Жумур овулда "Маҳалла еттилиги" самарали фаолият юритмоқда

Амударё туманидаги Жумуровул маҳалласи инфратузилмаси жадал ривожланаётган ҳудудлардан бири саналади. 765та хонадонлардаги 1255та оилаларда истиқомат қилаётган аҳоли ҳаётини яхшилаш, турмуш фаровонлигини оширишга қаратилган чора-тадбирлар ижросини таъминлашда “Маҳалла еттилиги”нинг ўзаро ҳамкорлиги муҳим аҳамият касб этмоқда.

Хусусан, ҳудудни ободонлаштириш ва кўкаламзор гўшага айлантириш, кам таъминланган, эҳтиёжманд оилаларни ижтимоий қўллаб-қувватлаш, аҳоли, айниқса, уюшмаган ёшларнинг иш билан бандлигини таъминлаш, янги тадбиркорлик субъектларини ташкил этиш, оилавий ва якка тадбиркорлик фаолияти билан шуғулланувчи фуқароларни қўллаб-қувватлашга қаратилган чора-тадбирлар туфайли аҳолининг турмуш тарзи кун сайин яхшиланиб бормоқда. “Маҳалла еттилиги”нинг саъй-ҳаракатлари билан фақат жорий йилнинг ўзида аҳолининг электр энергиясига бўлган талабини тўлиқ қондириш мақсадида 5 та аҳоли пунктининг ҳар бирига биттадан, 5 та янги трансформатор ўрнатилди. Аҳоли серқатнов бўлган Абдурауф Фитрат номли, Дарёлик, Шижоатли ва Манғитовул кўчаларига ҳуқуқбузарликларнинг олдини олиш мақсадида кузатув камералари ва МФЙ маъмурий биносига 5 киловатт қувватга эга қуёш панели ўрнатилди.

Уюшмаган ёшларни спортга кенг жалб қилиш, ўқувчи-ёшларнинг дарсдан бўш вақтларини мазмунли ўтказишларини таъминлаш мақсадида “Open budget” дастури доирасида сунъий қопламали спорт майдончаси қурилиб, фойдаланишга топширилди. “Менинг йўлим” дастури асосида Шижоатли кўчасининг 1600 метр қисмига асфальт қопламаси ётқизилди.

Маҳалла аҳлининг ўзаро аҳиллиги ва ҳамжиҳатлиги, қолаверса, “Маҳалла еттилиги” аъзоларининг ҳамкорликдаги саъй-ҳаракатлари боис Жумур овулликлар “Менинг боғим” дастури асосида 3 гектар майдонда боғ барпо этиш бўйича лойиҳани, шунингдек, “ОНА” жамоат фонди томонидан молиялаштирилган 300 миллион сўмлик тозаланган ичимлик суви иншоотини қуриш бўйича грант маблағини ютиб олишди. Айни пайтда ҳудудда боғ барпо этиш ишлари бошланиш арафасида. “ОНА” жамоат фондининг грант маблағи ҳисобидан қурилиб. фойдаланишга топширилган тозаланган ичимлик суви иншооти эса Жумур овулликларга беминнат хизмат кўрсатмоқда.

Жумур овул азалдан фидойи меҳнаткаш инсонлар ва тадбиркорлар юрти. Маҳаллада ўз томорқа ерини чинакам зироатчилик фабрикасига ва мўл даромад манбаига айлантириб, оиласига фаровонлик олиб кираётган, тадбиркорлик йўналишида муваффақиятларга эришаётганлар талайгина.

Бу борада маҳаллада фаолият олиб борувчи ҳоким ёрдамчиси томонидан амалга оширилаётган кенг кўламли ишлар эътиборга муносиб. Айниқса, ўзини-ўзи банд қилиш тамойили асосида тадбиркорлик фаолиятини бошлаш истагида бўлган фуқароларнинг ҳоким ёрдамчиси томонидан қўллаб-қувватланиши боис, ишсизлик билан боғлиқ муаммолар самарали ҳал этилмоқда.

Маҳаллада яшовчи Неъматжон Болтабоев ҳоким ёрдамчисига мурожаат қилмасидан аввал ишсиз, доимий даромад манбаига эга эмас эди. У ҳоким ёрдамчисининг кўмаги, қолаверса, “Маҳалла еттилиги” аъзоларининг қўллаб-қувватлашлари туфайли 100 миллион сўмлик имтиёзли кредит маблағи эвазига шлакоблок ишлаб чиқариш цехи ва гилам ювиш хизмати фаолиятини йўлга қўйди. Айни пайтда Неъматжон Болтабоев ўзининг ва оила аъзоларининг бандлиги таъминланганидан, доимий даромад манбаига эга бўлиб, маҳалладошлари манфаати йўлида хизмат қилаётганидан мамнун.

Шунингдек, ҳудудда фаолият олиб борувчи “Досан Мурод” МЧЖ томонидан ғишт ишлаб чиқариш цехининг фаолияти йўлга қўйилиши туфайли 15 нафар Жумур овуллик ёшларнинг бандлиги таъминланди.

Ёш тадбиркор Хушнуд Ўринбоев ҳам ҳоким ёрдамчисининг қўллаб-қувватлаши туфайли имтиёзли кредит олиб, автомобилларга хизмат кўрсатиш йўналишида ўз бизнесини бошлади. У автомобилларни ювиш шохобчаси фаолиятини йўлга қўйди ва ўзи билан яна 2 нафар оила аъзосининг бандлигини таъминлашга муваффақ бўлди.

Бугунги кунда Жумур овул маҳалласида балиқчилик соҳасини ривожлантиришга қаратилган саъй-ҳаракатлар туфайли 10 та тадбиркорлик субъекти фаолияти йўлга қўйилган. Хотин-қизларнинг ижтимоий фаоллигини оширишга қаратилган чора-тадбирлар натижасида Мақсуда Авазимбетова ҳамда Гулнозахон Камоловаларга субсидия асосида замонавий тикув машиналари олиб берилди. Иккала аёл-қиз ҳам айни пайтда ўзларининг чеварлик фаолиятларини бошлаб, доимий даромад манбаига эга бўлишди.

“Маҳалла еттилиги”нинг биргаликдаги саъй-ҳаракатлари боис, 40 нафар ишсиз ёшларга деҳқончилик қилишлари учун ер майдонлари ажратиб берилди, шу билан бирга ўзини-ўзи банд қилиш тамойили асосида ёшлар етакчиси томонидан шакллантирилган рўйхатга мувофиқ бир гуруҳ ёшларга субсидия асосида мотокультиватор агрегатлари, тикув машиналари, пайвандлаш ускуналари, ноутбуклар олиб берилиб, бандлиги таъминланди.

Айни кунларда Жумур овулликлар ҳудуддаги фермер хўжаликлари томонидан етиштирилган пахта ҳосилини йиғиб-териб олишда пахтакор деҳқонларга яқиндан ёрдам бериш орқали қўшимча даромад топишмоқда. Маҳалладаги вақтинча ишсиз фуқаролар, уюшмаган ёшлар, ҳатто эл-юрт манфаатига ўзларини дахлдор деб билган нуроний отахон ва онахонлар ҳам кўнгилли равишда пахта йиғим-теримида деҳқонларга қўл-қанот бўлишмоқда. Ахир халқимиз бекорга “Ҳашар – элга ярашар” деган ҳикматни яратмаган.

Бугун Жумур овулликлар ҳашар баҳона мўл-кўл даромад топаётганларини ҳисобга олсак, пахтадан келадиган маблағ нафақат пахтакор деҳқонларнинг, балки ҳар бир Жумур овулликнинг оиласига фаровонлик, тўкин-сочинлик олиб киради. Кўнгилли ҳашарчиларнинг терган ҳар бир килограмм пахтаси учун фермерлар тарози бошидаёқ ҳисоб-китоб қилиб бораётганларидан маҳалла аҳли мамнун.

Биз ижодий жамоамиз билан гувоҳ бўлганимиз – кундан-кунга тобора ободон ва фаровон, кўкаламзор гўшага айланиб бораётган Жумур овул маҳалласидаги ўзгаришларда, янгиланишларда, албатта, элим, юртим, деган маҳалла аҳлининг жуда катта ҳиссаси бор.

Робия Йўлдошева.