"Yashil makon" umummilliy loyihasi doirasidagi koʻchat ekish tadbirlarida deputatlar, mahalla faollari, keng jamoatchilik vakillari uyushqoqlik bilan ishtirok etishmoqda

Bugungi kunda dunyo miqyosida ekologik falokatlar tobora keng quloch yozib, baʼzi hududlarda insoniyat, oʻsimlik va hayvonot dunyosi uchun xatarli koʻrinishga yaqinlashmoqda. Havoning ifloslanishi, ozon qatlamining yemirilishi, global isish, choʻllanish, dengiz va daryolarning ifloslanishi kabi muammolar shular jumlasidandir. Bu falokatlarning asosiy sababchisi ham insondir. Daraxtlarning ommaviy kesilishi, zavod va fabrikalardan, avtomobillardan chiqadigan zararli gazlar miqdorining muttasil ortib borishi va boshqa salbiy holatlar aynan insoniyatning tabiat va atrof-muhitga nisbatan befarqligi natijasida kelib chiqmoqda.

Ekologik muammolarni hal qilish va uning salbiy oqibatlarini yumshatish, oldini olish uchun esa tabiat bilan hamohang yashash nihoyatda muhimdir. Shu nuqtai nazardan yashil maydonlarni koʻpaytirish va daraxtlar ekish tabiatni asrashda juda katta ahamiyatga ega. Sababi, daraxtlar havoni zararli gazlardan tozalaydi, iqlimni yumshatadi, tuproq eroziyasining oldini oladi va insonlarga sogʻlom muhit yaratadi.

Oʻzbekistonda ekologik muammolarni hal qilish va atrof-muhit musaffoligini asrash maqsadida 2021-yildan boshlab “Yashil makon” umummilliy loyihasi amalga oshirila boshlandi. Bu loyiha doirasida har yili millionlab tup daraxt va butalar koʻchatlari ekilmoqda. Hududlarni koʻkalamzorlashtirish, yangi bogʻlar va yashil maydonlar yaratish orqali ekologik barqarorlikni taʼminlashga katta eʼtibor qaratilmoqda.

Joriy yilda ham “Yashil makon” umummilliy loyihasi doirasida koʻchat ekish va koʻkalamzorlashtirish ishlari uyushqoqlik bilan davom ettirilmoqda. Loyiha doirasida Amudaryo tumanining Choykoʻl ovuli hududida – fuqarolar yigʻini binosi yonida ham mahalla tizimi faollari, fuqarolar yigʻinlari raislari va masʼullari hamda “Mahalla yettiliklari” ishtirokida koʻchat ekish tadbiri boʻlib oʻtdi. Yaxshi niyatlar bilan fuqarolar yigʻini binosi qoshidagi bogʻga daraxt koʻchatlarini ekkan faollar kelgusida bu hudud yashil maskanga aylanishini, mevali daraxtlar hosili va manzarali butalarning soyasidan koʻplab insonlar bahramand boʻlishini tilab, duoga qoʻl ochdilar.

“Yashil makon” umumilliy loyihasi doirasida tumanning Farovon mahallasi hududida joylashgan ochiq maydonga ham xalq deputatlari Amudaryo tuman Kengashi deputatlari hamda siyosiy partiyalar faollari tomonidan koʻchatlar oʻtqazildi.

Darhaqiqat, kuz fasli daraxt koʻchatlarini ekish uchun eng maqbul vaqtlardan biri hisoblanadi. Bu davrda havo namligi yuqori, yer qovushoq boʻladi va yomgʻirlar koʻchatlarning ildiz otishiga yordam beradi. Koʻchatlarni kuzda ekish uchun oktyabr va noyabr oylari eng qulay davr hisoblanadi. Bu vaqtda tuproq nam va unda issiqlik moʻʼtadil boʻladi.

Tumanning boshqa hududlarida ham iqlim va tuproq sharoitiga mos keladigan daraxt turlarini ekishga katta eʼtibor qaratilmoqda. Mangʻit shahridagi Gulzor mahallasi ahli ham koʻchat ekish va yashil maskanlarni barpo qilish ishlariga uyushqoqlik bilan kirishganlar. Mahalla faollari, koʻchaboshchi ayollar va nuroniy otaxonlar hamda onaxonlar hasharga chiqib, ezgu niyatlar bilan mahalla fuqarolar yigʻini binosi yaqinida barpo qilinayotgan yangi bogʻga mevali va manzarali daraxt koʻchatlarini ekdilar.

Oʻzbek xalqining boy madaniy merosi va urf-odatlari oʻzida tabiatga boʻlgan alohida hurmat va eʼtiborni aks ettiradi. Bu qadriyatlar orasida daraxt ekish anʼanasi ham bor boʻlib, u tabiatni asrash va kelajak avlodga munosib muhit qoldirish gʻoyasiga asoslangan. Koʻchat ekish faqatgina ekologik ahamiyatga ega ish emas, balki bu xalqimiz maʼnaviyati va maʼrifatining ham ajralmas qismidir. Tarixdan maʼlumki, ajdodlarimiz bogʻ va mevali daraxtzorlar yaratish orqali nafaqat tabiatga hurmat koʻrsatgan, balki uni milliy qadriyat darajasiga koʻtargan. Har bir ota-ona farzandi tugʻilishi bilan unga atab kamida 40 tup daraxt ekkan. Ekilgan daraxtlar bir necha avlodlarga oʻz mevasi va soyasi bilan manfaat keltirgan. Muqaddas islom dinimizda ham daraxt ekish xayru-saxovatning muhim koʻrinishi sifatida baholanadi. Hadislarda: “Kimki daraxt ekadigan boʻlsa, uning mevalaridan nafaqat odamlar, balki qushlar va jonivorlar foydalansa, bundan daraxt ekkan odamga savob yoziladi”, degan mazmunda rivoyatlar bor. 

Koʻchat ekish nafaqat milliy qadriyatimiz, balki har bir insonning jamiyat va tabiat oldidagi burchidir. Keling, ajdodlarimiz anʼanasini davom ettiraylik va kelajak uchun yashil makon yaratishda faol ishtirok etaylik! Har birimiz oʻz hududimizda daraxt ekib “Yashil makon” umummilliy aktsiyasi doirasida faol ishtirok etaylik, kelajak avlod uchun sogʻlom muhit yaraylik!