Амударё туманида Ички ишлар органлари ходимлари куни кенг нишонланди

Ҳар бир давлат ва жамиятнинг барқарорлиги ҳамда тараққий этиши кўп жиҳатдан тинчлик ва осойишталикка боғлиқ. Тинчлик жамият аъзоларининг хавфсизлиги, ишончли келажак ва барқарорлик учун асосий омилдир. Жамиятда осойишталик таъминланган ҳолда, ҳар бир шахс ўз истеъдодларини намоён қилишга, тадбиркорлар ишлаб чиқариш фаолиятини юритишга ва ёшлар таълим олишга шижоат билан киришадилар. Бу эса ўз навбатида мамлакат иқтисодиёти ва умумий ривожланишининг асосини ташкил этади.

Ўзбекистонда ҳам тинчлик ва осойишталикни таъминлаш давлат сиёсатининг энг асосий мақсади ва вазифасидир. Ички ишлар органлари тинчлик ва осойишталикни сақлашда муҳим ўрин тутадиган институтлардан бири ҳисобланади. Соҳа ходимларининг асосий вазифаси жамиятда қонун устуворлигини таъминлаш, жиноятчиликнинг олдини олиш ва фуқароларнинг ҳуқуқлари ҳимоя қилишдан иборат. Улар нафақат жиноятларни очиш ва тергов қилиш, балки жамиятда тинчлик ва осойишталикни сақлаш учун жамоатчилик билан ҳамкорлик қилиш, профилактика ишларини амалга оширишда ҳам фаол иштирок этади.

Тинчлигимиз посбонларининг сермашаққат меҳнатларини эътироф этиш мақсадида 2007 йилдан буён ҳар йили 25 октябрь мамлакатимизда Ўзбекистон Республикаси Ички ишлар органлари ходимлари куни сифатида нишонлаб келинади.

Амударё тумани Ички ишлар бўлими ходимлари бу йилги касб байрамларини ҳам меҳнатдаги ютуқлари ва муваффақиятлар билан кенг нишонлашди. Сана муносабати билан Манғит шаҳридаги “Diamond” ресторанида байрам дастурхони ёзилиб, тинчлик посбонларига ҳурмат-эҳтиром кўрсатилди.

Тадбирда туман ҳокими Собир Хўжаметов, секторлар раҳбарлари, Қорақалпоғистон Республикаси Ички ишлар вазирлиги мутасаддилари, туман Ички ишлар бўлими шахсий таркиби, соҳа фахрийлари ва кенг жамоатчилик вакиллари ишитрок этдилар.

Тадбирда сўз олганлар таъкидлаганларидек, Амударё тумани Ички ишлар бўлими ходимлари фуқароларнинг ҳуқуқлари, эркинликлари ва қонуний манфаатларини ҳимоя қилиш, жамоат тартибини сақлаш ва хавфсизлигини таъминлаш, жиноятчилик ва терроризмга, одам савдосига қарши курашиш, ҳуқуқбузарликлар профилактикаси, уларнинг сабабларини ва содир этилишига имкон бераётган шарт-шароитларни аниқлаш ҳамда бартараф этиш борасида самарали ишларни амалга ошириб келмоқдалар.

Ички ишлар бўлими таркибидаги жиноят қидирув, тергов, йўл ҳаракати хавфсизлиги, жамоат тартибини сақлаш, миграция ва фуқароликни расмийлаштириш ва бошқа бўлинмалар ходимлари ўз хизмат вазифаларини аъло даражада бажариб, фуқароларнинг ҳуқуқлари, эркинликлари ва қонуний манфаатларини ҳимоя қилиш, жисмоний ва юридик шахсларнинг мол-мулкини ҳимоя қилиш, қонун устуворлигини, шахс, жамият ва давлат хавфсизлигини таъминлаш йўлида фидойилик билан хизмат қилиб келмоқдалар.

Туманнинг 2-секторига Ички ишлар бўлими бошлиғи раҳбарлик қилиб, халқ билан тизимли, манзилли мулоқотни ўрнатиш, фуқароларнинг ўзини ўзи бошқариш органлари, фуқаролик жамиятининг бошқа институтлари билан яқин ҳамкорликни йўлга қўйиш, аҳолининг муаммоларини ҳал этишга ҳар томонлама кўмаклашиш борасида ҳам ташаббускорлик билан фаолият кўрсатиб келмоқда.

Тадбир давомида соҳа фахрийлари ва фаол ходимлар сўзга чиқиб, сўнгги йилларда мамлакатимизда ички ишлар тизимида бир қатор ислоҳотлар амалга оширилганини, ислоҳотлар натижасида ички ишлар органлари халқчил тузилмага айланганини қайд этиб ўтдилар. Юртимизда жамоатчилик билан яқин ҳамкорликда ишлаш, фуқаролар билан очиқ мулоқот ўрнатиш, уларнинг муаммоларини тинглаш ва ўз вақтида ечим топишга эътибор қаратилаётгани, шу мақсадда аҳоли билан учрашувлар, профилактик тадбирлар ўтказилаётгани ва бу жараён ўзининг ижобий натижаларини бераётгани алоҳида таъкидлаб ўтилди.

Тадбир давомида ўз хизмат вазифаларини бажаришда бошқаларга ўрнак ва намуна бўлган туман Ички ишлар бўлимининг бир гуруҳ ходимларига ташаккурномалар ва эсдалик совғалари топширилди.

Байрам тадбири туман Маданият бўлими санъаткорлари томонидан куйланган қўшиқлар ва ижро этилган рақслар билан янада файзли ўтди.

Чиндан ҳам, давлат ва жамият ривожида тинчлик ва осойишталик ўта муҳим аҳамиятга эга. Ички ишлар органлари ходимлари эса халқимизнинг тинчлиги ва осойишталигини таъминлашда самарали фаолият кўрсатмоқда.

Фурсатдан фойдаланиб, биз ҳам таҳририятимиз номидан тинчлигимиз посбонларини касб байрамлари билан муборакбод этиб, шарафли ва масъулиятли ишларида омад ёр бўлишини тилаб қоламиз.

Таҳририят