2-сонли касб-ҳунар мактабида “Очиқ эшиклар куни” ва “Касблар фестивали” тадбирлари ўтказилди

Мамлакатимизда таълим тизимини янгилаш ва уни халқаро стандартларга мослаштириш борасида катта қадамлар ташланмоқда. 2020-2021 ўқув йилидан бошлаб юртимизда Халқаро стандарт таснифлагичи даражалари билан уйғунлашган янги таълим тизими жорий этилди.

Ушбу ислоҳотлар натижасида 2020/2021 ўқув йилида Амударё туманида ташкил қилинган 2-сонли касб-ҳунар мактабида ҳам ўқувчиларга замон талаблари асосида билим берилиб, касб-ҳунар сирлари пухта ўргатилмоқдалар.

Мактабда 2021-2022-ўқув йилида 7та йўналиш, 2022-2023-ўқув йилида эса 9та йўналиш бўйича халқаро стандартларга мос мутахассислар тайёрланиб, улар бугунги кунда халқ хўжалигининг турли соҳаларида фаолият юритмоқда. Аксарият битирувчи ёшлар тадбиркорлик фаолияти билан шуғулланмоқда.

Келгуси 2024/2025 ўқув йилида касб-ҳунар мактабига 8та йўналиш бўйича жами 208 нафар ўқувчиларни қабул қилиш режалаштирилмоқда. Қабул мавсуми бошлангач, автомобиль двигателларини ташхислаш ва таъмирлаш, автомобиль шассисига техник хизмат кўрсатиш ва таъмирлаш устаси, компьютер графикаси ва дизайн оператори, пайвандловчи, тикувчи, ошпаз-қандолатчи, маиший техника жиҳозларини таъмирлаш ҳамда оқова сув ва сув таъминоти тизимларидан фойдаланиш ва монтаж қилиш устаси  касби касбларни эгаллашни истаган ёшлар ушбу таълим масканига ҳужжат топширишлари мумкин бўлади.

Қабул олдидан бўлғуси ўқувчилар ва уларнинг ота-оналарини касб-ҳунар мактаби фаолияти билан яқиндан таништириш мақсадида 15 май куни “Очиқ эшиклар куни” тадбири ва “Касблар фестивали” ўтказилди.

Тадбир аввалида касб-ҳунар мактаби маъмурияти масъуллари йиғилганларга мавжуд йўналишлар ҳақида маълумотлар берди. Сўнгра ҳар бир йўналиш бўйича таҳсил олаётган ўқувчиларнинг чиқишлари намойиш қилиниб, иштирокчилар уларнинг касб-ҳунарни қанчалик пухта эгаллаганига гувоҳ бўлдилар.

Айтиш жоизки, ўтган 2022-2023-ўқув йилида касб-ҳунар мактабини 201 нафар ўқувчилар тамомлаб, уларнинг 86 нафари олий таълим муассасаларига ўқишга кирди. Битирувчи ўқувчиларнинг 56 нафари эса ўз мутахассисликлари бўйича ишга жойлашган. Бундан ташқари, 89 нафар битирувчи тадбиркорлик йўналишида ўз фаолиятини бошлашди. Жорий йилда мактабни тамомлаётган ўқувчилар ҳам меҳнат бозорида ўз ўринларини топиб, малакали касб эгаси сифатида халқимизга хизмат қилишни ўз олдларига мақсад қилиб қўйишган.

Битирувчиларга ҳавас қилиб, мазкур таълим даргоҳига ўқишга киришни ният қилган йигит-қизлар таълим муассасасидаги шарт-шароит, таълим-тарбия жараёни билан яқиндан танишдилар.

Тадбир давомида касб-ҳунар мактаби ўқувчилари томонидан ижро этилган куй-қўшиқлар ва рақслар “Очиқ эшиклар куни” тадбири ва “Касблар фестивали”ни ҳақиқий байрамга айлантирди.

Чиндан ҳам, касб ва ҳунар инсоннинг ҳаётида муҳим ўрин тутади. У нафақат моддий фаровонликка эришишнинг калити, балки шахснинг ижтимоий мавқеи ва ўз-ўзини англашида ҳам бош омилдир. Ҳар бир инсон ўз касби орқали жамият равнақига ҳисса қўшади ва ўзининг шахсий ривожланишига йўл очади. Касб-ҳунар эгаллаш инсонга мустақиллик бахш этади ва унинг ижтимоий муносабатларини мустаҳкамлайди. Бундан ташқари, касб-ҳунар инсоннинг ўзига бўлган ишончини оширади ва унга ўз қўли билан ҳаётини яхшилаш имконини беради.

Умид қиламизки, келгусида Амударё туманидаги 2-сонли касб-ҳунар мактабидан ҳам ана шундай касб-корли инсонлар етишиб чиқиб, улар меҳнат фаолият орқали нафақат ўзининг ва оиласининг, балки бутун халқимизнинг фаровонлигини таъминлашга ҳам муносиб ҳисса қўшадилар. Ўтказилган “Очиқ эшиклар куни” ва “Касблар фестивали” тадбирлари эса юзлаб ўқувчиларнинг келгуси таълим маскани сифатида мазкур касб-ҳунар мактабини танлашларида восита бўлади.

Ғ.Ешниёзов