“Ёнғин хавфсизлиги ойлиги” доирасидаги тадбирлар давом этмоқда

Халқимиз “ўт билан ўйнашма”, “олов – ёв” қабилидаги ибораларни бекорга яратмаган. Чунки олов билан боғлиқ салгина қалтис ҳаракат туфайли инсон, энг аввало, саломатлиги билан боғлиқ муаммога дуч келиши, куйиш жароҳати олиб, умрбод ногирон бўлиб қолиши ёхуд умр бўйи фидойи меҳнатлари эвазига бунёд этган мол-мулки ва иморатидан маҳрум бўлиб қолиши ҳеч гап эмас.

Шу боис, Фавқулодда вазиятлар бўлими ходимлари томонидан куз-қиш ойларида аҳолининг иситиш тизимларидан эҳтиёткорлик билан фойдаланишларини таъминлаш мақсадида хонадонлардаги кўмир ва бошқа турдаги ёқилғи маҳсулотлари билан иситиладиган печларнинг, табиий газ тармоғига уланган хонадонларда эса қозонхоналарнинг иситиш мавсумига тайёргарлик ҳолати ўрганилиб, мавжуд камчиликларни бартараф этишга эътибор қаратилади. Бу каби ишлар, айниқса, “Ёнғин хавфсизлиги ойлиги” доирасидаги тадбирларда кенг кўламда амалга оширилади.

15 ноябрдан 15 декабргача мамлакатимиз бўйлаб ўтказилаётган “Ёнғин хавфсизлиги ойлиги” доирасида Амударё тумани Фавқулодда вазиятлар бўлими ходимлари томонидан туманнинг барча ҳудудларидаги овул ва маҳалла фуқаролар йиғинларида аҳоли вакиллари, умумтаълим мактаблари ўқувчилари, шунингдек, янгидан бунёд этилаётган кўп қаватли уйлар қурувчилари билан профилактик суҳбатлар ўтказилмоқда.

Хусусан, Амударё туман газ таъминоти бўлими ходимлари билан биргаликда аҳоли яшаш жойларида уйма-уй юриб, аҳолига ёнғин хавфсизлиги қоидаларига амал қилиш бўйича кенг тушунтириш ва тарғибот ишлари олиб борилиб, кўп қаватли турар жойлардаги хонадонлар хатловдан ўтказилмоқда. Бундан кўзланган асосий мақсад аҳолининг ис газидан заҳарланишининг, табиий газ тармоғига ноқонуний, тақиқланган усулда, яъни резина шланглар орқали уланишларининг олдини олиш, иситиш қозонлари ва дудбуронларининг созлигини таъминлаш, бу каби ускуна ва жиҳозларни вақтида техник кўрикдан ўтказиш, тозалаб туриш, яшаш хонадони ичидаги иситиш қозонларини ташқарига чиқариш, электр узатиш сими ва кабелларига эътиборли бўлиш бўйича истеъмолчиларнинг маданиятини оширишдир.

“Ёнғин хавфсизлиги ойлиги” доирасидаги ана шундай профилактик тадбирлардан бири Манғит шаҳрининг Дўстлик маҳалласи ҳудудида барпо этилаётган “Янги Ўзбекистон” массиви қурувчилари иштирокида ҳам ўтказилди. Тадбирда ФВБ ходимлари томонидан қурилиш ишларини амалга оширишда ёнғин хавфсизлигини таъминлаш бўйича профилактик тушунтириш ишлари олиб борилиб, эслатма варақалари тарқатилди. Қурилиш майдонидаги биноларнинг жойлашуви махсус лойиҳа асосида қурилаётгани, бинолар қурилиши ёнғин хавфсизлиги қоидаларига қай даражада амал қилинаётганига алоҳида эътибор қаратилди.

Афсуски, янгидан қурилаётган баъзи биноларнинг фасад қисмига ёнғин хавфсизлиги талабларига жавоб бермайдиган, иссиқ ва совуқни ўтказмаслик даражаси паст бўлган, тез алангаланувчи материаллар (пенаплекс) ишлатилмоқда. Бу эса кўп қаватли биноларда ёнғин келиб чиқишига сабаб бўлмоқда. Шу боис, янгидан қурилаётган биноларда қурилиш лойиҳаларида кўрсатилган қурилиш ашёларидан фойдаланиш талаб этилмоқда.

Ойлик доирасида жойларда бу каби тадбирлар ва тушунтириш-тарғибот ишлари узлуксиз давом эттирилмоқда.

Б. Алламберганов, Амударё туман ФВБ катта инспектори.