ЯНГИ МЕҲНАТ ФАСЛИНИ БОШЛАГАН ФЕРМЕР

Бугун ҳамма далада. Айниқса, деҳқон аҳли учун қайноқ меҳнат онлари бошланаётир. Кўкламнинг ташрифини дала бағрида қарши олишга одатланган деҳқон учун ҳамал киришини кутишнинг ҳам ўзгача гашти бор. Янги деҳқончилик йили учун тузилган эзгу режаларни таҳлил қилиш орқали имконлари доирасида улуғвор марраларни кўзлаб, иш фаслини бошлаш эса янада завқли.

Бўз ёп овулидаги “Тожибоев Рустам” фермер хўжалиги раҳбари Амин Тожибоев қишлоқда туғилиб-ўсганидан, болалиги ҳам, ёшлиги ҳам бепоён далалар бағрида ўтганиданми, деҳқончилик илмини, фермер хўжалигини юритишнинг барча молиявий-иқтисодий асосларини пухта ўрганди ва ҳаётини қишлоқ хўжалигига бағишлади. Бу борада билимини ошириш мақсадида Тошкент Ирригация ва қишлоқ хўжалигини механизациялаш муҳандислари институтида таҳсил олди. Ерга меҳр бериб, асло кам бўлмади. Ўз яқинларини, қолаверса, бир неча ҳамқишлоқларини иш билан таъминлади.

Табиатан тиниб-тинчимас, ҳар бир қарич ердан унумли фойдаланишга одатланган Амин Тожибоевнинг уддабуронлиги ва ташаббускорлиги туфайли йил сайин фермер хўжалиги ерларининг мелиоратив ҳолати яхшиланиб, ҳосилдорлиги ошди. Етиштирилган қишлоқ хўжалик маҳсулотларидан олинган даромад туфайли хўжалик деҳқонларининг моддий манфаатдорлиги яхшилангани ҳамжиҳатлик муҳитини яратди. Ҳар бир деҳқончилик йили учун тузилган контрактация шартномаларини ортиғи билан адо этиб келаётган хўжалик деҳқонлари ўтган 2024 қишлоқ хўжалик йилини барча йўналишлар бўйича муваффақиятли якунладилар.

Умумий 98 гектар ерда деҳқончилик қилган фермер хўжалигида ўтган йили буғдойдан мўл ҳосил етиштирилди. 10 гектар майдондаги буғдойзор ҳосилдорлиги ҳар гектар ҳисобига 55 центнерни ташкил этди. Шартномадаги 30 тоннадан ташқари яна 30 тонна ҳосилнинг хўжалик ихтиёрида қолгани ишчиларнинг ризқи зиёда, дастурхонлари тўкин бўлишига имкон яратди. 60 гектар ерга экилган пахта ҳосилдорлиги ҳар гектар ҳисобига 30 центнерга тўғри келди ва етиштирилган ҳосил ижарачи-деҳқонларнинг ҳам, фермер хўжалигининг ҳам даромади мўл бўлишини таъминлади. Натижада хўжалик деҳқонлари ўтган қишлоқ хўжалик йилини 700 миллион сўм соф даромад билан якунладилар.

Деҳқоннинг моддий манфаатдорлиги ошса, яшаш шароитини яхшилайди, орзу-ниятларини амалга оширишга интилади. Фермер эса бор даромадини деҳқончилик маданиятини оширишга, хўжалик деҳқонларининг меҳнатини енгиллаштириш мақсадида янги техникалар ва минерал ўғитлар харид қилишга сафлайди. Амин Тожибоев ҳам шундай қилишга одатланган.

Мутахассислиги бўйича муҳандис-механик бўлган Аминбой Тожибоев техниканинг “тили”ни яхши билганидан гоҳ лизингга, баъзида йиллик соф даромадлари эвазига хўжаликнинг техника паркини янгилаш чорасини кўради. Айниқса, “Orion” русумли сурим трактори, “Hyundai” русумли экскаватор, 3 та МТЗ русумли транспорт тракторлари, шунингдек, лазерли ер текислаш техникаларининг юқори унум билан ишлатилиши натижасида хўжалик ерларининг ҳосилдорлиги кескин ошди. Аввалги паст-баланд, нотекис ер майдонлари лазерли ер текислаш техникаси ёрдамида маромига етказиб текислангач, экинларни бир текис озиқлантириш имкони яратилди.

Биз ижодий гуруҳимиз билан Наврўз байрами арафасида хўжалик далаларида амалга оширилаётган юмушлар билан танишганимизда баҳорги шўр ювиш ишлари муваффақиятли якунланиб, янги деҳқончилик йилини бошлашга қизғин тараддуд кўрилаётганига гувоҳ бўлдик. Ўғит сепиш мосламаси ёрдамида яхшилаб озиқлантирилган 10 гектар майдондаги ям-яшил буғдой майсалари баравж ўсмоқда. Барча далаларнинг четлари ободонлаштирилиб, хўжалик ҳудудидаги ариқлар, дала йўллари бўйларига тартиб билан экилган мевали ва манзарали дарахт кўчатлари кўзларни қувонтиради.

– Ерларимиз тобига келгач, экин-тикин ишларини бошлаб юборамиз, – дейди фермер Амин Тожибоев. – Бу йил 62 гектар майдонга чигит экишни режа қиляпмиз. Буғдойзорнинг ривожидан кўнглимиз тўқ. Ҳамал кирса, ишларимиз янада қизийди, сурим ишлари бошланади.

Кўкламни, ҳамални ҳамиша далада кутиб олишга одатланган “Тожибоев Рустам” фермер хўжалиги деҳқонлари учун бошланаётган янги меҳнат фасли янада баракали бўлишига шак-шубҳа йўқ. Чунки ишнинг кўзини биладиган хўжалик раҳбари билан ижарачи-деҳқонларининг ўзаро ҳамкорликдаги фаолияти боис, барча ишлар бадастир, маромига етказиб бажарилаётгани, техникалар юз фоиз экишга тайёрлаб қўйилганидан аёнки, қилинаётган ҳаракатлар албатта баракали бўлиши табиий.

РОБИЯ ЙЎЛДОШЕВА.