Депутатлар иштирокида туманни ижтимоий-иқтисодий ривожлантиришга доир масалалар муҳокама қилинди

2024 йил 9 август куни Амударё тумани ҳокимлигининг мажлислар залида туманни ижтимоий-иқтисодий ривожлантиришга доир масалалар юзасидан йиғилиш ва Халқ депутатлари туман Кенгашининг навбатдаги сессияси ўтказилди.

Йиғилишда Амударё тумани ҳокими, сектор раҳбарлари, Қорақалпоғистон Республикаси Жўқорғи Кенгеси депутатлари, Халқ депутатлари туман Кенгаши депутатлари, сиёсий партиялар туман Кенгаши раҳбарлари, туман тижорат банклари раҳбарлари, “Маҳалла еттилиги” аъзолари ҳамда оммавий ахборот воситалари вакиллари иштирок этди.

Йиғилишда Қорақалпоғистон Республикаси Жўқорғи Кенгеси депутати, Ўзбекистон Республикаси Олий Мажлиси Сенати аъзоси Улуғбек Жалменов қатнашди ва нутқ сўзлади.

Маълумки, Ўзбекистон Республикаси Олий Мажлиси Сенати томонидан ҳудудлар ва тармоқларда иқтисодий ўсиш суръатларини таъминлаш бўйича жорий йилнинг иккинчи ярим йиллигига белгиланган устувор вазифаларнинг бажарилиши устидан таъсирчан парламент назоратини амалга ошириш бўйича амалий ишлар қилинмоқда. Шу мақсадда туманга бириктирилган Қорақалпоғистон Республикаси Жўқорғи Кенгеси депутати, Ўзбекистон Республикаси Олий Мажлиси Сенати аъзоси Улуғбек Жалменов туманда иқтисодий ўсиш суръатларини янада тезлаштириш, аҳоли турмуш даражасини ошириш, бандлигини таъминлаш ҳамда ижтимоий инфратузилмани яхшилаш бўйича Қорақалпоғистон Республикаси Жўқорғи Кенгеси томонидан белгиланган устувор вазифалар хусусида тўхталиб ўтди.

Кун тартибидаги масала бўйича Амударё тумани ҳокими Собир Хўжаметов сўзга чиқиб, туманда аҳолини иш билан таъминлаш бўйича Президентимизнинг 2024 йил 9 январдаги қарорига асосан жорий йилда жами 15 минг 836 та янги иш ўринларини яратиш режалаштирилганини, бу бўйича тизимли ишлар амалга оширилаётганини таъкидлаб ўтди.

Ўтган 6 ой давомида туманда Сайхунобод тажрибаси бўйича ердан янада самарали фойдаланиш, деҳқонлар учун бозор топишга кўмаклашиш, тадбиркорларни сифатли уруғ ва дори воситалари билан таъминлаш, тадбиркорларнинг экспортига амалий ёрдам бериш мақсадида оилавий тадбиркорликни ривожлантириш орқали 2 минг 107 нафар фуқарога 29,7 млрд сўмлик имтиёзли кредит маблағлари ажратилиб, уларнинг тадбиркорлик фаолиятлари йўлга қўйилган.

Уйчи тажрибаси асосида туман ҳокими тадбиркорлик ва бизнес билан шуғулланиш истагидаги аҳоли билан манзилли ишлаш тизимини йўлга қўйиб, апрель-июнь ойларида жами 8 марта учрашувлар ўтказган ҳамда 60дан ортиқ тадбиркорларнинг муаммо ва таклифлари тингланган.

Уйчи тажрибаси асосида 18-30 ёш оралиғидаги 38 минг 390 нафар ёшлар хатловдан ўтказилиб, улар орасидан ишсизларининг бандлигини таъминлаш бўйича ҳам тизимли ишлар амалга оширилмоқда.

Туман ҳокими жорий йилнинг иккинчи ярмида ҳам барча йўналишлардаги ишлар узлуксиз давом эттирилиб, туманни ижтимоий-иқтисодий ривожлантириш бўйича самарали натижаларга эришилиши учун зарур чоралар кўрилишини таъкидлади.

Шундан сўнг Халқ депутатлари Амударё туман Кенгашининг 78-сессиясида туманни ижтимоий-иқтисодий ривожлантириш бўйича долзарб масалалар муҳокама қилинди.

Дастлаб Амударё тумани солиқ инспекцияси бошлиғи Жаҳонгир Раҳимов Амударё туманида 2024 йил 6 ой давомида бюджетга тушумларни таъминлаш ва “Маҳаллабай” ишлаш бўйича амалга оширилган ишлар тўғрисида ҳисобот берди.

Ҳисоботда қайд қилинганидек, бюджетга тушумларни таъминлаш бўйича 2024 йилнинг биринчи ярми учун 23 млрд 221,3 млн. сўм режа графиги белгиланган бўлиб, амалда 23 млрд 685 млн. сўм, яъни режага нисбатан 102 фоиз миқдорида, бюджетга қўшимча 463,7 млн. сўм ортиғи билан тушум таъминланган. Бюджет тушумлари 2023 йилнинг мос даврига солиштирганда 133,1 фоизга ўсган.

Сессия кун тартибидаги навбатдаги масала юзасидан Мажбурий ижро бюроси Амударё тумани бўлими бошлиғи, адлия кичик маслаҳатчиси Қувонч Есенбеков бюро томонидан жорий йилнинг ўтган 6 ойида амалга оширилган ишлар хусусида, Кенгашнинг Суд-ҳуқуқ масалалари ва коррупцияга қарши курашиш бўйича доимий комиссияси раиси Музаффар Ешчанов Қорақалпоғистон Республикаси Жўқорғи Кенгесига сайлов ўтказиш бўйича Амударё туманидаги округ сайлов комиссиялари аъзолигига номзодларни тавсия қилиш масаласида ахборот берди.

Амударё тумани ҳокими ўринбосари, Оила ва хотин-қизлар бўлими бошлиғи Гўзал Сабурова депутатларга хотин-қизларнинг тадбиркорлигини йўлга қўйиш ва ривожлантиришни қўллаб-қувватлашга бўйича амалга оширилаётган ишлар ҳақида ҳисобот бериб, “Аёллар маслаҳат кенгаши”га келиб тушган хотин-қизларнинг мурожаатларига асосан ижтимоий ҳимояга муҳтож 5 нафар хотин-қизларни “Аёллар дафтарининг” 1-тоифасига киритиш бўйича таклиф билдирди.

Шунингдек, сессияда Амударё тумани Иқтисодиёт ва молия бўлими бошлиғи Жавлонбек Жумамуродов туман маҳаллий бюджети параметрларида кўзда тутилган харажатларга ўзгартиришлар киритиш бўйича, туман ҳокимлигининг молия-иқтисодиёт ва камбағалликни қисқартириш масалалари бўйича бош мутахассиси Жаҳонгир Йўлдошов маҳаллий бюджетнинг қўшимча манбалари ҳисобидан маблағ ажратиш масалаларида таклифлар киритди.

Сессия кун тартибига киритилган барча масалалар атрофлича муҳокама қилиниб, таклифлар тингланди ҳамда фаол муҳокамадан кейин халқ депутатлари туман Кенгашининг тегишли қарорлари қабул қилинди.

Ғ.Ешниёзов