“Биз ёшлар “оммавий маданият” ва мафкуравий таҳдидларга қаршимиз!”

Курраи заминимизда умргузаронлик қилаётган жамики миллатлар, элатларнинг ўз яшаш тарзи, амал қилувчи қонунлари, ўз урф-одатлари бор.

Турли динга, ирққа мансуб, ўзларининг сиғинар илоҳлари мавжуд жамики халқлар учун бугунги кунда умумий бир ташвиш майдонга чиқдики, у кун сайин аҳолининг кўпроқ қисмини қамраб олаяпти, хавфли жиҳатлари тобора яққолроқ намоён бўлаяпти. Бу – ахборот соҳасидаги глобаллашувнинг салбий таъсиридир. Миллионлаб аҳолининг, айниқса, ёшларнинг интернетга боғланиб қолаётгани, турли сайтларда маънавий дунёмизни илм зиёси ила бойитувчи маълумотлардан ташқари зўравонлик, босқинчиликни тарғиб қилувчи, миллатчилик, порнографик мазмундаги маъ-лумотлар ҳам бисёрки, бу номақбул ахборотлар бугунги кунда нафақат ёшларни, ҳатто, катта ёшдаги кишиларни ҳам ўз домига тортмоқда.

Одатда биз дунёнинг бирон бурчагидаги нохуш воқеа-ҳодиса ҳақида газеталарда ўқисак, ё телевизорда кўрсак, албатта, сергак тортамиз ва сал ўтмай, кўнглимизга "фалон ёқда-ку”, деган тасалли келади, бизга дахли йўқдай туюлади. Бироқ бугунги кунда интернет тармоқларида ёритилаётган бузғунчи ғоялар, "Оммавий маданият” тарғиботи, диний-экстремистик, террористик ғоялар мамлакатимиз ёшлари учун ҳам ғоят улкан хатарларни вужудга келтираётгани бор гап.

Мутахассисларнинг аниқлашича, бугунги кунда дунё аҳолисининг 22 фоизи ижтимоий тармоқларни кузатишар экан.

Фақатгина odnoklassniki.ru ижтимоий тармоғи кунлик аудиториясининг 20 фоизини ўзбекистонлик фойдаланувчилар ташкил этар экан. "Оила даврасида” газетасининг ўтган ҳафтадаги сонида ёритилган, мана шу сайт зарафшонлик бир инсоннинг ўлимига сабаб бўлганлиги ҳақидаги хабарни ўқиган одамнинг кўнглидаги хавотири баттар ошиши, мазкур сайт кунлик аудиториясининг 20 фоизини эгаллаётган юртдошларимизнинг ҳаётига ҳам ўз салбий таъсирини ўтказмасмикан? – деган ўй қалбида ўрнашиб олиши шубҳасиз.

Ҳа, бугунги глобаллашув жараёни, ахборот-телекоммуникация технологияларининг тезкор тараққиёти ҳаётимизда ўзининг ҳам ижобий, ҳам салбий қирралари билан намоён бўлмоқда.

Ана шундай мураккаб вазиятда ёш авлод қалбида буларни етарлича таҳлил қила олиш қобилиятини шакллантириш, уларни асрлар синовидан ўтган, бой маънавий меросимиз, халқимизнинг ўзигагина хос бўлган миллий урф-одатлари, анъаналари, қадриятлари асосида тарбиялаш, интеллектуал салоҳияти юксак, қобилиятли ва илм олишга, ўрганишга иштиёқи баланд, бу борада маълум ютуқларга эришган ёшларни уларга намуна қилиб кўрсатиш, улардан ўрнак олишга ундаш орқали ёшларимизни фаол ва интилувчан қилиб тарбиялаш муҳим аҳамият касб этади.

"Менинг оилам” газетаси ижодкорлари ва "Миллий тикланиш” демократик партияси туман Кенгаши ҳамкорликда глобаллашув жараёнида ёшларни ёт ғоялардан асраш, уларни жисмоний, маънавий жиҳатдан соғлом, чуқур билимли ва замонавий билимлар эгаси қилиб тарбиялашга ҳисса қўшиш мақсадида қатор тадбирлар ўтказмоқда.

Шу йилнинг 4 июнида туман ҳокимлигида туманимизда фаолият кўрсатаётган ўрта махсус, касб-ҳунар таълими муассасалари ва Амударё академик лицейи фаол ўқувчилари иштирокида ўтказилган "Биз ёшлар "оммавий маданият” ва мафкуравий таҳдидларга қаршимиз” номли давра суҳбати ҳам ана шу мақсадга қаратилди.

Давра суҳбатига ўқувчи-ёшлардан ташқари Ўзбекистон "Миллий тикланиш” демократик партиясидан туман Кенгаши депутатлари Адилбой Юсупов, Равшан Холмуродов ва партия фаоли Рустам Ражабов, "Юсуф Эшон бобо” жомеъ масжиди имом хатиби А.Матсапоевлар иштирок этдилар.

Давра суҳбатида ёшлар билдирган фикр-мулоҳазалар улар қалбида ҳар қандай мафкуравий таҳдидларга, "оммавий маданият” ақидаларига қарши мустаҳкам ва собит маънавий иммунитет шаклланаётганини кўрсатди. Айниқса, Амударё академик лицейи ўқувчиси Севара Иброҳимова, Амударё хизмат кўрсатиш ва сервис касб-ҳунар коллежи ўқувчиси Ҳусан Йўлдошев, Иқтисодиёт коллежи ўқувчилари Азиза Мадраҳимова, Олтиной Ўринбоеваларнинг бу борадаги тушунчалари теран эканлиги намоён бўлди.

Давра суҳбатида "Юсуф Эшон бобо” жомеъ масжиди имом хатиби А.Матсапоев, туман кенгаши депутатлари А.Юсупов, Р.Холмуродовлар мавзу доирасидаги мулоҳазаларини билдириб, ўқувчи-ёшларнинг бу борадаги билимларини янада бойитдилар.

"Биз ҳар қандай мафкуравий таҳдидларга қаршимиз. Бизнинг ўз танлаган йўлимиз бор: бу - аввало илм, касб-ҳунар сирларини мукаммал эгаллаб, бизни кўзи қорачиғида асраб-авайлаб улғайтирган, ўқитиб камолга етказган ота-онамизга, Ватанимизга хизмат қилиш!”

Давра суҳбати иштирокчилари бўлган ёшларнинг бу иқрори бизни жуда севинтирди, Ватанимиз корига ярайдиган баркамол авлод камолга етаётганидан қалбларимиз ифтихорга тўлди.

Ойгул РАЖАБОВА, Маҳмуджон ШОМУРОДОВ, "Менинг оилам” газетаси махсус мухбирлари.