Янги туғруқ мажмуасининг очилиш маросими бўлиб ўтди

27 август куни Амударё тумани Тиббиёт бирлашмаси тасарруфидаги янги замонавий шарт-шароитларга эга туғруқ мажмуасининг очилиш маросими бўлиб ўтди. Маросимда Қорақалпоғистон Республикаси Жўқорғи Кенгеси Раиси Аманбай Оринбаев, туман ҳокими Собир Хўжаметов, секторлар раҳбарлари, ҳоким ўринбосарлари ҳамда нуронийлар, тиббиёт бирлашмаси жамоаси иштирок этдилар.

Очилиш маросимида Қорақалпоғистон Республикаси Жўқорғи Кенгеси Раиси Аманбай Оринбаев сўзга чиқиб, йиғилганларни замонавий туғруқ мажмуасининг фойдаланишга топширилиши ҳамда мустақиллигимизнинг 33 йиллиги байрами муносабати билан табриклади.

Жўқорғи Кенгес Раиси ўз сўзида кейинги йилларда юртимизда янги давлат ва жамият қурилиши йўлида тарихий ишлар амалга оширилганини ва бу борадаги саъй-ҳаракатлар кўлами тобора кенгайиб бораётганини, айниқса, соғлиқни сақлаш соҳаси улкан ўзгаришларга юз тутганлигини, соҳага эътибор ҳам, муносабат ҳам тубдан ўзгарганлигини алоҳида таъкидлади.

Таъкидланганидек, сўнгги йилларда мамлакатимизда инсон саломатлигини мустаҳкамлаш, аҳолига кўрсатилаётган тиббий хизматлар сифатини тубдан ошириш, тиббиёт муассасаларининг ресурслар салоҳиятини яхшилаш, халқимизнинг эркин ва фаровон яшаши, бахтли ҳаёти йўлида изчил ислоҳотлар амалга оширилмоқда. Соғлиқни сақлаш соҳаси ривожи йўлида давлатимиз раҳбарининг қатор фармон ва қарорлари қабул қилиниб, аҳоли соғлиғини муҳофаза қилишга давлат сиёсатининг энг муҳим йўналиши сифатида эътибор қаратилди. Аввало, тиббиётга ажратилаётган маблағлар ҳажми кескин оширилди. Натижада ўтган қисқа даврда тиббиётимизда мислсиз янгиланишлар содир бўлди.

Очилиш маросимида Қорақалпоғистонда хизмат кўрсатган тиббиёт ходими, фахрий шифокор Султонбой Тажиниёзов сўзга чиқиб, ўзининг кўп йиллик тажрибасида бугунгидек имкониятлар ва тиббиёт соҳаси ривожига берилаётган эътибор мислсиз эканлигини, ислоҳотларнинг барчаси инсон қадри учун, аҳоли саломатлиги йўлидаги собитқадамлик билан амалга оширилаётганини алоҳида қайд этди.

Таъкидлаш жоизки, бугун тиббиёт соҳасида оналик ва болаликни муҳофаза қилиш, тиббий хизмат сифатини янада яхшилашга алоҳида аҳамият берилиб, “Она ва бола соғлиғига эътибор – жамиятга, келажакка эътибор” тамойили асосида тизимли ишлар амалга оширилмоқда.

Хусусан, туманимизда ҳам ушбу тамойил асосида тиббиёт соҳасидаги эзгу ишларнинг кўлами кенгаймоқда. Ҳудудлардаги тиббиёт муассасаларининг моддий-техник базаси янада мустаҳкамланиб, замонавий тиббий жиҳозлар билан таъминланмоқда. Туман Тиббиёт бирлашмасига қарашли янги туғруқ мажмуасининг бунёд этилгани ҳам бунинг яққол ифодасидир.

Тиббиёт бирлашмаси таркибидаги ушбу янги – қиймати 14,4 млрд. сўмга тенг бўлган 90 ўринли 4 қаватли туғруқ комплексининг замонавий биноси “Темир бетон” МЧЖ қурувчилари томонидан ўз муддатида ва сифатли тарзда қуриб битказилди.

Янги лойиҳа асосида барпо этилган мазкур иморатдаги иситиш ва совитиш тармоқлари илғор технологиялар асосида ишлайди. Олиб борилган кенг кўламли қурилиш ишлари натижасида замонавий қиёфа касб этган бино замонавий жиҳозлар билан жиҳозланган, сифатли тиббий асбоб-ускуналар билан таъминланган.

Қайд этиш жоизки, оналар ва болалар саломатлигини мустаҳкамлаш, ҳомиладорларга ғамхўрлик кўрсатиш, эртамиз эгаларининг соғлом туғилишига шароит яратиш мақсадида амалга оширилаётган бу каби эзгу ишлар туманда тиббий хизмат сифатини янги босқичга олиб чиқишга замин яратади.

Чарос Арслонова, туман ҳокимлигининг Ахборот хизмати раҳбари.