Ёш авлодни ватанпарварлик руҳида тарбиялаб келаётган фидойи устоз

Ёш авлодни она Ватанга садоқат, жасорат ва масъулият руҳида тарбиялаш давлат сиёсатининг устувор йўналишларидан бири ҳисобланади. Ушбу эзгу мақсадларни амалга оширишда умумтаълим мактаблари ўқитувчилари, спорт мураббийлари, ҳарбий соҳага оид мутахассислар ва кенг жамоатчиликнинг роли беқиёс. Айниқса, ўз билим ва тажрибаси билан ёшларга ибрат бўлаётган устозларнинг саъй-ҳаракатларини ҳар қанча эътироф этсак ҳам кам. Хусусан, Амударё тумани Мактабгача ва мактаб таълими бўлимига қарашли 2-сонли умумтаълим мактабининг чақириққа қадар бошланғич тайёргарлик фани ўқитувчиси Рашид Нуримбетов ҳам ана шундай фидойи, жамиятга намунали устозлардан саналади.

Жорий йилнинг 16 январь куни Рашид Нуримбетовнинг кўп йиллик фаолияти “Ветеран” жангчи-фахрий ногиронлар бирлашмаси томонидан юқори баҳоланиб, “Ёшларни ватанпарварлик руҳида тарбиялаш учун” медали билан тақдирланди. Бу мукофот ёш авлод тарбиясида жонкуярлик кўрсатган фидойи устоз хизматларининг ёрқин эътирофи бўлди. Мукофотни топшириш тадбирида Ўзбекистон “Ветеран” жангчи-фахрий ногиронлар бирлашмаси Қорақалпоғистон Республикаси бўлими Амударё тумани вакиллари Б. Жуманиёзов, Ш. Саидбоев ва Р. Хўрозовлар иштирок этдилар.

Рашид Нуримбетовнинг ҳаёт йўли ёшларга ибратдир. У 1984-86 йилларда Афғонистонда ҳарбий хизматни ўтаб, ўз фуқаролик бурчини адо этган. 1986-90 йилларда эса Бухоро давлат педагогика институтида ҳарбий таълим йўналишида таҳсил олган. Ушбу билим ва кўникмаларини ёш авлодни Ватанга садоқатли бўлиш, жасорат ва масъулият руҳида тарбиялашга бағишлаб келмоқда.

Бугунги глобаллашув даврида ёш авлодни ватанпарварлик руҳида тарбиялаш, уларда миллий ғурур ва жасорат туйғуларини шакллантириш ҳар қачонгидан ҳам муҳимдир. Бундай эзгу мақсадга эришишда Рашид Нуримбетов каби фидойи устозларнинг роли беқиёсдир. Уларнинг ибратли фаолияти ёшлар онгида миллий-маънавий қадриятларни шакллантиришга, ирода, жасорат ва масъулият каби фазилатларни қарор топтиришга хизмат қилади.

Шоҳзод Қурбонбоев