Кекса авлод вакилларининг билим ва тажрибаси оилалар фаровонлигига хизмат қилади
Жамиятнинг барқарор ривожланиши ҳамда маънавий етук авлод тарбиясида тажрибали нуронийларнинг ўрни беқиёс. Улар ортда қолган ҳаёт йўллари давомида тўплаган билим ва тажрибаларини ёшлар билан бўлишиб, уларнинг келажакда тўғри йўлдан боришларига йўналиш берадилар. Шу сабабли юртимизда уч авлод ўртасидаги узвий боғлиқликни мустаҳкамлаш, ёшларга маънавий ва иқтисодий йўналишларда маслаҳат бериш мақсадида кўплаб лойиҳалар амалга оширилмоқда.
Шу жиҳатдан, 19 февраль куни 55-сонли мактабда ташкил этилган "Уч авлод учрашуви" тарзидаги маънавий-маърифий тадбир муҳим аҳамият касб этди. Ушбу тадбир нуронийларнинг бой ҳаётий тажрибаларидан келиб чиқиб, ёш авлодни тарбиялаш, уларга маънавий йўл кўрсатиш, иқтисодий мустақиллик сари етаклаш каби долзарб масалаларни муҳокама қилишга бағишланди.
Мазкур учрашувда Ўзбекистон Республикаси "Нуроний" жамғармаси бўлим бошлиғи Мажид Умаров, жамғарманинг Қорақалпоғистон Республикаси бўлими бошлиғи Турсунбай Абдижаббаров, жамғарманинг туман бўлими раиси Бекман Аллабергенов, маҳаллалар ва овуллардан келган ижтимоий фаол нуронийлар, ота-оналар ҳамда ўқувчи ёшлар иштирок этишди.
Тадбирни 55-сонли мактаб директори Даврон Ариков кириш сўзи билан очиб, меҳмонларни таништирди ва учрашувнинг долзарблиги хусусида фикр-мулоҳазаларини билдирди. Учрашув давомида нуронийлар жамиятда соғлом ижтимоий-маънавий муҳитни шакллантириш, маҳалла институтини янада ривожлантириш ҳамда оилалар билан ишлаш тизимини янги босқичга олиб чиқиш масалаларини атрофлича муҳокама қилишди.
Тадбир давомида асосий эътибор нуронийларнинг билим ва тажрибаларидан фойдаланиб, жамиятдаги муаммоларни ҳал қилиш, айниқса, оилаларни камбағалликдан чиқаришга хизмат қилувчи дастурларни самарали амалга оширишга қаратилди. Нуронийлар ёшларга оила мустаҳкамлиги, иқтисодий барқарорлик ва тадбиркорликни ривожлантириш борасида қимматли маслаҳатлар беришди.
Учрашув давомида "Бир нуроний – ўн ёшга масъул", "Нуроний ҳар бир оилага масъул" ҳамда "Камбағалликдан фаровонлик сари" дастурларининг аҳамияти алоҳида таъкидланди. Ушбу ташаббуслар орқали ёшларни касб-ҳунар ўрганишга йўналтириш, уларнинг иқтисодий мустақиллигини таъминлаш бўйича аниқ режалар белгилаб олинди.
Нуронийлар оилавий тадбиркорлик, ҳунармандчилик, кичик бизнес ва деҳқончиликни ривожлантириш орқали оилаларнинг молиявий ҳолатини яхшилаш масаласига алоҳида эътибор қаратишди. Улар ўз ҳаётий тажрибаларидан келиб чиқиб, кичик бизнесни қандай йўлга қўйиш, жамиятда тадбиркорлик муҳитини ривожлантириш бўйича ёшларга йўналиш беришди.
Шунингдек, маҳаллаларда хавфсиз муҳит яратиш, ҳуқуқбузарликларнинг олдини олиш тизимини самарали йўлга қўйиш борасида ҳам таклифлар билдирилди. Нуронийларнинг ёш авлод тарбиясидаги ўрни ва ижтимоий бирдамликни оширишдаги ҳиссаси алоҳида таъкидланди.
Тадбир якунида Ўзбекистон Республикаси "Нуроний" жамғармаси томонидан ижтимоий фаол нуронийларга эсдалик совғалари топширилди. Шу куни туманнинг Қиличбой мавзесидаги Аёкчи маҳалла фуқаролар йиғинида ташкил этилган "Оталар чойхонаси"да нуронийлар билан давра суҳбати ҳам ўтказилди.
Бу каби учрашувлар жамиятнинг барқарорлигини таъминлашда, ёшларни иқтисодий ва маънавий жиҳатдан етук шахс сифатида шакллантиришда муҳим ўрин тутади. Ёшлар нуронийларнинг тажрибасидан ўрганиб, ўз келажагига мустаҳкам пойдевор ярата оладилар. Тадбир давомида илгари сурилган ғоялар ёшларга нафақат иқтисодий барқарорликка эришиш, балки етук инсон сифатида шаклланиш имкониятини ҳам беради.
Ушбу учрашув шуни кўрсатдики, уч авлод ўртасидаги алоқаларни мустаҳкамлаш ва ўзаро тажриба алмашиш жамият ривожи учун муҳим омилдир. Бу каби тадбирларнинг кенг кўламда ташкил этилиши ёшларга тўғри йўл кўрсатишда муҳим аҳамият касб этиши шубҳасиз.
Шоҳзод Қурбонбоев
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
