40-СОНЛИ МАКТАБ ТАШКИЛ ЭТИЛГАНИНИНГ 40 ЙИЛЛИГИ КЕНГ НИШОНЛАНДИ

Мактаб – бу илм ва маърифат ўчоғи, маънавият ва зиё масканидир. Бу ерда болалар нафақат фанларни ўрганадилар, балки ҳаёт учун зарур бўлган муҳим кўникмалар ва қадриятларни ҳам эгаллайдилар. Мактабнинг асосий вазифаси – шахсни комил инсон сифатида тарбиялаш, унинг ижтимоий ва интеллектуал ривожланишига кўмаклашишдир. Мактаб бағрида болалар ўзларининг иқтидор ва қобилиятларини намоён қиладилар ва ҳаётнинг турли соҳаларида муваффақиятга эришиш учун зарур бўлган асосларни яратадилар. Мактаб нафақат таълим олиш йилларида, балки инсоннинг бутун ҳаёти давомида унинг ривожланишига таъсир кўрсатади ва келажакдаги муваффақиятлари учун пойдевор яратади. Шу боис, ким қайси ёшда, қандай лавозимда бўлмасин, ўзи таҳсил олган мактаб сари ҳаяжон билан талпинади.

Амударё туманидаги 40-сонли умумий ўрта таълим мактаби 1984 йилнинг 1 сентябрида иш бошлаган бўлиб, минглаб ўқучилар учун ҳаётбахш зиё маскани вазифасини ўтаган ва ўтаб келмоқда. Жорий йилда ушбу таълим маскани иш бошлаганига 40 йил тўлмоқда. Шу муносабат билан Ўқитувчи ва мураббийлар куни арафасида катта тадбир ташкил қилинди. Тадбирга узоқ йиллар ушбу доргоҳда ёшларга таълим-тарбия бериб, айни кунларда нафақада кексалик гаштини сураётган фахрий ўқитувчи ва мураббийлар, ушбу муассаса остонасидан учирма бўлиб, халқ хўжалигинининг турли соҳаларида самарали меҳнат қилиб, эл-юрт эътирофига сазовор бўлган битирувчилар, маҳалла фаоллари ва кенг жамоатчилик вакиллари таклиф қилинди.

Иштирокчилар мактаб ҳовлисида тантанали тарзда кутиб олинди.

Фаоллар залида бўлиб ўтган учрашувда сўзга чиққанлар ушбу таълим муассасасининг туманимиз ижтимоий ҳаётида тутган ўрни ва бу масканда фаолият юритган даврлари ҳақида илиқ таассуротларини ёдга олдилар.

Мактаб ташкил қилинганидан буён унга Ўзбекистон халқ таълими аълочиси Арслон Камолович Ниёзов, Қорақалпоғистон Республикаси Халқ ўқитувчиси ва Қорақалпоғистон Республикасида хизмат кўрсатган ёшлар мураббий Қодирберган ҳожи Жумамуратов, Ўзбекистон халқ таълими аълочиси Аҳмад Машарипов ва Қорақалпоғистонда хизмат кўрсатган маданият ходими Ўғилжон Якубовалар раҳбарлик қилишган. 2004 йилнинг январь ойидан бери мактабни Қорақалпоғистон Республикаси Халқ ўқитувчиси Санобар Хўжамуротова бошқариб келмоқда.

Унинг раҳбарлигида мактаб нафақат ўқувчилар сони, балки таълим сифати ва самарадорлиги, кадрлар салоҳияти, ўқувчилар эришаётган натижалар ва битирувчиларнинг олий таълим муассасаларига кириш кўрсаткичи бўйича туманда етакчи таълим даргоҳларидан бири бўлиб келмоқда.

Ҳозирда мактабда 1 минг 614 нафар ўқувчи таҳсил олади ва уларга 110 нафар ўз касбининг усталари бўлган малакали ўқитувчилар дарс беришади. Уларнинг 26 нафари олий  ва 36 нафари 1-тоифали, 13 нафар инглиз тили фани ўқитувчиларининг барчаси хорижий тилни ўқитиш бўйича халқаро ва унга тенглаштирилган сертификатга эга юқори малакали педагоглардир. 2023-2024 ўқув йилида мазкур мактабнинг 53 нафар ўқувчилари чет тили фанидан халқаро ва унга тенглаштирилган сертификатга эга бўлиб, туманда етакчилик қилди. Президент соврини учун ўтказиб келинаётган “Хорижий тилларни ўқитиш бўйича энг яхши мактаб” танловида ҳам 40-сонли мактаб жамоаси 3 йилдан буён туманда ғолибликни қўлга киритиб келмоқда.

Ўтган ўқув йилида 11-синфни тамомлаган ўқувчиларнинг 114 нафари олий таълим муассасаларига ўқишга кириб, ўртача 98,4 балл тўпладилар ва бу борада туманда энг илғор мактаблар учлигидан жой олдилар.

Шунингдек мактаб жамоаси ва ўқувчилари олимпиадалар ва турли танлов ҳамда беллашувларда, мусобақаларда ғолиблар сафидан жой олиб, юқори натижаларга эришмоқдалар. Жумладан, “Зукко китобхон”, “Турон театри”, “Беш ташаббус олипиадаси” каби танловларда эришилган юқори натижалар мактаб рейтингининг янада ошишида муҳим омил бўлмоқда.

Яқиндагина мактабнинг она тили ва адабиёт фани ўқитувчиси Иқбол Юсуфова “Йилнинг энг яхши ўзбек тили фани ўқитувчиси” танловининг Қорақалпоғистон Республикаси босқичида биринчи ўринни эгаллагани, шунингдек мактабнинг икки нафар 4-синф ўқувчилари Президент мактабига қабул қилингани билан мактаб жамоаси ҳақли равишда фахрланишади.

Бу каби ютуқлар мактаб ўқитувчилари ўртасида соғлом рақобат муҳити мавжудлиги, раҳбариятнинг педагоглар билан ишлашиш ва уларни рағбатлантириш борасида тўғри стратегияни йўлга қўйгани ҳамда ўқувчиларнинг билим олишга чанқоқлиги, жамият ҳаётида фаол иштирок этишга бўлган интилишларининг ёрқин мисолидир.

Фахрий ўқитувчилар ва собиқ ўқувчиларнинг илиқ дил изҳорлари учрашувга ташриф бурганлар кўз олдида олис ва яқин ўтмиш манзараларини қайта гавдалантирди.

Чиндан ҳам, мактабнинг инсон камолотидаги ўрнини ҳеч нарса билан қиёслаб бўлмайди. У инсоннинг шахсий ва касбий ривожланишида муҳим восита бўлиб, келажакдаги муваффақиятларига йўл очади. Мактаб – бу маърифат ва билимнинг чироғи, жамиятнинг келажаги учун пойдевор қўйладиган, ёшларни ватанпарварлик, меҳнатсеварлик ва бошқа муҳим фазилатларга ўргатадиган маскандир. Бу масканда устоз ва мураббийлар ўз шогирдларига билим бериш билан бирга уларни ҳаётга тайёрлайдилар ва шахс сифатида ривожланишига ёрдам берадилар. Шу сабабли ҳам мактабларнинг давлат ва жамият учун аҳамияти беқиёс, ўқитувчи ва мураббийларнинг эса эл-юрт олдида ҳамиша қадри баланддир.

Амударё туманидаги 40-сонли мактаб ҳам мана шундай зиё ва маърифат ўчоғи, таълим ва тарбия масканидир. Ишонамизки, яна юз йиллар, балки ундан-да кўпроқ вақт мобайнида ушбу таълим масканидан минглаб, ўн минглаб битирувчилар учирма бўладилар ва улар ҳам юрт тинчлиги ва тараққиёти, халқ фаровонлиги йўлида фидокорона меҳнат қилиб, устозларининг юзини ёруғ қиладилар, таълим масканларининг номларини янада юксалтирадилар.

Ғ.Ешниёзов