ЁЗУВЧИ БИЛАН УЧРАШУВ

Туманимиздаги 8-сонли умумтаълим мактабида турли маънавий-маърифий мавзудаги тадбирлар тез-тез ўтказилиб турилади. Айниқса, "Мен ўқиган китоблар”, "Шоирлар мадҳида - Ўзбекистон”, "Мен севган ёзувчи” каби тадбирлар ўқувчиларнинг нутқ маданиятини ўстиришда муҳим омил бўлмоқда.

Яқинда мактаб ўқувчилари яна бир гўзал руҳда ўтган маънавий-маърифий тадбирдан олам-олам завқ олдилар. Мактабнинг собиқ ўқувчиси, иқтидорли ёзувчи, "Оқибат”, "Соғинч”, "Асранган олтин”, "Тақдир ўйинлари”, "Лафз”, "Ўқилмаган мактуб” каби ўндан ортиқ китобларнинг муаллифи Баҳодир Худойберганов билан учрашдилар. Ўқувчилар Б.Худойберганов қаламига мансуб асарлардан олган таассуротлари ҳақида тўлқинланиб сўзладилар. "Юқори қишлоқ” МФЙ раиси Комилжон Эшимматов, 8-сонли мактаб ўқитувчиларидан Наргиза Исмоилова, Зулфия Ёдгорова, "Юқори қишлоқ” МФЙ диний маърифат ва маънавий-ахлоқий тарбия масалалари бўйича маслаҳатчиси Муяссар Отажоновалар Қиличбойдан етишиб чиққан таниқли ёзувчи, детектив асарлар муаллифи Б.Худойберганов қаламга олган мавзулар ёшлар тарбиясида муҳим аҳамият касб этишини таъкидлашди.

Ўз навбатида Б.Худойберганов китобларининг ёзилиш тарихи ва ўзининг келгуси ижодий режалари ҳақида гапирди ҳамда ўқувчиларни қизиқтирган саволларга жавоб берди.

М.ЖУМАМУРОДОВ,

шу мактаб директори.