Олий Мажлис Қонунчилик палатаси ва Жўқорғи Кенгес депутатлари Амударё туманида бўлишди

Мамлакатимизда олиб борилаётган кенг кўламли ислоҳотлар самараси жойларда, айниқса, оддий одамлар ҳаётида ўз аксини топиши лозим. Шу боис ҳам давлат органлари ва халқ вакиллари фаолиятида жойларга бориб, сайловчилар билан бевосита мулоқот қилиш, уларнинг дардини эшитиш, амалга оширилаётган ислоҳотларнинг реал натижаларини ўрганиш алоҳида аҳамият касб этади. Олий Мажлис Қонунчилик палатаси депутати Сапаргул Утемуратова ҳамда Жўқорғи Кенгес депутати Айсанем Бегимоваларнинг Амударё туманига амалга оширган хизмат сафари ҳам шу мақсадларга қаратилгани билан аҳамиятлидир. Ташриф давомида депутатлар томонидан ҳудуддаги мавжуд муаммолар, ижтимоий-иқтисодий ривожланиш ҳолати ва фуқароларнинг кайфияти ўрганилди, шунингдек, жойлардаги давлат ташкилотлари билан ҳамкорликда муҳим масалалар муҳокама қилинди.

Сафарнинг дастлабки манзили туман ҳокимлиги бўлиб, бу ерда маҳаллий давлат ҳокимияти органлари ва бошқа мутасадди ташкилотлар иштирокида йиғилиш ўтказилди. Йиғилишда фуқаролардан келиб тушаётган мурожаатлар, уларни ҳал этиш механизмлари, амалга оширилаётган ислоҳотларнинг туман миқёсидаги ижроси юзасидан атрофлича муҳокамалар олиб борилди. Фуқароларнинг давлат органларига бўлган ишончини ошириш учун мурожаатларга муносабатни ўзгартириш ва уларнинг ечимига эътибор қаратиш кераклиги таъкидланди.

Йиғилишдан сўнг депутатлар Бой овул маҳалласига ташриф буюришди. Бу ерда “Маҳалла еттилиги” аъзолари билан яқиндан танишилиб, уларнинг фаолиятини ўрганилди.

Маҳаллада фуқаролар билан очиқ мулоқот ташкил этилди. Суҳбат давомида маҳаллий аҳоли ўзларини қийнаётган масалаларни баён қилиб, халқ вакилларига муаммоли масалаларда мурожаат қилдилар. Сайловчилар халқ вакиллари фаолиятидан мамнун эканликларини билдириб, уларнинг юзма-юз суҳбат уюштирганидан миннатдорлик изҳор этдилар. Бундай очиқ мулоқотлар жойларда одамларнинг ҳақиқий муаммоларига ечим топишда муҳим восита бўлиб хизмат қилаётгани яна бир бор ўз тасдиғини топди.

Депутатлар хизмат сафари давомида Чордора маҳалласида жойлашган “Тамара текстиль” тикувчилик цехи фаолияти билан ҳам танишдилар. Мактаб формаларини ишлаб чиқарадиган ушбу кичик корхонада 43 нафар маҳаллий хотин-қизлар доимий иш билан таъминланган.

Цех раҳбарияти билан бўлиб ўтган суҳбатда иш жойлари сонини янада ошириш, янги тикув машиналари билан таъминлаш, маҳсулот турларини кенгайтириш каби режалар муҳокама қилинди. Депутатлар ушбу лойиҳа бошқа маҳаллаларда ҳам намуна бўлиши мумкинлигини қайд этдилар.

Сафарнинг кейинги манзили “Амударё томорқа кластери”га қарашли замонавий иссиқхона бўлди. Руфат Қурбонбоев раҳбарлигидаги мазкур иссиқхонада ҳозирги кунда турли сабзавот ва мевалар етиштирилаётган бўлиб, 10 дан ортиқ маҳаллий аҳоли иш билан таъминланган. Яқин келажакда сут маҳсулотларини ҳам ишлаб чиқариш режалаштирилаётгани маълум қилинди.

Бу каби лойиҳалар қишлоқ хўжалигини ривожлантириш, экспортбоп маҳсулотлар ишлаб чиқариш ва аҳолининг иқтисодий барқарорлигини таъминлашда муҳим аҳамиятга эга. Депутатлар давлатимиз томонидан бундай ташаббуслар қўллаб-қувватланишини, лойиҳаларни кредит ва субсидиялар орқали янада кенгайтириш лозимлигини таъкидладилар.

Халқ вакилларининг Амударё туманига хизмат сафари, шубҳасиз, жойлардаги амалий ислоҳотлар, фуқароларнинг ҳақиқий эҳтиёжлари ва давлат сиёсатининг самарадорлиги қай даражада татбиқ этилаётганини чуқур ўрганиш имконини берди. Сафар давомида депутатлар иштирокида сайловчилар билан тўғридан-тўғри мулоқот ўтказилди, тадбиркорлар фаолияти билан яқиндан танишилди ва масъул идораларга аниқ вазифалар юклатилди.

Бундай сафарлар фақат расмий ташрифлар эмас, балки давлат ва халқ ўртасидаги ишончли муносабатларни мустаҳкамлашга хизмат қилади. Унда жойлардаги муаммоларни манзилли ҳал этиш, фуқароларнинг оғирини енгил қилиш ва мамлакатда амалга оширилаётган ислоҳотларнинг ҳаётдаги аксини кўриш асосий мақсад ҳисобланади.

Шу боис халқ вакилларининг бундай ташрифлари орқали жойлардаги ижтимоий, иқтисодий ва сиёсий жараёнлар янада жадаллашиб, халқ вакиллари фаолияти орқали аҳолининг давлатга бўлган ишончи мустаҳкамланади. Бу эса, шубҳасиз, янги Ўзбекистон тараққиётининг муҳим асосларидан биридир.

Шоҳзод Қурбонбоев тайёрлади.