Навбатдаги меҳнат ярмаркасида 33 нафар фуқаро доимий ишга жойлаштирилди

15 апрель куни Амударё тумани Камбағалликни қисқартириш ва бандликка кўмаклашиш бўлимида бўш иш ўринлари меҳнат ярмаркаси ўтказилди.

Меҳнат ярмаркаси Амударё тумани Камбағалликни қисқартириш ва бандликка кўмаклашиш бўлими, туман Прокуратураси, ИИБ, Ўзбекистон Республикаси Ёшлар ишлари агентлигининг туман бўлими билан хамкорликда ташкил қилинди.

Тадбирни туман Камбағалликни қишқартириш ва бандликка кўмаклашиш бўлими бошлиғи ўринбосари Баҳодир Балтабаев очди ҳамда олиб борди. У ўз сўзида бугунги кунда мамлакатимизда аҳоли бандлигига кўмаклашиш, аҳолини иш билан таъминлаш, бўш иш ўринларини яратиш борасида олиб борилаётган кенг ислоҳотлар хусусида тўхталди.

Хусусан, бандлик бўйича янги таъсирчан механизмлар жорий этилаётгани, эҳтиёжманд аҳолини меҳнат фаолиятига жалб қилишда қулай шарт-шароитлар яратилаётгани, жойларда тегишли масъуллар томонидан ёшларнинг бандлигини таъминлашда тизимли ишлар олиб борилиб, аҳолининг, хусусан ёшларнинг муаммолари, уларни иш билан банд қилиш масалалари ўрганилаётгани алоҳида қайд этилди.

Шунингдек, туман прокурори ёрдамчиси Санжар Абдуллаев ва бошқалар сўзга чиқиб, ёшлар бандлигини таъминлаш борасида қатор амалий чоралар кўрилаётгани, ишсиз ёшлар бандлигини таъминлашга кўмак берилаётгани, бу каби амалий ишлар аҳоли фаровонлиги, оилаларнинг даромади барқарорлигига хизмат қилаётганини таъкидладилар.

Ярмаркада 37 та корхона ва ташкилотлар 218 та бўш иш ўринлари билан иштирок этди. Меҳнат ярмаркасига туман ҳуддудида яшовчи иш изловчи фуқаролар, ишсиз ёшлар ва олий таълим муассасаларининг битирувчилари ташриф буюришди.

Ярмаркада жами 37 нафар ишсиз фуқаролар иштирок этишди. Уларнинг 14 нафари ёшлар, 18 нафари аёллар, 2 нафари битирувчилар, 1 нафари меҳнат миграциясидан қайтиб келган, 16 нафари эса ишсиз юртдошларимиздир.

Меҳнат ярмаркасида иштирок этган ишсиз фуқароларнинг 33 нафари доимий ишга жойлаштирилди. Уларнинг 12 нафари ёшлар, 18 нафари аёллар, 2 нафари эса олий таълим муассасаларининг битирувчиларидир. Меҳнат миграциясидан қайтиб келган 1 нафар ҳамюртимиз ҳам мазкур меҳнат ярмаркасида ишга жойлаштирилди. Ярмарка иштирокчиларидан 1 нафари ҳақ тўланадиган жамоат ишларига жалб қилинди.

Тадбирда туман Камбағалликни қисқартириш ва бандликка кўмаклашиш бўлими мутахассислари 2 нафар ёшлар ҳамда 15 нафар ишсиз фуқароларга меҳнат қонунчилигига оид масалалар бўйича маслаҳатлар беришди. Бундан ташқари, ярмаркас давомида бошқа масъуллар томонидан ҳам иштирокчиларнинг меҳнат қонунчилиги борасидаги барча саволларига тегишли жавоблар берилди.

Бу каби меҳнат ярмаркалари аҳолининг ишсиз қатлами, айниқса ёшлар ва аёлларни ишга жойлаштириш орқали уларнинг жамиятда ўзини намоён қилишларига кўмаклашиш, оилаларнинг даромад манбаини яратиш орқали камбағалликни қисқартириш, кичик бизнес, хусусий тадбиркорлик ва оилавий бизнесни ривожлантириш орқали мамлакатимиз иқтисодиётини янада ривожлантиришга қаратилгани билан аҳмиятлидир.

Р.Салаев, Амударё тумани Камбағалликни қисқартириш ва бандликка кўмаклашиш бўлими бошлиғи