Yangi tugʻruq majmuasining ochilish marosimi boʻlib oʻtdi

27-avgust kuni Amudaryo tumani Tibbiyot birlashmasi tasarrufidagi yangi zamonaviy shart-sharoitlarga ega tugʻruq majmuasining ochilish marosimi boʻlib oʻtdi. Marosimda Qoraqalpogʻiston Respublikasi Joʻqorgʻi Kengesi Raisi Amanbay Orinbayev, tuman hokimi Sobir Xoʻjametov, sektorlar rahbarlari, hokim oʻrinbosarlari hamda nuroniylar, tibbiyot birlashmasi jamoasi ishtirok etdilar.

Ochilish marosimida Qoraqalpogʻiston Respublikasi Joʻqorgʻi Kengesi Raisi Amanbay Orinbayev soʻzga chiqib, yigʻilganlarni zamonaviy tugʻruq majmuasining foydalanishga topshirilishi hamda mustaqilligimizning 33-yilligi bayrami munosabati bilan tabrikladi.

Joʻqorgʻi Kenges Raisi oʻz soʻzida keyingi yillarda yurtimizda yangi davlat va jamiyat qurilishi yoʻlida tarixiy ishlar amalga oshirilganini va bu boradagi saʼy-harakatlar koʻlami tobora kengayib borayotganini, ayniqsa, sogʻliqni saqlash sohasi ulkan oʻzgarishlarga yuz tutganligini, sohaga eʼtibor ham, munosabat ham tubdan oʻzgarganligini alohida taʼkidladi.

Taʼkidlanganidek, soʻnggi yillarda mamlakatimizda inson salomatligini mustahkamlash, aholiga koʻrsatilayotgan tibbiy xizmatlar sifatini tubdan oshirish, tibbiyot muassasalarining resurslar salohiyatini yaxshilash, xalqimizning erkin va farovon yashashi, baxtli hayoti yoʻlida izchil islohotlar amalga oshirilmoqda. Sogʻliqni saqlash sohasi rivoji yoʻlida davlatimiz rahbarining qator farmon va qarorlari qabul qilinib, aholi sogʻligʻini muhofaza qilishga davlat siyosatining eng muhim yoʻnalishi sifatida eʼtibor qaratildi. Avvalo, tibbiyotga ajratilayotgan mablagʻlar hajmi keskin oshirildi. Natijada oʻtgan qisqa davrda tibbiyotimizda mislsiz yangilanishlar sodir boʻldi.

Ochilish marosimida Qoraqalpogʻistonda xizmat koʻrsatgan tibbiyot xodimi, faxriy shifokor Sultonboy Tajiniyozov soʻzga chiqib, oʻzining koʻp yillik tajribasida bugungidek imkoniyatlar va tibbiyot sohasi rivojiga berilayotgan eʼtibor mislsiz ekanligini, islohotlarning barchasi inson qadri uchun, aholi salomatligi yoʻlidagi sobitqadamlik bilan amalga oshirilayotganini alohida qayd etdi.

Taʼkidlash joizki, bugun tibbiyot sohasida onalik va bolalikni muhofaza qilish, tibbiy xizmat sifatini yanada yaxshilashga alohida ahamiyat berilib, “Ona va bola sogʻligʻiga eʼtibor – jamiyatga, kelajakka eʼtibor” tamoyili asosida tizimli ishlar amalga oshirilmoqda.

Xususan, tumanimizda ham ushbu tamoyil asosida tibbiyot sohasidagi ezgu ishlarning koʻlami kengaymoqda. Hududlardagi tibbiyot muassasalarining moddiy-texnik bazasi yanada mustahkamlanib, zamonaviy tibbiy jihozlar bilan taʼminlanmoqda. Tuman Tibbiyot birlashmasiga qarashli yangi tugʻruq majmuasining bunyod etilgani ham buning yaqqol ifodasidir.

Tibbiyot birlashmasi tarkibidagi ushbu yangi – qiymati 14,4 mlrd. soʻmga teng boʻlgan 90-oʻrinli 4 qavatli tugʻruq kompleksining zamonaviy binosi “Temir beton” MChJ quruvchilari tomonidan oʻz muddatida va sifatli tarzda qurib bitkazildi.

Yangi loyiha asosida barpo etilgan mazkur imoratdagi isitish va sovitish tarmoqlari ilgʻor texnologiyalar asosida ishlaydi. Olib borilgan keng koʻlamli qurilish ishlari natijasida zamonaviy qiyofa kasb etgan bino zamonaviy jihozlar bilan jihozlangan, sifatli tibbiy asbob-uskunalar bilan taʼminlangan.

Qayd etish joizki, onalar va bolalar salomatligini mustahkamlash, homiladorlarga gʻamxoʻrlik koʻrsatish, ertamiz egalarining sogʻlom tugʻilishiga sharoit yaratish maqsadida amalga oshirilayotgan bu kabi ezgu ishlar tumanda tibbiy xizmat sifatini yangi bosqichga olib chiqishga zamin yaratadi.

Charos Arslonova, tuman hokimligining Axborot xizmati rahbari.