“Экологик маданият — соғлом келажак асоси” лойиҳаси доирасида ўқув-семинари иштирокчиларига LED лампочкалар тарқатилди

Экологик вазият билан боғлиқ муаммоларни ҳал этишга ҳисса қўшиш бугунги кунда ҳар бир онгли инсоннинг зиммасидаги энг долзарб ва кечиктириб бўлмайдиган масъулиятли вазифага айланди. Бутун дунёда рўй бераётган глобал иқлим ўзгаришлари билан боғлиқ экологик фалокатлар, инсон омили натижасидаги табиатга нисбатан шафқатсизларча муносабат туфайли содир бўлаётган мислсиз табиий йўқотишлар ҳар бир онгли инсонни ўйланиб иш қилишга даъват этади.

Ўзбекистон Республикаси Конституциясининг 62-моддасида: “Фуқаролар атроф табиий муҳитга эҳтиёткорона муносабатда бўлишга мажбурдирлар”, деб белгилаб қўйилгани халқимиз олдига нафақат ҳозирги давр инсонлари, балки келгуси авлод тақдирини ўйлаб ҳал этилиши лозим бўлган масалаларни кўндаланг қилиб қўймоқда. Чунки олимларнинг ҳисоб-китобларига кўра, ер юзини ўраб турган атмосфера қатламининг 78 фоизини азот, 21 фоизини кислород, 1 фоизини нафас олишимиз учун зарур бўлган бошқа моддалар ташкил қилар экан. Агар ана шу мувозанат бузилса, ер сайёраси ё олов ичида қолади, ё инсон яшаб бўлмайдиган маконга айланади.

Демак, табиий ресурслардан тежаб-тергаб, оқилона фойдаланиш, экологик мувозанатни меъёрида ушлаб туриш, табиатдан фақат олишни эмас, уни бойитиб боришни ҳам ҳар бир инсон ўз бурчи деб билмоғи жоиз.

Бу ҳақда Амударё туманида фаолият олиб борувчи “Жайхун илҳомлари” нодавлат нотижорат ташкилотининг Олий Мажлис ҳузуридаги Фуқаролик жамияти институтларини қўллаб-қувватлаш жамоат фонди томонидан молиялаштирилган “Экологик маданият — соғлом келажак асоси” номли лойиҳаси доирасида жорий Амударё тумани Маҳаллалар кенгаши билан ҳамкорликда ташкиллаштирилган ўқув-семинарида атрофлича фикр юритилди.

Фуқаролар йиғинлари ҳузуридаги экология ва атроф-муҳитни муҳофаза қилиш, ободонлаштириш ва кўкаламзорлаштириш бўйича комиссиялар фаолияти самарадорлигини янада яхшилаш мақсадида ташкил қилинган ўқув семинарида Амударё тумани Маҳаллалар кенгаши раиси Алишер Юлдашев сўзга чиқиб, туман ҳудудидаги овул ва маҳалла фуқаролар йиғинларида амалга оширилаётган кенг кўламли ободонлаштириш ва кўкаламзорлаштириш ишларига тўхталди. Шу билан бирга, экологик вазиятни соғломлаштиришда булар етарли эмаслигини, аҳолининг экологик маданиятини юксалтириш, хонадонларида энергия тежамкор ускуналардан фойдаланиш орқали атроф-муҳит тозалигини таъминлаш, имконияти етарли оилалар қайта тикланувчи энергия манбаларидан самарали фойдаланишлари мақсадга мувофиқлигини таъкидлади.

Шундан сўнг лойиҳа координаторлари томонидан “Экологик маданият — соғлом келажак асоси” грант лойиҳасини амалга оширишдан кўзланган мақсад ва кутилаётган натижалар хусусида батафсил маълумотлар тақдим этилди.

Мазкур лойиҳа доирасида туманимиз аҳолисининг экологик саводхонлиги ва маданиятини оширишга қаратилган амалий тадбирлар, кенг кўламли тарғибот-ташвиқот ишлари ўзининг ижобий самарасини бераётгани таъкидланди. Хусусан, аҳоли ўртасида энергия тежамкор ускуналардан фойдаланишнинг аҳамияти ҳақидаги билим ва тушунчаларни тарғиб қилиш ҳамда энерготежамкорликка чорлаш бўйича мунтазам равишда тарғибот ишлари олиб борилмоқда. Ўқув-семинари иштирокчилари бу хусусдаги ўз фикр-мулоҳазаларини баён қилишиб, таклиф ва тавсияларини билдирдилар.

Ўқув-семинари давомида аҳолини электр энергияси тежовчи ускуналардан фойдаланишга рағбатлантириш, шу орқали экологик вазиятни яхшилашга, яшил оламни асрашга, табиий ресурслардан тежаб-тергаб оқилона фойдаланишга даъват этиш мақсадида “Экологик маданият — соғлом келажак асоси” лойиҳаси доирасида ўқув-семинарининг фаол иштирокчиларига энерготежамкор LED лампочкалар тарқатилди.

Бундан ташқари семинарда фуқаролар йиғинлари ҳузуридаги экология ва атроф-муҳитни муҳофаза қилиш, ободонлаштириш ва кўкаламзорлаштириш бўйича комиссиялар фаолияти самарадорлигини янада яхшилаш мақсадида қатор таклифлар илгари сурилиб, тавсиялар берилди.

Робия Йўлдошева