Ijtimoiy reyestrga kiritilgan oilalarning muammolari manzilli oʻrganildi

Inson qadri, uning munosib hayot kechirishi, oilalar farovonligi va yoshlarning kelajakka ishonchi — jamiyat taraqqiyotini belgilovchi muhim mezonlardan. Shu bois bugungi kunda mamlakatimizda ijtimoiy himoyaga muhtoj oilalarni qoʻllab-quvvatlash, ularni kambagʻallikdan chiqarish, bandligini taʼminlash va daromad manbalarini shakllantirish masalalariga alohida eʼtibor qaratilmoqda.

Bu boradagi ishlarning amaliy ifodasi sifatida Qoraqalpogʻiston Respublikasi prokurori Shohrux Aminov tomonidan Amudaryo tumanidagi Choykoʻl ovuli hududida ijtimoiy reyestrga kiritilgan oilalar holidan xabar olindi. Oʻrganish jarayonida tuman hokimi Sobir Xoʻjametov boshchiligidagi tuman masʼullari ishtirok etishdi.

Mazkur jarayonda xonadonlarning ijtimoiy sharoiti, oilalarning ehtiyojlari va ularni qiynayotgan muammolar bevosita joyiga chiqqan holda oʻrganildi. Oʻrganishlar davomida ijtimoiy reyestrga kiritilgan oilalarning mavjud muammo va ehtiyojlari birma-bir aniqlab olindi.

Oilalarning turmush sharoiti, daromad manbalari, mehnatga layoqatli aʼzolarining bandligi hamda qoʻshimcha daromad topish imkoniyatlari atroflicha tahlil qilindi.

Eng muhimi, aniqlangan muammolarni shunchaki qayd etish bilan cheklanib qolmasdan, ularni joyida hal etish, oila aʼzolarini ish bilan taʼminlash, yangi daromad manbalarini shakllantirish va oilalarni kambagʻallikdan chiqarish boʻyicha aniq chora-tadbirlar belgilandi. Bu esa bugungi ijtimoiy siyosatning mohiyatini — insonni faqat moddiy jihatdan qoʻllab-quvvatlash emas, balki unga mustaqil daromad topish, oʻz imkoniyatlarini roʻyobga chiqarish va oilasi farovonligini oʻz mehnati bilan taʼminlash uchun sharoit yaratish tamoyilini yaqqol namoyon etadi.

Darhaqiqat, kambagʻallikni qisqa muddatli yordam bilangina yengib boʻlmaydi. Buning uchun oilada barqaror daromad manbaini yaratish, mehnatga layoqatli fuqarolarni ish bilan taʼminlash, ularni tadbirkorlikka jalb etish va zarur hollarda kasb-hunarga oʻqitish muhim ahamiyatga ega.

Tashrif davomida mahalladagi yoshlar bilan ham uchrashuv tashkil etilib, ularning fikr-mulohazalari, muammo va takliflari tinglandi. Bugun yoshlar bilan ochiq muloqot qilish, ularning tashabbuslarini qoʻllab-quvvatlash va bandligini taʼminlash har qachongidan ham muhim. Chunki har bir yoshning qoʻlida kasb, qalbida maqsad va hayotida munosib daromad manbai boʻlsa, u nafaqat oʻz kelajagini, balki oilasi va jamiyatining ertangi kunini ham barpo etadi.

Uchrashuvda yoshlarning bandligini taʼminlash, ularni zamonaviy va talab yuqori boʻlgan kasb-hunarlarga oʻqitish, tadbirkorlik faoliyatiga yoʻnaltirish hamda munosib daromad topishi uchun zarur imkoniyatlarni yaratish masalalariga alohida eʼtibor qaratildi.

Yoshlarning bildirgan taklif va murojaatlari yuzasidan masʼullarga tegishli topshiriqlar berilib, ularning ijrosini taʼminlash boʻyicha vazifalar belgilab olindi.

Har bir xonadonga kirib borish, oilaning sharoitini oʻrganish, odamlarni qiynayotgan muammolarni oʻz ogʻzidan eshitish va ularning imkoniyatlarini hisobga olgan holda aniq yechim topish — samarali ijtimoiy siyosatning muhim shartidir. Zero, har bir oilaning farovonligi — mahalla farovonligi, har bir yoshning kelajakka ishonchi esa jamiyatning ertangi kuniga boʻlgan ishonchidir.

Charos Arslonova, tuman hokimligining Axborot xizmati rahbari.