Мунтазам равишда йўл ҳаракати қоидабузарликларини содир этишнинг салбий оқибатлари ҳақида тушунтириш ишлари олиб борилди

Сўнгги йилларда халқимизнинг турмуш фаровонлиги ошиб, йиллар давомида кўнгилларига тугиб қўйган орзулари рўёбга чиқмоқда. Айни пайтда ҳар икки хонадоннинг бирида турли русумдаги автомобиллар бор. Ҳатто айрим хонадонларда икки-учтадан автомобиль мавжудлигини ҳисобга олсак, оддий тил билан айтганда, йўл тўла машина. Бу қувонарли, албатта, шу билан бирга, автомобиль эгалари учун катта масъулият ҳам деганидир.

Автомобиль бошқариб кўчага чиққан ҳайдовчи билан бир қаторда оддий йўловчи ҳам йўлларда ҳаракатланиш маданияти ва қоидаларига пухта амал қилиши, йўл ҳаракати билан боғлиқ нохуш ҳолатлар содир бўлишининг олдини олишда ўзини масъул деб билиши зарур ва шарт. Чунки ҳайдовчининг ва йўловчининг салгина қалтис ҳаракати, бепарволиги тузатиб бўлмас оғир оқибатларга олиб келиши мумкин.

Амударё туман Ички ишлар бўлими маъмурияти йўл-патруль хизмати ходимлари билан биргаликда аҳоли вакиллари ҳамда автотранспорт воситалари ҳайдовчилари иштирокида доимий равишда йўл ҳаракати хавфсизлигини таъминлашга қаратилган тарғибот тадбирлари ва тушунтириш ишларини олиб боришмоқда. Айниқса, мунтазам равишда йўл ҳаракати қоидабузарликларини содир этишнинг салбий оқибатлари бўйича ўтказилаётган профилактик тадбирлар ва тушунтириш ишлари бу борада муҳим аҳамият касб этмоқда.

Жорий йилнинг 31октябрь санасида Амударё тумани Ички ишлар бўлими биноси олдида бўлиб ўтган навбатдаги тарғибот тадбирида ҳам ҳайдовчиларнинг мунтазам равишда йўл ҳаракати қоидабузарликларини содир этишининг салбий оқибатлари бўйича тушунтириш ишлари олиб борилди.

Учрашувда иштирокчиларга йўлларда ҳаракатланиш маданияти ва сўнгги йилларда тизимда амалиётга жорий этилган янгиликлар ҳамда ўзгаришлар бўйича зарур тушунчалар берилди. Тадбирда Қорақалпоғистон Республикаси Ички ишлар Вазирлигининг Жамоат хавфсизлиги хизмати Йўл ҳаракати хавфсизлиги бошқармаси бошлиғи ўринбосари, капитан Тимур Ибрагимов, Амударё тумани Ички ишлар бўлими бошлиғи, подполковник Мухаметали Хожамуратов, Қорақалпоғистон Республикаси Ички ишлар Вазирлиги Минтақавий ҳудуд бошлиғининг ўринбосари Мурат Дарибаев, Амударё тумани Ички ишлар бўлими Жамоат хавфсизлиги хизмати Йўл ҳаракати хавфсизлиги бўлими бошлиғи, лейтенант Анвар Юсуповлар иштирок этишди.

Масъуллар таъкидлаганидек, баъзи ҳайдовчилар йўл ҳаракати қоидаларига беписандлик билан қараб, мунтазам равишда қоидабузарликлар содир қилиб келади. Қўлланилган жарималар ҳайдовчининг ўзига моддий зарар келтиришидан ташқари бошқа ижтимоий оқибатларга ҳам олиб келиши мумкин. Масалан, биргина тезликни белгиланган меъёрдан ошириш оқибатида ҳайдовчи фақат жарима тўлаб қолмасдан, автомашинани юқори тезликда бошқаришга ўрганиб қолиши мумкин. “Кўза кунда эмас, кунида синади” деганларидек, бу ҳолат бир куни оғир йўл-транспорт ҳодисасига олиб келиши мумкин.

Йиғилишда ҳайдовчилар билан алоҳида суҳбатлар ўтказишиб, ҳаракат хавфсизлиги билан боғлиқ муҳим масалалар бўйича зурур тушунча ва тавсиялар, маълумотлар бердилар. Хусусан, тезликни белгиланган меъёрдан ошириш, рухсат этилмаган ҳудудларда белгиланган қоидаларга хилоф тарзда юқори тезликда ҳаракатланиш ҳайдовчи учун ҳам, йўловчи учун ҳам бирдай оғир оқибатларга олиб келиши ҳақида батафсил маълумотлар берилди. Ўз навбатида тадбир иштирокчилари масъулларга ўзларини қизиқтирган саволлар билан мурожаат қилдилар.

Йўл – тасодифларга тўла. Халқимиз бекорга “Йўл қоидаси – умр фойдаси” дейишмаган. Нафақат ҳайдовчи, балки йўловчилар ҳам йўлларда ҳаракатланиш қоидаларига амал қилсалар, бу – энг аввало, жамиятимизнинг осойишталиги, инсонларнинг хотиржамлиги, бундан ҳам муҳими, саломатлик ва умримиз бардавомлиги кафолатидир. Шу боис, мазкур тадбирда иштирок этган масъуллар ҳайдовчиларни ҳамда туманимиз фуқароларини йўлларда ҳаракатланиш маданиятига, йўл ҳаракати қоидаларига амал қилишга ва доимий огоҳликка чақирдилар.

 Робия Йўлдошева