Халқ депутатлари Амударё туман Кенгашининг 80-сессияси тўғрисида ахборот

2024 йил 12 сентябрь куни Амударё тумани ҳокимлигининг мажлислар залида Халқ депутатлари туман Кенгашининг 80-сессияси бўлиб ўтди.

Сессияда туман ҳокими Собир Хўжаметов, депутатлар, ҳоким ўринбосарлари, ҳокимлик масъул ходимлари, бўлимлар, ташкилотлар раҳбарлари ҳамда оммавий ахборот воситалари вакиллари иштирок этди.

Сессияни Кенгаш раисининг ўринбосари Ғуломжон Эшниёзов очди ва олиб борди. Сессия котиблигига 1-Навоий сайлов округидан депутат Гулшод Юсупова сайланди.

Кун тартибидаги дастлабки масала юзасидан туман Қишлоқ хўжалиги бўлими бошлиғи Қудрат Абдикаликов ҳисобот берди. Ҳисоботда туманда 2024 йил ҳосили учун фермер хўжаликлари кесимида қишлоқ хўжалиги экинлари оқилона жойлаштирилганлиги, лекин баъзи фермер хўжаликлари белгиланган талабларни бузиб, сувни кўп талаб қиладиган, жойлаштиришда кўрсатилмаган шоли экинини экиш ҳолатлари кузатилаётгани таъкидланди. Ўтказилган тадбирлар давомида 24та фермер хўжаликларида жами 93 гектар майдонларга режасиз шоли экилганлиги аниқланган. Ушбу ҳолат бўйича Халқ депутатлари Амударё туман Кенгашидан белгиланган талабларни бузган фермер хўжаликларига тегишли тартибда чора кўриш таклифи билдирилган. Таклиф депутатлар томонидан қўллаб-қувватланди.

Кун тартибидаги навбатдаги масалалар юзасидан Амударё тумани ҳокимининг қурилиш, коммуникациялар, коммунал хўжалиги, экология ва ободонлаштириш масалалари бўйича ўринбосари Баҳодир Эрназаров ҳисобот берди. Ҳисоботларда қайд этилганидек, Ўзбекистон Республикаси Президентининг тегишли қарорига асосан 2023 йилда Амударё тумани ҳокимлиги ва “JKВ ENERGY NUKUS GROUP” МЧЖ ўртасида тумандаги 125 та ижтимоий соҳа объектларини иситиш тизимларини давлат-хусусий шериклик асосида модернизация қилиш ва бошқариш бўйича битим тузилган. Ўтган йилги иситиш мавсуми якунларига кўра 125та объектларнинг 99тасида иситиш тизимлари модернизация қилинмагани сабабли тадбиркорнинг тегишли мажбуриятларни бажаролмаслик эҳтимоли юзага келмоқда. Шу сабабли ушбу муассасаларни давлат-хусусий шерикликдан чиқариш таклифи билдирилди.

Туман ҳокими ўринбосари шунингдек, Вазирлар Маҳкамасининг тегишли қарорига мувофиқ жамоатчиликнинг фикри асосида “Менинг боғим” лойиҳаси доирасида ўтказилган танловда туманнинг Жумур овул маҳалласи ғолиб деб топилганини, шу сабабли мазкур ҳудудида 2,5 гектар ер майдонида “Яшил боғлар”ни ташкил қилиш таклифини билдирди.

Бундан ташқари, туманда “Ташаббусли бюджет”нинг жорий йил иккинчи мавсумида аҳоли томонидан жами 87та ташаббуслар кўтарилиб, 81таси овоз бериш жараёнида иштирок этгани, овоз бериш натижаларига кўра 7та ташаббус ғолиб деб топилиб, умумий қиймати 9 млрд 520 миллион сўмлик ушбу ташаббусларни тасдиқлаш масаласи ҳам депутатлар эътиборига ҳавола қилинди.

Сессия кун тартибидаги навбатдаги масала юзасидан туман ҳокимининг ўринбосари, инвестиция ва ташқи савдо бўлими бошлиғи Фахриддин Юсупов сўзга чиқиб, 2024 йилнинг II ярмида туманни иқтисодий ривожлантириш, инвестицияларни жалб қилиш, аҳоли бандлигини таъминлаш ва даромадларини ошириш ҳамда 2025 йилга замин яратиш бўйича чора-тадбирлар дастурини тақдим этди.

Шундан сўнг Амударё тумани ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари Нодирбек Камолов сўзга чиқиб, маҳаллий бюджетнинг 2024 йил II чорак ҳолатига электрон савдо майдончасида ер участкаларига бўлган ҳуқуқларни сотишдан тушадиган маблағлар ҳисобидан умумтаълим мактабларини замонавий компьютер ва бошқа асбоб-ускуналар билан таъминлаш учун туман Мактабгача ва мактаб таълими бўлимига маблағ ажратиш таклифини билдирди. Ушбу таклиф ҳам депутатлар томонидан маъқулланди.

Сессияда туман Иқтисодиёт ва молия бўлими бош ҳисобчиси Абай Сағинбаев 2024 йилнинг 6 ойи давомида туман маҳаллий бюджетнинг ижроси бўйича ҳисобот берди. Ҳисоботда қайд этилганидек, ушбу даврда маҳаллий бюджетнинг даромадлар қисми режаси жами 30 млрд 685 млн 338 минг сўм қилиб белгиланган бўлиб, режа 31 млрд 297 млн 300 минг сўмга, яъни 611 млн 962 минг сўмга ортиғи билан бажарилган. Ҳисобот даврида маҳаллий бюджетнинг харажатлари учун жами 127 млрд 459 млн сўмдан ортиқ маблағлар сарфланган.

Сессияда шунингдек, Амударё тумани “Сув етказиб бериш” давлат муассасаси директори Шукрулло Юсупов сўзга чиқиб, Ўзбекистон Республикаси Сув хўжалиги вазирлигининг қарори билан Қорақалпоғистон Республикаси учун қўшимча сув лимити ажратилгани сабабли ушбу лимитни сув истеъмолчилар ўртасида тақсимлаш ва сув лимитини янгидан тасдиқлаш бўйича таклиф билдирди.

Сессияда Амударё тумани ҳокимининг маслаҳатчиси Аширбай Қўшаев сўзга чиқиб, географик объектларнинг Давлат реестрида туманда Қипчоқ номи билан аталган иккита ҳудудий бирлик – Қипчоқ овул фуқаролар йиғини ва Қипчоқ шаҳарча фуқаролар йиғини мавжудлиги, бу ҳолат “Географик объектларнинг номлари тўғрисида”ги қонун талабларига тўғри келмаслиги сабабли тегишли ташкилотлар томонидан ушбу ҳолатни бартараф қилиш сўралганини маълум қилди. Ушбу масала Қипчоқ овул фуқаролар йиғинининг вакиллар йиғилишида муҳокама қилиниб, Қипчоқ овул фуқаролар йиғини номини “Жайҳун овул фуқаролар йиғини” деб ўзгартириш таклифи билдирилган ва бу таклиф депутатлар томонидан тасдиқланди.

Кун тартибидаги барча масалалар бўйича фаол муҳокамалардан кейин Халқ депутатлари туман Кенгашининг тегишли қарорлари қабул қилинди. Шунинг билан сессия ўз ишини якунлади.

Ш.Қурбонбоев