Битирувчиларга олтин ва кумуш медаллар тантанали равишда топширилди

Бугун мамлакатимизда таълим соҳасида амалга оширилаётган ислоҳотлар, ёшларга бўлган ғамхўрлик ва эътибор юртимиз равнақи, эртанги кунимиз пойдеворини мустаҳкамлаш йўлида муҳим қадам бўлиб хизмат қилмоқда. Айниқса, ҳар бир битирувчининг меҳнатини қадрлаш, уларнинг иқтидор ва интилувчанлигини алоҳида эътироф этиш жамиятимизда илм-фан, тафаккур ва изланувчанлик қадри юксак эканидан далолат беради.

Амударё туманида ҳам ана шундай эзгу анъанага содиқ қолган ҳолда, ўқув йилини юқори натижалар билан якунлаган, аъло баҳолари, намунали хулқи ва илғор тафаккури билан тенгдошларига ўрнак бўлган битирувчиларга олтин ва кумуш медаллар тантанали тарзда топширилди.

Туман Маданият бўлимида ташкил этилган ушбу байрамона тадбирда туман ҳокими Собир Хўжаметов, ҳоким ўринбосарлари, соҳа мутасаддилари, мактаб директор ва ўқитувчилари, ота-оналар, шунингдек, қалблари фахр ва ифтихорга тўла ёшлар иштирок этдилар.

Тадбирда нутқ сўзлаган туман ҳокими Собир Хўжаметов битирувчиларни самимий табриклаб, медаль соҳиблари – бу нафақат мактабда аъло баҳоларга ўқиган ўқувчилар, балки келажакда жамиятимиз тараққиётига ҳисса қўшадиган муносиб кадрлар бўлиши шубҳасиз эканлигини таъкидлаб, ёшларга юксак ишонч билдирди.

Хусусан, ёшларнинг олий таълим муассасаларига ўқишга кириб, етук мутахассислар бўлиб етишишларига, келгусида Ватанимиз равнақи, халқимиз фаровонлигини оширишга муносиб ҳисса қўшишларига, аниқ мақсадлар қўйиб, бор куч-ғайратлари ва билимлари билан халқимизга хизмат қилишларига ишонч билдирилди.

Туман ҳокими барча битирувчиларнинг келгуси ўқиш ва ишларида, шахсий ҳаётида катта ютуқ ва зафарлар тилади ҳамда фарзандларининг таълим-тарбиясига берган эътибори ҳамда масъулияти учун ота-оналар ва устоз-мураббийларга миннатдорчилик билдирди.

Ота-оналарнинг кўзларида фахр, ўқитувчиларнинг нигоҳларида ишонч, битирувчиларнинг чеҳрасида эса ўз меҳнатларидан, интилишларидан розилик завқи порлайди. Ҳар бир медаль – йиллар давомида тўпланган билим, фидойилик ва тиришқоқликнинг натижаси, ҳар бир табассум – ғурур ва масъулият ифодасидир.

Айтиш жоизки, 2024-2025 йилги ўқув йилида Амударё туманидаги умумтаълим мактабларини жами 3402 нафар ўқувчи битирган бўлса, шундан 30 нафар иқтидорли ёш олтин медаль, 7 нафар битирувчи эса кумуш медалга лойиқ деб топилди. Бу эса тумандаги таълим сифати, ўқитувчиларнинг меҳнати ва ўқувчиларнинг изланишлари ўз самарасини бераётганининг яққол исботидир.

Тадбир давомида туман Маданият бўлимининг умидли хонандалари томонидан ижро қилинган куй-қўшиқлар барча йиғилганларга юқори байрамона кайфият бахш этди.

Таъкидлаш жоизки, бугун юртимизда билимли, ташаббускор, Ватан равнақига фидойилик билан ёндашадиган янги авлод шаклланмоқда. Олтин ва кумуш медаль соҳиблари эса бу йўлда бошқаларга ўрнак, устозларига эса энг катта мукофот ҳисобланади. Юртга хизмат қилиш, билим билан тараққиётга ҳисса қўшиш – мана шундай ёшларга муносиб фазилатдир.

Чарос Арслонова, туман ҳокимлигининг Ахборот хизмати раҳбари.