Манғит шаҳридаги тўйхоналар сони яна биттага кўпайди

Мамлакатимизда ишбилармонлар учун яратилаётган кенг имкониятлар туфайли янгидан-янги тадбиркорлик объектлари қад ростлаб, шаҳар ва қишлоқлар, маҳаллалар тобора ободон гўшаларга айланмоқда. Бу каби бунёдкорлик ишлари халқимизнинг маданий фаровонлиги юксалишида муҳим омил бўлаётир. Айниқса, муҳтарам Президентимизнинг “Ҳудудларда тадбиркорлик лойиҳаларини молиялаштириш механизмларини янада кенгайтириш чора-тадбирлари тўғрисида”ги 212-сонли қарори бу борадаги ишларни янада жадаллаштириш имконини берди.

Мазкур Қарорда белгиланган устувор вазифалардан бири – ишсизликни бартараф этиш мақсадида янги иш ўринларини яратиш, қолаверса, халқимизнинг ижтимоий-маданий ҳаётини юксалтиришга қаратилган инновацион лойиҳаларни амалга оширишда тадбиркорларни молиявий қўллаб-қувватлашга қаратилгани билан ҳам аҳамиятлидир.

Амударё туманида ҳам яратилаётган имкониятлардан самарали фойдаланиб, ўзларининг бизнес-режаларини муваффақиятли амалга ошираётган тадбиркорлар сафи йил сайин ошиб бормоқда. “Қўшаев Раим” хусусий корхонаси раҳбари Санамжон Нағимова ана шундай ишбилармон тадбиркорлардан. Мустақилликнинг илк йиллариданоқ хусусий тадбиркорлик йўналишида ўзини синаб кўришга интилган Санамжон Нағимова нафақат бу йўлдаги синовларни енгди, балки амударёликлар ва уларнинг фарзандлари учун замонавий шароитларга эга истироҳат боғини барпо этди. Бу ерда миллий таомлар тайёрловчи барча қулайликларга эга кафе-ошхонадан тортиб, болажонларни эзгулик ва яхшилик олами сари етакловчи эртаклар қаҳрамонлари, аттракционлар, болажонлар учун автодром майдончалари, чўмилиш бассейнларигача ташкил қилиб, халқ олқишига сазовор бўлган Санамжон Нағимова яна бир эзгу ишга қўл урди. Истироҳат боғи ҳудудида барча қулайликларга эга бўлган, тўй ва турли байрам тантаналари учун мўлжалланган муҳташам бинони бунёд этди.

Тадбиркорнинг ўз маблағи ва 1,3 млрд сўмлик имтиёзли кредит маблағи ҳисобига, миллий ва замонавий меъморчилик анъаналари асосида қурилган, “Олтин сарой” деб номланган мазкур ҳашаматли бино мамлакатимиз мустақиллигининг 33 йиллигига тадбиркорнинг халқимиз учун муносиб туҳфаси бўлди.

Жорий йилнинг 10 август санасида “Олтин сарой” тўй ва тантаналар мажмуасининг фойдаланишга топширилишига бағишланган маросим бўлиб ўтди, Тантанали маросимда Амударё тумани ҳокими Собир Хўжаметов, туман ҳокимининг ўринбосарлари, банк ва молия соҳаси ходимлари, Манғит шаҳри маҳаллаларида истиқомат қилувчи аҳоли вакиллари иштирок этдилар.

Маросимда туман ҳокими Собир Хўжаметов табрик нутқи сўзлади. У ўз нутқида “Олтин сарой” тўй ва тантаналар мажмуасининг халқимиз орзу-ниятларига ниҳоятда мутаносиб тарзда бунёд этилганини таъкидлаб, мажмуада турли маросимлар дастурхонларини безаш учун буюртмалар қабул қилиш, тўй сайлларини ташкил этиш, қуюқ ва суюқ таомлар тайёрлаб бериш хизматларининг ҳам ташкил этилгани тўй-тантаналар ва оилавий маросимларни ортиқча чиқимларсиз ҳамда исрофгарчиликларсиз ўтказиш имконини беришини мамнуният билан қайд этди. Шу билан бирга муҳтарам Президентимизнинг ташаббуслари ва қўллаб-қувватлашлари туфайли тадбиркорлик субъектларини ривожлантиришга қаратилаётган эътибор, яратилаётган шарт-шароит ҳамда имкониятлар хусусида сўз юритди.

Шундан сўнг, рамзий тасма кесилиб, маросим иштирокчилари “Олтин сарой” мажмуасининг безатилиши, замонавий жиҳозлари ҳамда турли катта-кичик маросимлар учун мўлжалланган алоҳида заллари ва буюртмалар қабул қилиш, уларни сифатли тайёрлаш бўйича ходимлари, ошхонада яратилган шароитлар билан яқиндан танишдилар.

Шуниси эътиборга моликки, ушбу тадбиркорлик объекти ишга туширилиши муносабати билан 10 нафар киши доимий, 5 нафар киши эса мавсумий иш билан таъминландилар ва шу куннинг ўзида улар ўз иш фаолиятини бошладилар.

“Олтин сарой” тўй ва тантаналар саройи айни пайтда деярли ҳар куни ёш келин-куёвларнинг никоҳ маросимларидаги қувонч ва шодликлари, халқимизнинг эзгу орзу-ниятларига ошна қалбларни бағрига олиб, ҳақиқатдан ҳам олтин гўшага айланиб бормоқда.

Робия Йўлдошева.