Тадбиркорликни қўллаб-қувватлашга қаратилган ҳуқуқий асослар кенг тушунтирилди

6 май куни Амударё тумани ҳокимлигининг мажлислар залида туман тадбиркорлари билан депутатлар учрашуви ташкил этилди. Унда Қорақалпоғистондаги тадбиркорларни қўллаб-қувватлаш мақсадида қабул қилинган Президент Фармон ва Қарорлари, Вазирлар Маҳкамаси қарорлари билан жорий этилган имтиёзлар юзасидан батафсил маълумотлар берилди ҳамда тадбиркорларнинг фикр-мулоҳазалари, мурожаат ва муаммолари тингланди.

Тадбирда Қорақалпоғистон Республикаси Жўқорғи Кенгесига Амударё туманидан сайланган депутатлар Санобар Хўжамуродова, Анвар Холимбетов, Илҳом Полвонов, Ғуломжон Ешниёзов, Алимбай Атабаев ва Қувончбой Боймуродовлар иштирок этишди. Шунингдек, ҳоким ёрдамчилари, маҳаллий тадбиркорлар ҳамда масъул мутасаддилар ҳам йиғилишда қатнашдилар.

Депутатлар томонидан тадбирда ишбилармонларга берилаётган ҳуқуқий ва иқтисодий имкониятлар, уларни амалий ҳаётга татбиқ этиш механизмлари, шунингдек, мавжуд имтиёзлардан самарали фойдаланиш йўллари ҳақида батафсил маълумот берилди.

Хусусан, депутатлар Санобар Хўжамуродова, Ғуломжон Ешниёзов ва Илҳом Полвоновлар ўз маърузаларида тадбиркорларга амалдаги ҳужжатлар билан берилган имкониятлар ва имтиёзлар ҳақида атрофлича тўхталиб ўтдилар. Таъкидланганидек, кўпгина тадбиркорлар ушбу имтиёзлардан тўлиқ фойдаланиш имконига эга бўлса-да, маълум сабабларга кўра, улардан хабардор эмас ёки тўғри фойдалана олмаяпти. Бу эса ҳудуддаги тадбиркорлик фаолиятини кенгайтиришга тўсқинлик қилмоқда.

Учрашувда Ўзбекистон Республикаси Президенти томонидан қабул қилинган бир қатор муҳим Фармон ва Қарорларда назарда тутилган имтиёзлар мазмунини атрофлича тушунтирилди. Хусусан, 2022 йил 31 августдаги Президент Фармонига асосан, 2028 йил 1 январгача Нукус шаҳридан ташқари барча ҳудудларда фаолият юритувчи тадбиркорларнинг фойда солиғи, айланмадан олинадиган солиқ, мол-мулк ва ер солиқлари ставкалари икки баробар камайтирилган. Шу билан бирга, ижтимоий солиқ 1 фоиз миқдорида тўланади.

Шунингдек, қишлоқ хўжалигига мўлжалланмаган ер участкалари электрон аукцион орқали 50 фоизга камайтирилган бошланғич баҳоларда савдога чиқарилиши, бу эса тадбиркорларга ер ресурсларига эга бўлишни осонлаштириши қайд этилди.

2023 йил 8 августда қабул қилинган Фармонга мувофиқ, кичик ва ёшлар саноат зоналарида инвестиция мажбуриятларини бажарган тадбиркорларга ер участкалари, бинолар хусусийлаштириб берилиши мумкин. Бу орқали ёшлар ва янги бизнес субъектлари ўз фаолиятини барқарор ривожлантириш имконига эга бўлмоқда.

Шу билан бирга, давлат мулки ҳисобланган бинолар 3 ой давомида сотилмаган тақдирда, улар электрон танлов орқали энг яхши таклиф билдирган талабгорга инвестиция киритиш мажбурияти билан берилиши белгилангани ҳам тадбиркорлар учун катта имкониятдир.

2020 йил 11 ноябрдаги Президент қарорига асосан, Қорақалпоғистондаги оғир шароитдаги 45 маҳаллада хизмат кўрсатиш соҳасида янгидан ташкил этилган тадбиркорлик субъектлари 2026 йил 1 январгача бир қатор солиқлардан – фойда, ер, мол-мулк, айланма ва якка тартибдаги даромад солиғидан озод этилган. Бу каби енгилликлар ишсизликни камайтириш ва хизмат кўрсатиш сифатини оширишга қаратилган муҳим қадамдир.

2022 йил 30 майдаги қарорга кўра, Қорақалпоғистон ҳудудидаги бўш турган давлат кўчмас мулк объектларини 2027 йил 1 январгача бўлиб тўлаш шарти билан харид қилиш имкони мавжуд. Шунингдек, 3 ой ичида тўлов тўлиқ амалга оширилганда, нархнинг 25 фоизигача чегирма берилиши ҳам назарда тутилган. Бу эса тадбиркорларни молиявий жиҳатдан қўллаб-қувватлашнинг самарали усули ҳисобланади.

Ўзбекистон Республикаси Вазирлар Маҳкамасининг 2024 йил 16 майдаги Қарорига мувофиқ Қорақалпоғистонда уч юлдузли тоифага ўтказиладиган меҳмонхоналарнинг ҳар бир хонаси учун Туризмни қўллаб-қувватлаш фонди ҳисобидан 20 миллион сўм миқдорида субсидия ажратилиши белгиланган.

Мулоқот давомида тадбиркорлар нафақат қонуний имтиёзлар тўғрисида аниқ ва ишончли маълумотларга эга бўлдилар, балки ўзларини қизиқтирган саволларига батафсил жавоблар ҳам олишди. Тадбир давомида кўплаб тадбиркорлар томонидан амалий таклифлар берилди ва уларнинг ижобий ҳал этилишига эътибор қаратилди. Депутатлар ва мутасаддилар ҳар бир мурожаатни диққат билан эшитиб, ҳуқуқий тушунтиришлар берди ва тегишли йўналишлар бўйича тавсиялар тақдим этдилар.

Айтиш мумкинки, мазкур учрашув Қорақалпоғистонда тадбиркорларини қўллаб-қувватлаш, уларга яратилган имкониятлар ҳақида аниқ ва манзилли ахборот етказиш, муҳокамалар орқали амалий ечимлар ишлаб чиқишда муҳим аҳамият касб этди. Ушбу ташаббуслар маҳаллий ишбилармонлик муҳитини яхшилаш, иқтисодий фаолликни ошириш ва ҳудудий тараққиётга ҳисса қўшишда катта замин яратади.

Шоҳзод Қурбонбоев.