Jumur ovulda "Mahalla yettiligi" samarali faoliyat yuritmoqda

Amudaryo tumanidagi Jumurovul mahallasi infratuzilmasi jadal rivojlanayotgan hududlardan biri sanaladi. 765ta xonadonlardagi 1255ta oilalarda istiqomat qilayotgan aholi hayotini yaxshilash, turmush farovonligini oshirishga qaratilgan chora-tadbirlar ijrosini taʼminlashda “Mahalla yettiligi”ning oʻzaro hamkorligi muhim ahamiyat kasb etmoqda.

Xususan, hududni obodonlashtirish va koʻkalamzor goʻshaga aylantirish, kam taʼminlangan, ehtiyojmand oilalarni ijtimoiy qoʻllab-quvvatlash, aholi, ayniqsa, uyushmagan yoshlarning ish bilan bandligini taʼminlash, yangi tadbirkorlik subʼektlarini tashkil etish, oilaviy va yakka tadbirkorlik faoliyati bilan shugʻullanuvchi fuqarolarni qoʻllab-quvvatlashga qaratilgan chora-tadbirlar tufayli aholining turmush tarzi kun sayin yaxshilanib bormoqda. “Mahalla yettiligi”ning saʼy-harakatlari bilan faqat joriy yilning oʻzida aholining elektr energiyasiga boʻlgan talabini toʻliq qondirish maqsadida 5 ta aholi punktining har biriga bittadan, 5 ta yangi transformator oʻrnatildi. Aholi serqatnov boʻlgan Abdurauf Fitrat nomli, Daryolik, Shijoatli va Mangʻitovul koʻchalariga huquqbuzarliklarning oldini olish maqsadida kuzatuv kameralari va MFY maʼmuriy binosiga 5 kilovatt quvvatga ega quyosh paneli oʻrnatildi.

Uyushmagan yoshlarni sportga keng jalb qilish, oʻquvchi-yoshlarning darsdan boʻsh vaqtlarini mazmunli oʻtkazishlarini taʼminlash maqsadida “Open budget” dasturi doirasida sunʼiy qoplamali sport maydonchasi qurilib, foydalanishga topshirildi. “Mening yoʻlim” dasturi asosida Shijoatli koʻchasining 1600 metr qismiga asfalt qoplamasi yotqizildi.

Mahalla ahlining oʻzaro ahilligi va hamjihatligi, qolaversa, “Mahalla yettiligi” aʼzolarining hamkorlikdagi saʼy-harakatlari bois Jumur ovulliklar “Mening bogʻim” dasturi asosida 3 gektar maydonda bogʻ barpo etish boʻyicha loyihani, shuningdek, “ONA” jamoat fondi tomonidan moliyalashtirilgan 300 million soʻmlik tozalangan ichimlik suvi inshootini qurish boʻyicha grant mablagʻini yutib olishdi. Ayni paytda hududda bogʻ barpo etish ishlari boshlanish arafasida. “ONA” jamoat fondining grant mablagʻi hisobidan qurilib. foydalanishga topshirilgan tozalangan ichimlik suvi inshooti esa Jumur ovulliklarga beminnat xizmat koʻrsatmoqda.

Jumur ovul azaldan fidoyi mehnatkash insonlar va tadbirkorlar yurti. Mahallada oʻz tomorqa yerini chinakam ziroatchilik fabrikasiga va moʻl daromad manbaiga aylantirib, oilasiga farovonlik olib kirayotgan, tadbirkorlik yoʻnalishida muvaffaqiyatlarga erishayotganlar talaygina.

Bu borada mahallada faoliyat olib boruvchi hokim yordamchisi tomonidan amalga oshirilayotgan keng koʻlamli ishlar eʼtiborga munosib. Ayniqsa, oʻzini-oʻzi band qilish tamoyili asosida tadbirkorlik faoliyatini boshlash istagida boʻlgan fuqarolarning hokim yordamchisi tomonidan qoʻllab-quvvatlanishi bois, ishsizlik bilan bogʻliq muammolar samarali hal etilmoqda.

Mahallada yashovchi Neʼmatjon Boltaboyev hokim yordamchisiga murojaat qilmasidan avval ishsiz, doimiy daromad manbaiga ega emas edi. U hokim yordamchisining koʻmagi, qolaversa, “Mahalla yettiligi” aʼzolarining qoʻllab-quvvatlashlari tufayli 100 million soʻmlik imtiyozli kredit mablagʻi evaziga shlakoblok ishlab chiqarish tsexi va gilam yuvish xizmati faoliyatini yoʻlga qoʻydi. Ayni paytda Neʼmatjon Boltaboyev oʻzining va oila aʼzolarining bandligi taʼminlanganidan, doimiy daromad manbaiga ega boʻlib, mahalladoshlari manfaati yoʻlida xizmat qilayotganidan mamnun.

Shuningdek, hududda faoliyat olib boruvchi “Dosan Murod” MChJ tomonidan gʻisht ishlab chiqarish tsexining faoliyati yoʻlga qoʻyilishi tufayli 15 nafar Jumur ovullik yoshlarning bandligi taʼminlandi.

Yosh tadbirkor Xushnud Oʻrinboyev ham hokim yordamchisining qoʻllab-quvvatlashi tufayli imtiyozli kredit olib, avtomobillarga xizmat koʻrsatish yoʻnalishida oʻz biznesini boshladi. U avtomobillarni yuvish shoxobchasi faoliyatini yoʻlga qoʻydi va oʻzi bilan yana 2 nafar oila aʼzosining bandligini taʼminlashga muvaffaq boʻldi.

Bugungi kunda Jumur ovul mahallasida baliqchilik sohasini rivojlantirishga qaratilgan saʼy-harakatlar tufayli 10 ta tadbirkorlik subʼekti faoliyati yoʻlga qoʻyilgan. Xotin-qizlarning ijtimoiy faolligini oshirishga qaratilgan chora-tadbirlar natijasida Maqsuda Avazimbetova hamda Gulnozaxon Kamolovalarga subsidiya asosida zamonaviy tikuv mashinalari olib berildi. Ikkala ayol-qiz ham ayni paytda oʻzlarining chevarlik faoliyatlarini boshlab, doimiy daromad manbaiga ega boʻlishdi.

“Mahalla yettiligi”ning birgalikdagi saʼy-harakatlari bois, 40 nafar ishsiz yoshlarga dehqonchilik qilishlari uchun yer maydonlari ajratib berildi, shu bilan birga oʻzini-oʻzi band qilish tamoyili asosida yoshlar yetakchisi tomonidan shakllantirilgan roʻyxatga muvofiq bir guruh yoshlarga subsidiya asosida motokultivator agregatlari, tikuv mashinalari, payvandlash uskunalari, noutbuklar olib berilib, bandligi taʼminlandi.

Ayni kunlarda Jumur ovulliklar hududdagi fermer xoʻjaliklari tomonidan yetishtirilgan paxta hosilini yigʻib-terib olishda paxtakor dehqonlarga yaqindan yordam berish orqali qoʻshimcha daromad topishmoqda. Mahalladagi vaqtincha ishsiz fuqarolar, uyushmagan yoshlar, hatto el-yurt manfaatiga oʻzlarini daxldor deb bilgan nuroniy otaxon va onaxonlar ham koʻngilli ravishda paxta yigʻim-terimida dehqonlarga qoʻl-qanot boʻlishmoqda. Axir xalqimiz bekorga “Hashar – elga yarashar” degan hikmatni yaratmagan.

Bugun Jumur ovulliklar hashar bahona moʻl-koʻl daromad topayotganlarini hisobga olsak, paxtadan keladigan mablagʻ nafaqat paxtakor dehqonlarning, balki har bir Jumur ovullikning oilasiga farovonlik, toʻkin-sochinlik olib kiradi. Koʻngilli hasharchilarning tergan har bir kilogramm paxtasi uchun fermerlar tarozi boshidayoq hisob-kitob qilib borayotganlaridan mahalla ahli mamnun.

Biz ijodiy jamoamiz bilan guvoh boʻlganimiz – kundan-kunga tobora obodon va farovon, koʻkalamzor goʻshaga aylanib borayotgan Jumur ovul mahallasidagi oʻzgarishlarda, yangilanishlarda, albatta, elim, yurtim, degan mahalla ahlining juda katta hissasi bor.

Robiya Yoʻldosheva.