“Yongʻin xavfsizligi oyligi” doirasidagi tadbirlar davom etmoqda

Xalqimiz “oʻt bilan oʻynashma”, “olov – yov” qabilidagi iboralarni bekorga yaratmagan. Chunki olov bilan bogʻliq salgina qaltis harakat tufayli inson, eng avvalo, salomatligi bilan bogʻliq muammoga duch kelishi, kuyish jarohati olib, umrbod nogiron boʻlib qolishi yoxud umr boʻyi fidoyi mehnatlari evaziga bunyod etgan mol-mulki va imoratidan mahrum boʻlib qolishi hech gap emas.

Shu bois, Favqulodda vaziyatlar boʻlimi xodimlari tomonidan kuz-qish oylarida aholining isitish tizimlaridan ehtiyotkorlik bilan foydalanishlarini taʼminlash maqsadida xonadonlardagi koʻmir va boshqa turdagi yoqilgʻi mahsulotlari bilan isitiladigan pechlarning, tabiiy gaz tarmogʻiga ulangan xonadonlarda esa qozonxonalarning isitish mavsumiga tayyorgarlik holati oʻrganilib, mavjud kamchiliklarni bartaraf etishga eʼtibor qaratiladi. Bu kabi ishlar, ayniqsa, “Yongʻin xavfsizligi oyligi” doirasidagi tadbirlarda keng koʻlamda amalga oshiriladi.

15-noyabrdan 15-dekabrgacha mamlakatimiz boʻylab oʻtkazilayotgan “Yongʻin xavfsizligi oyligi” doirasida Amudaryo tumani Favqulodda vaziyatlar boʻlimi xodimlari tomonidan tumanning barcha hududlaridagi ovul va mahalla fuqarolar yigʻinlarida aholi vakillari, umumtaʼlim maktablari oʻquvchilari, shuningdek, yangidan bunyod etilayotgan koʻp qavatli uylar quruvchilari bilan profilaktik suhbatlar oʻtkazilmoqda.

Xususan, Amudaryo tuman gaz taʼminoti boʻlimi xodimlari bilan birgalikda aholi yashash joylarida uyma-uy yurib, aholiga yongʻin xavfsizligi qoidalariga amal qilish boʻyicha keng tushuntirish va targʻibot ishlari olib borilib, koʻp qavatli turar joylardagi xonadonlar xatlovdan oʻtkazilmoqda. Bundan koʻzlangan asosiy maqsad aholining is gazidan zaharlanishining, tabiiy gaz tarmogʻiga noqonuniy, taqiqlangan usulda, yaʼni rezina shlanglar orqali ulanishlarining oldini olish, isitish qozonlari va dudburonlarining sozligini taʼminlash, bu kabi uskuna va jihozlarni vaqtida texnik koʻrikdan oʻtkazish, tozalab turish, yashash xonadoni ichidagi isitish qozonlarini tashqariga chiqarish, elektr uzatish simi va kabellariga eʼtiborli boʻlish boʻyicha isteʼmolchilarning madaniyatini oshirishdir.

“Yongʻin xavfsizligi oyligi” doirasidagi ana shunday profilaktik tadbirlardan biri Mangʻit shahrining Doʻstlik mahallasi hududida barpo etilayotgan “Yangi Oʻzbekiston” massivi quruvchilari ishtirokida ham oʻtkazildi. Tadbirda FVB xodimlari tomonidan qurilish ishlarini amalga oshirishda yongʻin xavfsizligini taʼminlash boʻyicha profilaktik tushuntirish ishlari olib borilib, eslatma varaqalari tarqatildi. Qurilish maydonidagi binolarning joylashuvi maxsus loyiha asosida qurilayotgani, binolar qurilishi yongʻin xavfsizligi qoidalariga qay darajada amal qilinayotganiga alohida eʼtibor qaratildi.

Afsuski, yangidan qurilayotgan baʼzi binolarning fasad qismiga yongʻin xavfsizligi talablariga javob bermaydigan, issiq va sovuqni oʻtkazmaslik darajasi past boʻlgan, tez alangalanuvchi materiallar (penapleks) ishlatilmoqda. Bu esa koʻp qavatli binolarda yongʻin kelib chiqishiga sabab boʻlmoqda. Shu bois, yangidan qurilayotgan binolarda qurilish loyihalarida koʻrsatilgan qurilish ashyolaridan foydalanish talab etilmoqda.

Oylik doirasida joylarda bu kabi tadbirlar va tushuntirish-targʻibot ishlari uzluksiz davom ettirilmoqda.

B. Allamberganov, Amudaryo tuman FVB katta inspektori.