"Маҳалла еттилиги"нинг самарали фаолияти туфайли Қангли овули обод, аҳоли турмуши янада фаровон бўлмоқда

Қангли – Амударё туманининг қардош Туркманистон Республикаси билан чегарадош ҳудудида, туман марказидан 35-40 чақирим олис масофада жойлашган. 621та хонадон таркибидаги 932та оилада 3 минг 476 нафар аҳоли истиқомат қиладиган Қангли қишлоғида сўнгги йилларда аҳоли фаровонлигини оширишга қаратилган саъй-ҳаракатлар туфайли камбағал оилалар сони камайиб, томорқа хўжалиги, якка тадбиркорлик, оилавий тадбиркорлик билан шуғулланувчилар сафи тобора ошиб бормоқда.

Ўзбекистон Республикаси Президентининг 2022 йил 25 октябрдаги “2022-2023 йилларда маҳаллалар инфратузилмасини янада яхшилаш бўйича қўшимча чора-тадбирлар тўғрисида”ги Қарори ижросини таъминлаш мақсадида овул фуқаролар йиғини раиси Бахтиёр Пирманов раҳбарлигида “Маҳалла еттилиги” томонидан инфратузилма билан боғлиқ энг долзарб масалаларни ҳал этишга киришилгани боис, қанглиликлар ҳаётида сезиларли ўзгаришлар юз бермоқда.

Хусусан, ички йўллар таъмири бўйича, ичимлик суви, электр энергияси ва суюлтирилган газ таъминоти, таълим, соғликни сақлаш, маданият, спорт иншоотларини яхшилашга қаратилган давлат дастурлари доирасида “Обод қишлоқ”, “Обод маҳалла” жамғармалари орқали молиялаштирилган қурилиш-таъмирлаш ишлари олиб борилди. Шулардан энг аҳамиятлиси – қишлоқнинг Хонжиғали маҳалласи ҳудудидаги салкам 2 км узунликдаги кўчаларга тош-шағал ётқизилди.

Шахсан Президентимизнинг ташаббус ва кўрсатмалари асосида оғир турмуш шароитида яшаётган оилалар фаровонлигини ошириш, уларни ҳар томонлама қўллаб-қувватлаш, уй-жойларининг том қисмини шиферлаб бериш, яшаш шароити жуда оғир деб топилган хонадонларни жорий таъмирлаш, яроқсизларини бузиб, қайтадан қуриш ишларини амалга ошириш мақсадида “Маҳалла еттилиги” томонидан уйма-уй юриб, аҳолининг яшаш шароитлари ўрганилди ва қишлоқдаги мавжуд барча хонадонлар хатловдан ўтказилди. Шунга мувофиқ оғир шароитларда яшаётган 33та хонадон рўйхати шакллантирилди ва 2023 йил давомида 19та хонадоннинг том қисми шифер билан ёпилди, 1та хонадон бузиб, қайтадан қуриб берилди.

Қангли қишлоғи чегара ҳудудида жойлашганлиги, қолаверса, аҳолининг хавфсизлигини таъминлаш, йўл-транспорт ҳодисаларининг олдини олиш мақсадида Хонжиғали, Матарёп кўчаларига кузатув камералари ўрнатилиб, фуқаролар йиғини маъмурий биносига қуёш панели, электр энергияси узатиш устунлари ҳамда 235 млн сўмлик трансформатор ўрнатилди.

Шунингдек, 2-Матарёп кўчасига 12та электр устунлари ўрнатиш, СИП кабелларини тортиш, 1км масофада пиёдалар йўлакчаларини қуриш ишлари амалга оширилди. Қишлоқнинг марказий кўчасида олиб борилган қуриш-таъмирлаш ишлари натижасида мазкур кўчанинг 2км қисмига, Хонжиғали маҳалласи ҳудудидаги кўчаларнинг 1,5 км қисмига асфальт қопламаси ётқизилиб, “Менинг йўлим” лойиҳаси доирасида 1,5 км ички хўжалик йўлларига шағал-тош тўшалди.

Авваллари қишлоқ аҳолисидан тушган мурожаатлар бўйича ҳолатлар ўрганилиб, фақат мурожаат қилган фуқароларгагина ижтимоий ёрдамлар кўрсатиларди. Эндиликда эса маҳалла институтини янада такомиллаштириш, камбағалликни қисқартириш ва аҳолининг ижтимоий фаоллигини оширишга қаратилаётган давлатимиз ғамхўрлиги ва эътибори туфайли қишлоқдаги барча хонадонлар хатловдан ўтказилиши натижасида ижтимоий ҳимоя чораларини белгилаш адолатли ҳал этилмоқда.

Қанглиликларга ҳам 2023 йилда ўтказилган хатлов натижаларига кўра уч тоифа бўйича ижтимоий ёрдамлар кўрсатилди. Унга кўра, 1-тоифадаги рўйхатга 257та кам таъминланган, эҳтиёжманд ва даромади жуда паст оилалар киритилди. 2-тоифага эса ўртача ойлик даромадли хонадонлар, яъни оила аъзоларининг даромади жон бошига минимал истеъмол харажатларининг бир бараваридан уч бараваригача – 568 минг сўмдан 1,5 млн сўмгача бўлган 336та хонадон киритилди. 3-тоифага ўртача ойлик даромадлари минимал истеъмол харажатларининг уч бараваридан юқори бўлган оилалар киритилди ва ана шу натижаларга асосан ижтимоий ҳимоя чоралари кўрилди.

Аҳолининг даромад манбаини оширишга қаратилган саъй-ҳаракатлар натижасида 197 нафар фуқаролар доимий иш билан бандлиги таъминланди. 85 нафар фуқарога оилавий тадбиркорлигини йўлга қўйиши учун имтиёзли кредит маблағи олишида кўмаклашилди. 151 нафар ишсиз фуқарога эса “E-AUKSION” савдо платформаси орқали қишлоқ хўжалиги ерлари ажратилиб, 1 нафар фуқаро ҳақ тўланадиган жамоат ишларига жойлаштирилди. Маҳаллабай ишлаш ва тадбиркорликни ривожлантириш агентлигининг Қорақалпоғистон Республикаси бошқармаси томонидан ҳоким ёрдамчисининг берган тавсияномасига асосан 16 нафар фуқарога жами 52,8 млн сўмлик субсидиялар ажратилди.

“Маҳалла еттилиги”нинг ҳамкорликдаги фаолияти натижасида аёл-қизларни қўллаб-қувватлаш, ҳудуддаги таълим-тарбия муассасалари ўқувчи-ёшларининг бўш вақтларини мазмунли ўтказишга қаратилган чора-тадбирлар ҳам ўз самарасини бермоқда. Айниқса, аёл-қизлар орасида ўзини-ўзи банд қилиш тамойили асосида касаначилик фаолияти билан шуғулланиб, доимий даромад манбаини яратаётганлар, томорқа хўжалигини юритиш орқали қўшимча даромадга эга бўлаётганлар талайгина.

Ҳудуддаги мактабларнинг ўқувчилари орасида интилувчан, спортсевар, китобхон ёшларнинг кўплиги қанглиликлар ўтаётган ҳар бир кунидан маъно-мазмунлар топиб, келажакка дадил интилиб яшаётганларидан далолатдир. Чунки Қангли қишлоғининг бугуни ҳам, эртаси ҳам ўзлариники, ўз турмуш тарзларини ижобий ва яхши томонга ўзгартириб, замон билан ҳамнафас яшаш, меҳнат қилиш эса қанглиликларга хос бобомерос қадрият. Меҳнаткаш ва фидойи, янгиликларга интилувчан Қангли қишлоғи аҳолисининг бугунги турмуш тарзи билан танишиб, бу мард, сабр-қаноатли ва меҳнаткаш инсонларга ҳавас қилдик.

Робия Йўлдошева.