Ис газидан заҳарланишнинг олдини олиш юзасидан йиғилиш бўлиб ўтди

Амударё тумани ҳокимлигининг мажлислар залида куз-қиш мавсумига пухта тайёргарлик кўриш, фавқулодда вазиятларнинг олдини олиш, ис газидан заҳарланишнинг олдини олиш юзасидан йиғилиш бўлиб ўтди.

Йиғилишда Қорақалпоғистон Республикаси Ички ишлар вазири полковник Бахтияр Торебеков, Фавқулодда вазиятлар бошқармаси бошлиғи подполковник Азамат Давлетов, туман ҳокими Собир Хўжаметов, сектор раҳбарлари, ҳоким ўринбосарлари, бўлимлар, ташкилотлар раҳбарлари ҳамда масъуллари, шунингдек 49 та овул, маҳаллалар “еттилиги” масъуллари иштирок этдилар.

Йиғилишда Қорақалпоғистон Республикаси Ички ишлар вазири полковник Бахтияр Торебеков ҳамда Фавқулодда вазиятлар бошқармаси бошлиғи подполковник Азамат Давлетов сўзга чиқиб, куз-қиш мавсумини беталафот ўтказиш мақсадида тайёргарлик ишларини янада жадаллаштириш лозимлиги, ис газидан заҳарланишнинг аянчли оқибатлари ва унинг олдини олиш бўйича аҳоли ўртасида тушунтириш-тарғибот ишларини кучайтириш, уйма-уй юриб, аҳоли хонадонларида иситиш қозонларининг ва дудбуронларнинг мавсумга тайёргарлик ҳолатини ўрганиш ва назоратни кучайтириш, мавжуд камчиликларни тезкорлик билан бартараф қилиш зарурлиги хусусида сўз юритдилар.

Қайд этиш жоизки, ис газидан заҳарланиш – инсон организмига ис гази кириши оқибатида ривожланадиган ўткир патологик ҳолат бўлиб, ҳаёт ва саломатлик учун хавфлидир ва малакали тиббий ёрдамсиз ўлимга олиб келиши мумкин.

Ҳаво ҳароратининг кескин ўзгариши, кунларнинг совиши иссиқлик таъминоти ва иситиш жиҳозларига бўлган эҳтиёжимизни оширади. Иситиш манбаларидан нотўғри фойдаланиш оқибатида ис гази билан боғлиқ кўнгилсиз ҳодисалар, энг ачинарлиси, фавқулодда вазиятлар юзага келиб, инсонлар қурбон бўлиши мумкин.

Статистик маълумотларга кўра, об-ҳаво кескин совиган кунларда содир бўлаётган фавқулодда вазиятларнинг аксарияти ис газидан заҳарланиш ҳолати билан боғлиқ. Ушбу заҳарли газ хонадонларимизда фойдаланиладиган табиий ва суюлтирилган газ, кўмир, ўтин ва бошқа шу каби ёқилғи манбаларининг тўлиқ ёнмаслиги натижасида пайдо бўлади.

Ис гази рангсиз ва ҳидсиз газ бўлиб, нафас йўллари орқали қонга сўрилганда организмни, хусусан, марказий асаб тизимини жиддий зарарлаши билан хавфлидир. Инсон ис гази билан заҳарланган ҳаводан нафас олиб турса ҳам, ҳеч нарсани сезмайди, шу боис, ис газидан заҳарланиб, вафот этиш эҳтимоли юқори. Бу ҳолат кўпинча дудбуронларнинг тиқилиб ёхуд ишламай қолиши, газ ёниши учун ҳаво етарли бўлмаганда кузатилади. Профилактик мақсадларда ёнғин хавфсизлиги қоидаларига амал қилиш керак. Уйда заҳарланишга йўл қўймаслик учун носоз газ ва иситиш мосламаларидан фойдаланмаслик тавсия этилади.

Маълумот тариқасида айтиш жоизки, туман Фавқулодда вазиятлар бўлими томонидан аҳоли уй-жойларидаги ва кўп хонадонли уйлардаги иситиш қозонлари ва печларидан хавфсиз фойдаланиш қоидаларига риоя этиш ҳолатларини тизимли ўрганиш ҳамда аниқланган муаммо ва носозликларни бартараф этилиш ва дудбуронларни тозалаш борасида самарали ишлар амалга оширилмоқда.

Фавқулодда вазиятларнинг олдини олиш мақсадида маҳаллалар кесимида уйма-уй юриб хонадон эгаларига ёнғинга қарши тушунтириш ишлари олиб борилмоқда. Шу мақсадда, жойларда амалга оширилаётган ишларни мувофиқлаштириш ва назорат қилиш учун тезкор штаб ва ишчи гуруҳи тузилган бўлиб, туман Фавқулодда вазиятлар бўлими томонидан 2024 йилнинг ўтган даври мобайнида, жами 12 минг 563та аҳоли яшаш ҳовли уйлари ўрганиб чиқилди, 10 минг 687 та хонадонлар иситиш қозонларининг дудбуронлари тозаланди.

Куз-қиш мавсумини беталафот ўтказиш мақсадида туман Фавқулодда вазиятлар бўлими ходимлари ва тегишли соҳа вакиллари билан ҳамкорликда хавф юқори бўлган объектларда, ижтимоий соҳа объектлари, ўрмонларда, уй-жойларда ҳамда таълим объектларида ёнғин хавфсизлигини таъминлаш, фуқароларнинг ҳаёти ва мол мулкининг дахлсизлигини сақлаш мақсадида амалий ишлар қилмоқдалар.

Йиғилишда бу борада олдинда турган вазифалар хусусида сўз юритилиб, тегишли масъулларга зарур топшириқлар берилди.

Чарос Арслонова, туман ҳокимлигининг Ахборот хизмати раҳбари.