Yoshlar bilan uchrashuv: sport, taʼlim va yangi imkoniyatlar

Yoshlar — jamiyatning ertangi kuni, yurt taraqqiyotining eng katta harakatlantiruvchi kuchidir. Ularning bilim olishi, kasb-hunar egallashi, sport bilan muntazam shugʻullanishi va oʻz isteʼdodini namoyon etishi uchun zarur sharoit yaratish bugungi kunning muhim vazifalaridan biridir. Payshanba — Yoshlar kuni munosabati bilan Amudaryo tumani hokimi Sobir Xoʻjametov boshchiligidagi masʼullar tomonidan Toʻlqin ovulida yoshlar bilan oʻtkazilgan uchrashuv ayni maqsadlarga qaratilgani bilan ahamiyatli boʻldi.

Uchrashuv davomida yoshlarning taʼlim olishi, sport bilan shugʻullanishi, boʻsh vaqtini mazmunli tashkil etishi, iqtidor va tashabbuslarini qoʻllab-quvvatlash, ular uchun yangi imkoniyatlar yaratish masalalari atroflicha muhokama qilindi.

Tashrif 33-sonli umumtaʼlim maktabidagi sharoitlar bilan tanishishdan boshlandi. Bu yerda yangi oʻquv yiliga tayyorgarlik jarayonlari, oʻquv xonalarining holati, mavjud infratuzilma, sport inshootlari hamda oʻquvchilar uchun yaratilayotgan imkoniyatlar koʻzdan kechirildi.

Bugun taʼlimga yaratilayotgan har qanday imkoniyat ertangi kun uchun kiritilgan sarmoyadir. Shu bois maktablarda oʻquvchilar bilimini oshirish bilan bir qatorda, ularning qiziqish va qobiliyatlarini aniqlash, boʻsh vaqtini mazmunli tashkil etish ham dolzarb vazifa boʻlib qolmoqda.

Uchrashuvda maktabda faoliyat yuritayotgan basketbol toʻgaragiga ham alohida eʼtibor qaratildi. Basketbol maydonida shugʻullanayotgan yoshlarning ishtiyoqi, jamoaviy harakatlari va sportga boʻlgan qiziqishi bunday mashgʻulotlar yoshlar hayotida naqadar muhim oʻrin tutayotganini koʻrsatdi. Zero, sport bilan band boʻlgan yoshning vaqti mazmunli oʻtadi, unda intizom, iroda, masʼuliyat va gʻalabaga intilish kabi fazilatlar shakllanadi.

Shu jihatdan ham, hududlarda turli sport toʻgaraklarini koʻpaytirish, yoshlarning qiziqishidan kelib chiqib ular uchun zarur sharoitlarni yaratish nafaqat sportni rivojlantirish, balki barkamol avlodni tarbiyalashning muhim yoʻnalishlaridan biri.

Tashrif doirasida mahalla hududida faoliyat yuritayotgan boks sport maktabi faoliyati ham koʻzdan kechirildi. Bu yerda muntazam shugʻullanayotgan yosh sportchilar bilan samimiy muloqot oʻtkazilib, ularning mashgʻulotlari, erishayotgan natijalari va kelgusidagi maqsadlari oʻrganildi.

Boks — yosh sportchidan nafaqat jismoniy kuch, balki qatʼiyat, sabr-toqat, oʻzini boshqara bilish va kuchli iroda talab qiladigan sport turi. Ringda har bir jang sportchining mahorati bilan birga uning ruhiy tayyorgarligini ham sinovdan oʻtkazadi. Shu bois boks bilan shugʻullanayotgan yoshlarning har bir yutugʻi ortida mashaqqatli mehnat va tinimsiz izlanish mujassam.

Tashrif doirasida boks boʻyicha “Mustaqillik kubogi” musobaqalari ham tashkil etildi. Unda yosh bokschilar oʻz mahorat va irodalarini namoyish etib, gʻoliblik uchun murosasiz bahslarga kirishdilar. Musobaqa yoshlar oʻrtasida sogʻlom raqobat muhitini shakllantirish, iqtidorli sportchilarni aniqlash va ularni yanada katta marralar sari ruhlantirishga xizmat qildi.

Taʼkidlash joizki, bugun yoshlar faqatgina eʼtibor va imkoniyat kutayotgan qatlam emas. Ular oʻz gʻoyalariga, tashabbuslariga va aniq maqsadlariga ega boʻlgan faol avloddir. Muhimi, ana shu tashabbuslarni eshitish, qoʻllab-quvvatlash va ularni amaliy loyihalarga aylantirish uchun imkoniyat yaratishdir. Yoshlar uchun yaratilgan har bir imkoniyat — kelajak uchun qoʻyilgan mustahkam poydevordir.

Charos Arslonova, tuman hokimligining Axborot xizmati rahbari.