ҲОФИЗ ХОТИРАСИГА БАҒИШЛАНДИ

Яхшининг ёди ўчмайди, дейишади. Ҳа, чиндан ҳам эл-юртга беминнат хизмат қилган, ўзини шу эл фарзанди, деб билган инсонлар ёди асрлар оша яшайверади. Санъатсевар амударёликлар хотирасида мумтоз қўшиқлари билан яшаётган Назир қори Раҳимов ҳам шундайлардан биридир. 30 апрель куни туманимиз маданият уйида машҳур ҳофиз Назир қори Раҳимов хотирасига бағишланган тадбир бўлиб ўтди.

Тадбирга туманимиздаги санъаткорлар, ҳурматли ҳофизнинг мухлислари, шунингдек Тўрткўл ва Элликқалъа туманларидан келган меҳмонлар қатнашдилар.

Тадбирни Назир қори Раҳимовнинг шогирдларидан Гулмирза Нурматов кириш нутқи билан очди ва тадбирни олиб боришни ОйбекБегимовга топширди. Таниқли ҳофиз билан замондош бўлган, бирга ижод қилган санъаткорлар, ҳамсуҳбат бўлган меҳмонлар ҳофизнинг серқирра ижоди, унинг ўзбек қўшиқчилигига қўшган бебаҳо ҳиссаси ҳамда инсоний фазилатлари ҳақида сўзлаб бердилар. Қодирберган хожи Жумамуродов Назир қори ҳақидаги хотираларини сўзлар экан, бу тадбирни ташкил қилган туман маданият бўлими ходимларига миннатдорчилик билдиргани ҳолда элимизда бошқа соҳаларда фаолият юргизиб, халқимизга ҳалол хизмат қилган, иззат-ҳурматга лойиқ кишилар кўплигини, уларни ҳам эъзозлашимиз кераклигини айтиб ўтди.

Тўрткўллик меҳмон, ёзувчи, сценарист, режиссёр ва шоир, Тўрткўл телевиденияси ташкилотчиси, ҳозирги кундаги раҳбари Муҳаммадсоли Машарипов оташ нафас ҳофиз Отажон Худойшукуров

билан биргаликда Назир қори Раҳимовникига келганликлари, ҳофизнинг уларга кўрсатган меҳмондўстлиги, репертуаридаги ашулалардан Отажон Худойшукуровга ўргатгани, Отажон ҳофизнинг Назир қори Раҳимовни устоз, деб билганлиги ҳақида сўзлади.

Элликқалъа тумани маданият ва аҳоли дам олиш маркази раҳбари Ҳожибой Сотлиқов ҳам ҳофиз ҳақидаги хотиралари билан ўртоқлашди.

Яна бир меҳмон Элликқалъа тумани "Сарибий” ашула ва рақс ансамбли раҳбари Сарсенбай Оллашев ўзининг дилрабо ашуласи билан қатнашчиларни хушнуд этди.

Туманимиз санъаткорларидан кекса ҳофизимиз Тўлибой Йўлдошев, унинг қизи, шовотлик хонанда Зулфия Йўлдошева, Баҳодир Ражабов, Нураддин Ёқубов ва яна кўплаб ёш хонандалар ҳофиз репертуаридан қўшиқлар куйлаб бердилар. Тўрткўллик ва Элликқалъалик меҳмонлар туманимиз ёш хонандалари ижодига юқори баҳо бердилар.

Тадбирнинг яна бир аҳамиятли томони шу бўлдики, залга йиғилган турли соҳага мансуб, турли ёшдаги меҳмонларнинг ҳофиз ижодига ҳурмати туманимизда санъатга қизиқиш кучли эканлигини намоён этди.

Назир қорини эслаб...

Тўйми ё бирор анжуман, келибди Назир қори деб,

Бундай хушнафас ҳофизнинг барча мухлислар зори деб,

Кўнгилни сел қилар овоз ҳамда сайраган тори деб,

Қўшиқлардан яйраб кўнгил, роҳат қиларди жонимиз,

Ноёб истеъдод эдилар, ул жонажон хушхонимиз.

У куйласа, ноласидан тинглаган барча лол эди,

Хониш қилса қай даврада, барида шу аҳвол эди,

Қай хислатин айтайин мен, бир соҳиби камол эди,

Афсус, эрта қилди риҳлат, шунда эрур армонимиз,

Ўзбек элининг булбули, ул жонажон хушхонимиз.

Суҳбатига ташна бўлган Ҳожихонлар-у Комилжон,

Устозим, дерди Отажон - ул булбули мулки Турон,

Ғойибона устоз билар кўплаб хонандалар ҳамон,

Бундайин улуғ аждодлар шараф эрур ҳам шонимиз,

Фахр бизга ҳам ифтихор, ул жонажон хушхонимиз.

Устоз иши қилар давом, эндиликда шогирдлар бош,

Энди ўзи устоз Мирза, Анвар, Тўлибой ва Йўлдош.

Мурод, Умирбек, Азамат - санасанг бўлмайди адош –

Иқтидорли ёшлар кўпдир – демак, кўпдир имконимиз,

Қўшиқларда яшар энди ул жонажон хушхонимиз.

Аҳмад НАФАСОВ.