Amudaryo tumanida Ichki ishlar organlari xodimlari kuni keng nishonlandi

Har bir davlat va jamiyatning barqarorligi hamda taraqqiy etishi koʻp jihatdan tinchlik va osoyishtalikka bogʻliq. Tinchlik jamiyat aʼzolarining xavfsizligi, ishonchli kelajak va barqarorlik uchun asosiy omildir. Jamiyatda osoyishtalik taʼminlangan holda, har bir shaxs oʻz isteʼdodlarini namoyon qilishga, tadbirkorlar ishlab chiqarish faoliyatini yuritishga va yoshlar taʼlim olishga shijoat bilan kirishadilar. Bu esa oʻz navbatida mamlakat iqtisodiyoti va umumiy rivojlanishining asosini tashkil etadi.

Oʻzbekistonda ham tinchlik va osoyishtalikni taʼminlash davlat siyosatining eng asosiy maqsadi va vazifasidir. Ichki ishlar organlari tinchlik va osoyishtalikni saqlashda muhim oʻrin tutadigan institutlardan biri hisoblanadi. Soha xodimlarining asosiy vazifasi jamiyatda qonun ustuvorligini taʼminlash, jinoyatchilikning oldini olish va fuqarolarning huquqlari himoya qilishdan iborat. Ular nafaqat jinoyatlarni ochish va tergov qilish, balki jamiyatda tinchlik va osoyishtalikni saqlash uchun jamoatchilik bilan hamkorlik qilish, profilaktika ishlarini amalga oshirishda ham faol ishtirok etadi.

Tinchligimiz posbonlarining sermashaqqat mehnatlarini eʼtirof etish maqsadida 2007-yildan buyon har yili 25-oktyabr mamlakatimizda Oʻzbekiston Respublikasi Ichki ishlar organlari xodimlari kuni sifatida nishonlab kelinadi.

Amudaryo tumani Ichki ishlar boʻlimi xodimlari bu yilgi kasb bayramlarini ham mehnatdagi yutuqlari va muvaffaqiyatlar bilan keng nishonlashdi. Sana munosabati bilan Mangʻit shahridagi “Diamond” restoranida bayram dasturxoni yozilib, tinchlik posbonlariga hurmat-ehtirom koʻrsatildi.

Tadbirda tuman hokimi Sobir Xoʻjametov, sektorlar rahbarlari, Qoraqalpogʻiston Respublikasi Ichki ishlar vazirligi mutasaddilari, tuman Ichki ishlar boʻlimi shaxsiy tarkibi, soha faxriylari va keng jamoatchilik vakillari ishitrok etdilar.

Tadbirda soʻz olganlar taʼkidlaganlaridek, Amudaryo tumani Ichki ishlar boʻlimi xodimlari fuqarolarning huquqlari, erkinliklari va qonuniy manfaatlarini himoya qilish, jamoat tartibini saqlash va xavfsizligini taʼminlash, jinoyatchilik va terrorizmga, odam savdosiga qarshi kurashish, huquqbuzarliklar profilaktikasi, ularning sabablarini va sodir etilishiga imkon berayotgan shart-sharoitlarni aniqlash hamda bartaraf etish borasida samarali ishlarni amalga oshirib kelmoqdalar.

Ichki ishlar boʻlimi tarkibidagi jinoyat qidiruv, tergov, yoʻl harakati xavfsizligi, jamoat tartibini saqlash, migratsiya va fuqarolikni rasmiylashtirish va boshqa boʻlinmalar xodimlari oʻz xizmat vazifalarini aʼlo darajada bajarib, fuqarolarning huquqlari, erkinliklari va qonuniy manfaatlarini himoya qilish, jismoniy va yuridik shaxslarning mol-mulkini himoya qilish, qonun ustuvorligini, shaxs, jamiyat va davlat xavfsizligini taʼminlash yoʻlida fidoyilik bilan xizmat qilib kelmoqdalar.

Tumanning 2-sektoriga Ichki ishlar boʻlimi boshligʻi rahbarlik qilib, xalq bilan tizimli, manzilli muloqotni oʻrnatish, fuqarolarning oʻzini oʻzi boshqarish organlari, fuqarolik jamiyatining boshqa institutlari bilan yaqin hamkorlikni yoʻlga qoʻyish, aholining muammolarini hal etishga har tomonlama koʻmaklashish borasida ham tashabbuskorlik bilan faoliyat koʻrsatib kelmoqda.

Tadbir davomida soha faxriylari va faol xodimlar soʻzga chiqib, soʻnggi yillarda mamlakatimizda ichki ishlar tizimida bir qator islohotlar amalga oshirilganini, islohotlar natijasida ichki ishlar organlari xalqchil tuzilmaga aylanganini qayd etib oʻtdilar. Yurtimizda jamoatchilik bilan yaqin hamkorlikda ishlash, fuqarolar bilan ochiq muloqot oʻrnatish, ularning muammolarini tinglash va oʻz vaqtida yechim topishga eʼtibor qaratilayotgani, shu maqsadda aholi bilan uchrashuvlar, profilaktik tadbirlar oʻtkazilayotgani va bu jarayon oʻzining ijobiy natijalarini berayotgani alohida taʼkidlab oʻtildi.

Tadbir davomida oʻz xizmat vazifalarini bajarishda boshqalarga oʻrnak va namuna boʻlgan tuman Ichki ishlar boʻlimining bir guruh xodimlariga tashakkurnomalar va esdalik sovgʻalari topshirildi.

Bayram tadbiri tuman Madaniyat boʻlimi sanʼatkorlari tomonidan kuylangan qoʻshiqlar va ijro etilgan raqslar bilan yanada fayzli oʻtdi.

Chindan ham, davlat va jamiyat rivojida tinchlik va osoyishtalik oʻta muhim ahamiyatga ega. Ichki ishlar organlari xodimlari esa xalqimizning tinchligi va osoyishtaligini taʼminlashda samarali faoliyat koʻrsatmoqda.

Fursatdan foydalanib, biz ham tahririyatimiz nomidan tinchligimiz posbonlarini kasb bayramlari bilan muborakbod etib, sharafli va masʼuliyatli ishlarida omad yor boʻlishini tilab qolamiz.

Tahririyat