Muntazam ravishda yoʻl harakati qoidabuzarliklarini sodir etishning salbiy oqibatlari haqida tushuntirish ishlari olib borildi

Soʻnggi yillarda xalqimizning turmush farovonligi oshib, yillar davomida koʻngillariga tugib qoʻygan orzulari roʻyobga chiqmoqda. Ayni paytda har ikki xonadonning birida turli rusumdagi avtomobillar bor. Hatto ayrim xonadonlarda ikki-uchtadan avtomobil mavjudligini hisobga olsak, oddiy til bilan aytganda, yoʻl toʻla mashina. Bu quvonarli, albatta, shu bilan birga, avtomobil egalari uchun katta masʼuliyat ham deganidir.

Avtomobil boshqarib koʻchaga chiqqan haydovchi bilan bir qatorda oddiy yoʻlovchi ham yoʻllarda harakatlanish madaniyati va qoidalariga puxta amal qilishi, yoʻl harakati bilan bogʻliq noxush holatlar sodir boʻlishining oldini olishda oʻzini masʼul deb bilishi zarur va shart. Chunki haydovchining va yoʻlovchining salgina qaltis harakati, beparvoligi tuzatib boʻlmas ogʻir oqibatlarga olib kelishi mumkin.

Amudaryo tuman Ichki ishlar boʻlimi maʼmuriyati yoʻl-patrul xizmati xodimlari bilan birgalikda aholi vakillari hamda avtotransport vositalari haydovchilari ishtirokida doimiy ravishda yoʻl harakati xavfsizligini taʼminlashga qaratilgan targʻibot tadbirlari va tushuntirish ishlarini olib borishmoqda. Ayniqsa, muntazam ravishda yoʻl harakati qoidabuzarliklarini sodir etishning salbiy oqibatlari boʻyicha oʻtkazilayotgan profilaktik tadbirlar va tushuntirish ishlari bu borada muhim ahamiyat kasb etmoqda.

Joriy yilning 31oktyabr sanasida Amudaryo tumani Ichki ishlar boʻlimi binosi oldida boʻlib oʻtgan navbatdagi targʻibot tadbirida ham haydovchilarning muntazam ravishda yoʻl harakati qoidabuzarliklarini sodir etishining salbiy oqibatlari boʻyicha tushuntirish ishlari olib borildi.

Uchrashuvda ishtirokchilarga yoʻllarda harakatlanish madaniyati va soʻnggi yillarda tizimda amaliyotga joriy etilgan yangiliklar hamda oʻzgarishlar boʻyicha zarur tushunchalar berildi. Tadbirda Qoraqalpogʻiston Respublikasi Ichki ishlar Vazirligining Jamoat xavfsizligi xizmati Yoʻl harakati xavfsizligi boshqarmasi boshligʻi oʻrinbosari, kapitan Timur Ibragimov, Amudaryo tumani Ichki ishlar boʻlimi boshligʻi, podpolkovnik Muxametali Xojamuratov, Qoraqalpogʻiston Respublikasi Ichki ishlar Vazirligi Mintaqaviy hudud boshligʻining oʻrinbosari Murat Daribayev, Amudaryo tumani Ichki ishlar boʻlimi Jamoat xavfsizligi xizmati Yoʻl harakati xavfsizligi boʻlimi boshligʻi, leytenant Anvar Yusupovlar ishtirok etishdi.

Masʼullar taʼkidlaganidek, baʼzi haydovchilar yoʻl harakati qoidalariga bepisandlik bilan qarab, muntazam ravishda qoidabuzarliklar sodir qilib keladi. Qoʻllanilgan jarimalar haydovchining oʻziga moddiy zarar keltirishidan tashqari boshqa ijtimoiy oqibatlarga ham olib kelishi mumkin. Masalan, birgina tezlikni belgilangan meʼyordan oshirish oqibatida haydovchi faqat jarima toʻlab qolmasdan, avtomashinani yuqori tezlikda boshqarishga oʻrganib qolishi mumkin. “Koʻza kunda emas, kunida sinadi” deganlaridek, bu holat bir kuni ogʻir yoʻl-transport hodisasiga olib kelishi mumkin.

Yigʻilishda haydovchilar bilan alohida suhbatlar oʻtkazishib, harakat xavfsizligi bilan bogʻliq muhim masalalar boʻyicha zurur tushuncha va tavsiyalar, maʼlumotlar berdilar. Xususan, tezlikni belgilangan meʼyordan oshirish, ruxsat etilmagan hududlarda belgilangan qoidalarga xilof tarzda yuqori tezlikda harakatlanish haydovchi uchun ham, yoʻlovchi uchun ham birday ogʻir oqibatlarga olib kelishi haqida batafsil maʼlumotlar berildi. Oʻz navbatida tadbir ishtirokchilari masʼullarga oʻzlarini qiziqtirgan savollar bilan murojaat qildilar.

Yoʻl – tasodiflarga toʻla. Xalqimiz bekorga “Yoʻl qoidasi – umr foydasi” deyishmagan. Nafaqat haydovchi, balki yoʻlovchilar ham yoʻllarda harakatlanish qoidalariga amal qilsalar, bu – eng avvalo, jamiyatimizning osoyishtaligi, insonlarning xotirjamligi, bundan ham muhimi, salomatlik va umrimiz bardavomligi kafolatidir. Shu bois, mazkur tadbirda ishtirok etgan masʼullar haydovchilarni hamda tumanimiz fuqarolarini yoʻllarda harakatlanish madaniyatiga, yoʻl harakati qoidalariga amal qilishga va doimiy ogohlikka chaqirdilar.

 Robiya Yoʻldosheva