи Абдураҳмон Умиров, ҳудуд бўйича ёшлар етакчиси Зафар Отабоев ва маҳалланинг иқтидорли ёшлари иштирок этишди.
Ошкора ва самимий мулоқот тарзида ўтказилган учрашув тадбирида Шавкат Тўраев маҳалла ёшларининг ёзма ва оғзаки мурожаатларини ҳудуд масъуллари билан биргаликда ўрганди. Ўрганишлар натижасида сафарбарлик чақирув резерви таркибида ҳарбий хизмат бурчини ўташ учун кетаётган ёшларнинг шартнома пулларини тўлаш, ОТМларда таълим олаётган ёшларнинг ўқиши учун шартнома маблағини тўлаб бериш, шунингдек, касб-корли, мутахассислик дипломига эга ёшларнинг иш билан бандлигини таъминлаш бўйича ёшларнинг мурожаатлари алоҳида тизимга олиниб, мутасадди ташкилотлар раҳбарлари билан биргаликда ҳал этиш чоралари кўрилди.
Учрашув давомида ёшлар оилавий тадбиркорлик доирасида давлатимиз томонидан ажратилаётган кредит маблағлари ҳисобидан ўз лойиҳаларини амалга ошириш борасида амалий ёрдам кўрсатиш, олис қишлоқларда ҳам тил ўрганиш марказларини ташкил этиш юзасидан ўзларининг фикрлари ва таклифларини баён қилдилар. Шу билан бирга, ёшлар тадбиркорлигини ривожлантириш, шахсий бизнес-лойиҳаларини ишлаб чиқиш бўйича ўзларини қизиқтирган саволлар билан мурожаат қилдилар. Ёшларнинг барча саволларига масъуллар батафсил жавоб бердилар.
Робия ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
