"Яшил макон" умуммиллий лойиҳаси доирасидаги кўчат экиш тадбирларида депутатлар, маҳалла фаоллари, кенг жамоатчилик вакиллари уюшқоқлик билан иштирок этишмоқда

Бугунги кунда дунё миқёсида экологик фалокатлар тобора кенг қулоч ёзиб, баъзи ҳудудларда инсоният, ўсимлик ва ҳайвонот дунёси учун хатарли кўринишга яқинлашмоқда. Ҳавонинг ифлосланиши, озон қатламининг емирилиши, глобал исиш, чўлланиш, денгиз ва дарёларнинг ифлосланиши каби муаммолар шулар жумласидандир. Бу фалокатларнинг асосий сабабчиси ҳам инсондир. Дарахтларнинг оммавий кесилиши, завод ва фабрикалардан, автомобиллардан чиқадиган зарарли газлар миқдорининг муттасил ортиб бориши ва бошқа салбий ҳолатлар айнан инсониятнинг табиат ва атроф-муҳитга нисбатан бефарқлиги натижасида келиб чиқмоқда.

Экологик муаммоларни ҳал қилиш ва унинг салбий оқибатларини юмшатиш, олдини олиш учун эса табиат билан ҳамоҳанг яшаш ниҳоятда муҳимдир. Шу нуқтаи назардан яшил майдонларни кўпайтириш ва дарахтлар экиш табиатни асрашда жуда катта аҳамиятга эга. Сабаби, дарахтлар ҳавони зарарли газлардан тозалайди, иқлимни юмшатади, тупроқ эрозиясининг олдини олади ва инсонларга соғлом муҳит яратади.

Ўзбекистонда экологик муаммоларни ҳал қилиш ва атроф-муҳит мусаффолигини асраш мақсадида 2021 йилдан бошлаб “Яшил макон” умуммиллий лойиҳаси амалга оширила бошланди. Бу лойиҳа доирасида ҳар йили миллионлаб туп дарахт ва буталар кўчатлари экилмоқда. Ҳудудларни кўкаламзорлаштириш, янги боғлар ва яшил майдонлар яратиш орқали экологик барқарорликни таъминлашга катта эътибор қаратилмоқда.

Жорий йилда ҳам “Яшил макон” умуммиллий лойиҳаси доирасида кўчат экиш ва кўкаламзорлаштириш ишлари уюшқоқлик билан давом эттирилмоқда. Лойиҳа доирасида Амударё туманининг Чойкўл овули ҳудудида – фуқаролар йиғини биноси ёнида ҳам маҳалла тизими фаоллари, фуқаролар йиғинлари раислари ва масъуллари ҳамда “Маҳалла еттиликлари” иштирокида кўчат экиш тадбири бўлиб ўтди. Яхши ниятлар билан фуқаролар йиғини биноси қошидаги боғга дарахт кўчатларини эккан фаоллар келгусида бу ҳудуд яшил масканга айланишини, мевали дарахтлар ҳосили ва манзарали буталарнинг соясидан кўплаб инсонлар баҳраманд бўлишини тилаб, дуога қўл очдилар.

“Яшил макон” умумиллий лойиҳаси доирасида туманнинг Фаровон маҳалласи ҳудудида жойлашган очиқ майдонга ҳам халқ депутатлари Амударё туман Кенгаши депутатлари ҳамда сиёсий партиялар фаоллари томонидан кўчатлар ўтқазилди.

Дарҳақиқат, куз фасли дарахт кўчатларини экиш учун энг мақбул вақтлардан бири ҳисобланади. Бу даврда ҳаво намлиги юқори, ер қовушоқ бўлади ва ёмғирлар кўчатларнинг илдиз отишига ёрдам беради. Кўчатларни кузда экиш учун октябрь ва ноябрь ойлари энг қулай давр ҳисобланади. Бу вақтда тупроқ нам ва унда иссиқлик мўътадил бўлади.

Туманнинг бошқа ҳудудларида ҳам иқлим ва тупроқ шароитига мос келадиган дарахт турларини экишга катта эътибор қаратилмоқда. Манғит шаҳридаги Гулзор маҳалласи аҳли ҳам кўчат экиш ва яшил масканларни барпо қилиш ишларига уюшқоқлик билан киришганлар. Маҳалла фаоллари, кўчабошчи аёллар ва нуроний отахонлар ҳамда онахонлар ҳашарга чиқиб, эзгу ниятлар билан маҳалла фуқаролар йиғини биноси яқинида барпо қилинаётган янги боғга мевали ва манзарали дарахт кўчатларини экдилар.

Ўзбек халқининг бой маданий мероси ва урф-одатлари ўзида табиатга бўлган алоҳида ҳурмат ва эътиборни акс эттиради. Бу қадриятлар орасида дарахт экиш анъанаси ҳам бор бўлиб, у табиатни асраш ва келажак авлодга муносиб муҳит қолдириш ғоясига асосланган. Кўчат экиш фақатгина экологик аҳамиятга эга иш эмас, балки бу халқимиз маънавияти ва маърифатининг ҳам ажралмас қисмидир. Тарихдан маълумки, аждодларимиз боғ ва мевали дарахтзорлар яратиш орқали нафақат табиатга ҳурмат кўрсатган, балки уни миллий қадрият даражасига кўтарган. Ҳар бир ота-она фарзанди туғилиши билан унга атаб камида 40 туп дарахт эккан. Экилган дарахтлар бир неча авлодларга ўз меваси ва сояси билан манфаат келтирган. Муқаддас ислом динимизда ҳам дарахт экиш хайру-саховатнинг муҳим кўриниши сифатида баҳоланади. Ҳадисларда: “Кимки дарахт экадиган бўлса, унинг меваларидан нафақат одамлар, балки қушлар ва жониворлар фойдаланса, бундан дарахт эккан одамга савоб ёзилади”, деган мазмунда ривоятлар бор. 

Кўчат экиш нафақат миллий қадриятимиз, балки ҳар бир инсоннинг жамият ва табиат олдидаги бурчидир. Келинг, аждодларимиз анъанасини давом эттирайлик ва келажак учун яшил макон яратишда фаол иштирок этайлик! Ҳар биримиз ўз ҳудудимизда дарахт экиб “Яшил макон” умуммиллий акцияси доирасида фаол иштирок этайлик, келажак авлод учун соғлом муҳит ярайлик!