Ёнғин хавфсизлигини таъминлаш бўйича долзарб 30 кунлик доирасида аҳоли хонадонлари ўрганилмоқда
Қорақалпоғистон Республикаси Вазирлар Кенгаши Раисининг 2024 йил 24 июнь кунги ва Амударё тумани ҳокими, фуқаро муҳофазаси бошлиғининг 2024 йил 28 июнь кунги фармойишлари ижросини таъминлаш мақсадида жорий йилнинг 1 июль санасидан 1 август санасига қадар “Ёнғин хавфсизлигини таъминлаш бўйича долзарб 30 кун” тадбирини ўтказиш белгиланган.
Ушбу ҳужжатлар ижросини таъминлаш мақсадида Амударё тумани Фавқулодда вазиятлар бўлими ходимлари ва тегишли соҳа вакиллари ўзаро ҳамкорликда Республикамиз ҳудудида фуқароларнинг эҳтиётсизликлари туфайли сўнгги вақтларда кузатилаётган ёнғинлар ва уларнинг салбий оқибатларини ҳисобга олиб, ёнғин хавфи юқори бўлган объектларда, айниқса, оромгоҳлар, ўрмонлар, уй-жойлар ҳамда таълим объектларида ёнғин хавфсизлигини таъминлаш, фуқароларнинг ҳаёти, мол-мулкининг дахлсизлигини сақлаш мақсадида барча ҳудудларда истиқомат қилувчи аҳоли хонадонларига кириб, фавқулодда ҳодисалар юз берганда ёки бемаврид ёнғин ҳодисаси содир бўлганда қандай ҳаракат қилиш зарурлиги, шунингдек, куз-қиш мавсумига тайёргарлик кўриш юзасидан зарур тушунтириш ишларини олиб боришмоқда.
Хусусан, аҳоли хонадонларидаги иситиш тизимларининг ҳолати кўздан кечирилиб, уй хоналарида ҳаво алмашиниши, иситиш қозонларининг қай даражада созлиги ўрганилмоқда ҳамда агар иситиш қозонлари уйлар ичкарисида жойлашган бўлса, куз-қиш мавсумидан олдин, хавфсизлик нуқтаи назаридан уларни уй ташқарисидаги қулай жойга ўрнатиш юзасидан зарур тушунтириш ишлари олиб борилмоқда.
Амударё тумани Ирригация бўлимида Фавқулодда вазиятлар бўлими ходимлари ва тегишли соҳа вакиллари билан ҳамкорликда ўтказилган тадбирда ҳам турли кўринишдаги фавқулодда вазиятлар – зилзила, сув тошқини, кучли шамоллар ва ёнғин билан боғлиқ ҳодисалар содир бўлганда тўғри ҳаракатланиш бўйича ўқув амалий-тактик машқи ўтказилди.
Ўқув машғулотларида фавқулодда вазиятлар содир бўлганда, энг аввало, ёш болаларни ва кекса кишиларни қутқариш чораларини кўриш, мабода, улар зарарланган тақдирда биринчи ёрдам кўрсатиш, ёнғинни бартараф этиш, асосан ёнғин келиб чиқишининг олдини олишга қаратилган саъй-ҳаракатлар амалда кўрсатиб берилди. Шу билан бирга, аҳоли хонадонларида, муассаса ва ташкилотларда, болалар оромгоҳларида ёнғин хавфсизлигини таъминлашга қаратилган чор-тадбирлар юзасидан иштирокчиларга зарур тавсиялар, тушунчалар берилди.
Тадбир давомида Хизр эли маҳалласи ҳудудида жойлашган 46-сонли мактабнинг 300 ўринли қўшимча биноси қурилишини амалга ошираётган “Sanjar-Diyor building” МЧЖ қурувчилари томонидан мазкур қурилиш объектида амалга оширилаётган ишлар ёнғин хавфсизлиги қоидаларига қай даражада жавоб бериши, ишчи-ходимларнинг фавқулодда вазиятларда қандай ҳаракат қилиш зарурлиги тўғрисидаги билим ва малакалари ўрганилди.
Фавқулодда вазиятлар бўлими ходимлари ва тегишли соҳа мутахассислари мазкур қурилиш бўйича лойиҳа ҳужжатлари билан ҳам танишиб, бажарилаётган ишлар лойиҳада кўрсатилган қурилиш меъёрий талабларига мос келиш-келмаслиги билан батафсил танишиб чиқдилар ҳамда қурувчиларга аниқланган камчиликлар юзасидан керакли маслаҳатлар бердилар. Бу бўйича эслатмалар ҳам тарқатилиб, қурилиш объектида иш жараёнида техника хавфсизлиги қоидаларига қатъий амал қилиш, қурилиш олиб борилаётган ҳудудда кераксиз чиқиндиларни ёқмаслик, вақтинчалик тортилган электр симлардан фойдаланмаслик бўйича амалий тушунтириш ишлари олиб борилди.
Айни кунларда туманимизда “Ёнғин хавфсизлигини таъминлаш бўйича долзарб 30 кун” тадбирлари Фавқулодда вазиятлар бўлими ходимлари ва тегишли соҳа мутахассислари томонидан овул ва маҳаллаларда, муассаса ва ташкилотларда кенг миқёсда амалга оширилмоқда. Ўтказилаётган амалий тадбирлардан кўзланган мақсад эса битта – халқимизни ҳар қандай кўринишдаги фавқулодда вазиятларда ишончли ҳимоя қилиш, айниқса, ёнғин хавфсизлигини таъминлаш, жамиятимизда тинч, хотиржам ва осойишта, фаровон ҳаёт барқарорлиги учун муносиб ҳисса қўшишдир.
Робия Йўлдошева
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
