31-СОНЛИ МАКТАБНИНГ ЯНГИ БИНОСИ ФОЙДАЛАНИШГА ТОПШИРИЛДИ
Мамлакатимизда таълим тизимига қаратилаётган эътибор туфайли, ҳар йили ўнлаб мактаблар, мактабгача таълим ташкилотлари бинолари замон талаблари даражасида реконструкция қилиниб, қайта жиҳозланмоқда ва ўз муддатини ўтаб бўлган бинолар ўрнида янгилари бунёд этилмоқда. Муҳтарам Президентимизнинг ташаббуслари ва қўллаб-қувватлашлари билан амалга оширилаётган бу каби бунёдкорлик ишлари Амударё туманида ҳам кенг миқёсда олиб борилиб, туман Мактабгача ва мактаб таълими бўлими тасарруфидаги умумтаълим мактабларининг шарт-шароитлари яхшиланиб, ахборот-коммуникация технологиялари билан жиҳозланаётгани таълим-тарбия ишларини самарали ташкил этиш имконини бермоқда. Туманда биргина 2024 йилда турли манбалар ҳисобидан бунёд этилган 5та ижтимоий соҳа объектларидан 3 таси умумтаълим мактаблари ва 2таси мактабгача таълим ташкилотларидир. Шулардан бири – 31-сонли мактабнинг 330 ўринли янги биноси ҳисобланади.
Мазкур мактабнинг эски биноси 1964 йилда 560 ўқувчи ўринга мўлжаллаб қурилган бўлиб, сўнгги йилларда мазкур бино анча эскиргани, таълим-тарбия ишларини сифатли олиб бориш имкони бўлмагани сабабли, 2007 йилда мактабга реконструкция ҳисобидан 160 ўринли қўшимча бино қуриб берилган эди. Салкам 500 нафар ўқувчи таълим оладиган мазкур ўқув муассасаси учун, албатта, 160 ўринли қўшимча бино қурилгани билан мактабда ўқувчиларга замон талаблари даражасида таълим-тарбия бериш борасидаги муаммолар барҳам топмади. Шу боис, жорий 2024 йилги инвестиция дастури доирасида 4,1 миллиард сўм маблағ эвазига мактаб учун 330 ўринли, замонавий талабларга тўла жавоб берадиган янги бино қурилиб, фойдаланишга топширилди.
29 ноябрь куни мактаб биносини фойдаланишга топширишга бағишланган тантанали маросим бўлиб ўтди. Ўқув муассасасининг очилишига бағишланган тантанали маросимда Амударё тумани ҳокими Собир Хўжаметов раҳбарлигидаги туман ҳокимлиги масъуллари, сектор раҳбарлари, Амударё туман Мактабгача ва мактаб таълими бўлими мутасаддилари, Беруний номли маҳалла фуқаролар йиғини масъуллари ҳамда маҳалла фаоллари, педагог ходимлар иштирок этдилар.
Тадбирда Амударё туман ҳокими Собир Хўжаметов Мактабгача ва мактаб таълими бўлими масъулларини, 31-сонли мактаб педагогика жамоасини янги мактаб биносининг фойдаланишга топширилиши муносабати билан самимий табриклади ва қурилиш ишларини қисқа муддатда, сифатли амалга оширгани учун "Sanjar Diyor building" МЧЖ қурувчиларига миннатдорчилик билдирди.
Тадбирда мазкур таълим даргоҳи йиллар давомида туманимизнинг турли соҳаларида фаолият юритаётган юксак салоҳиятли мутахассис кадрлар етишиб чиқишида муҳим рол ўйнагани алоҳида эътироф этилиб, мактабнинг собиқ битирувчилари орасида мамлакатимиз илм-фани дарғалари, давлат ва жамоат арбоблари борлигини фахр билан тилга олинди.
Тадбирда туман Мактабгача ва мактаб таълими бўлими мудири Ялғош Шомуратов ҳам сўзга чиқиб, мамлакатимизда таълим тизимига қаратилаётган эътибор туфайли соҳада эришилаётган ютуқлар ҳақида тўхталиб ўтди ва педагог ходимларни ёш авлод таълим-тарбиясига масъулият билан ёндошган ҳолда, яратилаётган шароитларга муносиб равишда фаолият олиб боришга чақирди.
Шундан сўнг, мактаб биносини бунёд этган “Sanjar Diyor building” МЧЖ раҳбарияти томонидан мактаб директори Нилуфар Давлетовага янги бинонинг рамзий калити тантанали равишда топширилди.
Тадбир иштирокчилари мактаб биносида яратилган шарт-шароитлар, хусусан, мактаб инфратузилмаси, фанлар бўйича махсус жиҳозланган хоналар билан яқиндан танишдилар.
Шу куннинг ўзида ўқувчилар ўз устозлари раҳбарлигида шинам ва ёруғ, замонавий шароитларга эга синф хоналарида ўқув машғулотларини бошлаб юбордилар.
Робия Йўлдошева.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
