Muddatli harbiy xizmatga chiqiriluvchilarni saralash tadbirlari boshlandi

Vatan himoyasi – har bir yigitning muqaddas burchi va sharafli vazifasidir. Bugungi kunda mamlakatimiz Qurolli Kuchlari saflarini jismonan sogʻlom, maʼnan yetuk va bilimli yoshlar bilan toʻldirish masalasiga alohida eʼtibor qaratilmoqda. Shu maqsadda joylarda chaqiruv yoshidagi fuqarolarni muddatli harbiy xizmatga tayyorlash va ularni saralash ishlari qizgʻin koʻrinishda tashkil etilmoqda.

Xususan, Amudaryo tumani hududida yashovchi 2000 hamda 2009-yillar oraligʻida tugʻilgan oʻgʻil bolalar uchun muddatli harbiy xizmatga chaqiruv tadbirlariga tayyorgarlik jarayonlari allaqachon boshlab yuborilgan. Dastlabki bosqichda yigitlarning salomatligini nazoratdan oʻtkazish maqsadida chuqurlashtirilgan tibbiy koʻriklar hamda harbiy xizmatning mohiyatini tushuntirishga qaratilgan keng qamrovli targʻibot va tashviqot tadbirlari tashkil etilmoqda. Tibbiy tekshiruvlar orqali har bir nomzodning sogʻligʻidagi oʻzgarishlar diqqat bilan oʻrganilib, ularning jismoniy va ruhiy holatiga alohida eʼtibor qaratilmoqda.

Mazkur jarayonlarning uzviy davomi sifatida 10-avgustdan boshlab oldindan tasdiqlangan jadval asosida chaqiruv yoshidagi fuqarolarni saralash va tanlov tadbirlari yuqori saviyada oʻtkazilmoqda. Ushbu sinovlar orqali yigitlarning nafaqat salomatligi, balki umumiy jismoniy tayyorgarligi ham jiddiy koʻzdan kechiriladi. Tanlov davomida chaqiriluvchilar bir qator jismoniy mashqlar boʻyicha oʻz kuch va imkoniyatlarini namoyish etishlari talab etiladi. Xususan, umumjismoniy tayyorgarlik normativlari doirasida nomzodlar turnikka tortinish, 100 metrga yugurish hamda 3000 metrga yugurish kabi majburiy shartlarni bajarishlari lozim. Belgilangan qatʼiy talablarga koʻra, yigitlar turnikka kamida 7 marotaba tortinishlari shart. Shuningdek, tezlikni aniqlovchi 100 metrga yugurish mashqini maksimal 15,4-soniya ichida bosib oʻtish talab etilsa, chidamlilikni sinovdan oʻtkazuvchi 3000 metrga yugurish mashqini 14 yarim daqiqa davomida yakunlash lozim boʻladi. Bu normativlar faqatgina raqamlardan iborat emas, balki boʻlajak askarlarning harbiy sharoitlarga qanchalik tayyor ekanligini koʻrsatuvchi muhim mezondir.

Ushbu masʼuliyatli tanlov tadbirlari Oʻzbekiston Respublikasi Qurolli Kuchlari saflarini har tomonlama bilimli, maʼnaviy-axloqiy jihatdan yetuk, vatanparvar va jismonan barkamol yoshlar bilan toʻldirish maqsadida amalga oshirilmoqda. Armiya saflarida xizmat qilish yoshlar uchun faqatgina jismoniy chiniqish emas, balki kuchli iroda, qatʼiyat va yuksak intizomni shakllantiruvchi katta hayot maktabi hisoblanadi. Belgilangan normativlarni muvaffaqiyatli topshirgan va tibbiy koʻriklar natijalariga koʻra harbiy xizmatga toʻliq yaroqli deb topilgan nomzodlar birinchi navbatda Oʻzbekiston Respublikasi Qurolli Kuchlari safiga qabul qilish uchun tavsiya etiladi. Shu bilan birga, ushbu yoshlar harbiy-texnik mutaxassisliklari boʻyicha qoʻshimcha tayyorgarlik kurslariga ham jalb etilishi koʻzda tutilgan. Bu esa oʻz navbatida, milliy armiyamizning jangovar salohiyatini oshirishga xizmat qiladigan yetuk malakali mutaxassislarni yetishtirib chiqarishga mustahkam zamin yaratadi.

Fursatdan foydalanib Amudaryo tumanidagi chaqiruv yoshidagi barcha fuqarolarni ushbu saralash va tanlov tadbirlarida faol ishtirok etishga chaqiramiz. Vatan himoyachisi boʻlishdek sharafli nomga munosib boʻlish uchun har bir yigit oʻzining jismoniy va maʼnaviy salohiyatini oshirib borishi, bugungi kundagi imkoniyatlardan oqilona foydalanishi zarur. Zero, yurt tinchligi va chegaralarimiz daxlsizligi aynan mana shunday kuchli, sogʻlom va chinakam vatanparvar yoshlar qoʻlidadir.