“Ekologik madaniyat — sogʻlom kelajak asosi” loyihasi doirasida oʻquv-seminari ishtirokchilariga LED lampochkalar tarqatildi

Ekologik vaziyat bilan bogʻliq muammolarni hal etishga hissa qoʻshish bugungi kunda har bir ongli insonning zimmasidagi eng dolzarb va kechiktirib boʻlmaydigan masʼuliyatli vazifaga aylandi. Butun dunyoda roʻy berayotgan global iqlim oʻzgarishlari bilan bogʻliq ekologik falokatlar, inson omili natijasidagi tabiatga nisbatan shafqatsizlarcha munosabat tufayli sodir boʻlayotgan mislsiz tabiiy yoʻqotishlar har bir ongli insonni oʻylanib ish qilishga daʼvat etadi.

Oʻzbekiston Respublikasi Konstitutsiyasining 62-moddasida: “Fuqarolar atrof tabiiy muhitga ehtiyotkorona munosabatda boʻlishga majburdirlar”, deb belgilab qoʻyilgani xalqimiz oldiga nafaqat hozirgi davr insonlari, balki kelgusi avlod taqdirini oʻylab hal etilishi lozim boʻlgan masalalarni koʻndalang qilib qoʻymoqda. Chunki olimlarning hisob-kitoblariga koʻra, yer yuzini oʻrab turgan atmosfera qatlamining 78 foizini azot, 21 foizini kislorod, 1 foizini nafas olishimiz uchun zarur boʻlgan boshqa moddalar tashkil qilar ekan. Agar ana shu muvozanat buzilsa, yer sayyorasi yo olov ichida qoladi, yo inson yashab boʻlmaydigan makonga aylanadi.

Demak, tabiiy resurslardan tejab-tergab, oqilona foydalanish, ekologik muvozanatni meʼyorida ushlab turish, tabiatdan faqat olishni emas, uni boyitib borishni ham har bir inson oʻz burchi deb bilmogʻi joiz.

Bu haqda Amudaryo tumanida faoliyat olib boruvchi “Jayxun ilhomlari” nodavlat notijorat tashkilotining Oliy Majlis huzuridagi Fuqarolik jamiyati institutlarini qoʻllab-quvvatlash jamoat fondi tomonidan moliyalashtirilgan “Ekologik madaniyat — sogʻlom kelajak asosi” nomli loyihasi doirasida joriy Amudaryo tumani Mahallalar kengashi bilan hamkorlikda tashkillashtirilgan oʻquv-seminarida atroflicha fikr yuritildi.

Fuqarolar yigʻinlari huzuridagi ekologiya va atrof-muhitni muhofaza qilish, obodonlashtirish va koʻkalamzorlashtirish boʻyicha komissiyalar faoliyati samaradorligini yanada yaxshilash maqsadida tashkil qilingan oʻquv seminarida Amudaryo tumani Mahallalar kengashi raisi Alisher Yuldashev soʻzga chiqib, tuman hududidagi ovul va mahalla fuqarolar yigʻinlarida amalga oshirilayotgan keng koʻlamli obodonlashtirish va koʻkalamzorlashtirish ishlariga toʻxtaldi. Shu bilan birga, ekologik vaziyatni sogʻlomlashtirishda bular yetarli emasligini, aholining ekologik madaniyatini yuksaltirish, xonadonlarida energiya tejamkor uskunalardan foydalanish orqali atrof-muhit tozaligini taʼminlash, imkoniyati yetarli oilalar qayta tiklanuvchi energiya manbalaridan samarali foydalanishlari maqsadga muvofiqligini taʼkidladi.

Shundan soʻng loyiha koordinatorlari tomonidan “Ekologik madaniyat — sogʻlom kelajak asosi” grant loyihasini amalga oshirishdan koʻzlangan maqsad va kutilayotgan natijalar xususida batafsil maʼlumotlar taqdim etildi.

Mazkur loyiha doirasida tumanimiz aholisining ekologik savodxonligi va madaniyatini oshirishga qaratilgan amaliy tadbirlar, keng koʻlamli targʻibot-tashviqot ishlari oʻzining ijobiy samarasini berayotgani taʼkidlandi. Xususan, aholi oʻrtasida energiya tejamkor uskunalardan foydalanishning ahamiyati haqidagi bilim va tushunchalarni targʻib qilish hamda energotejamkorlikka chorlash boʻyicha muntazam ravishda targʻibot ishlari olib borilmoqda. Oʻquv-seminari ishtirokchilari bu xususdagi oʻz fikr-mulohazalarini bayon qilishib, taklif va tavsiyalarini bildirdilar.

Oʻquv-seminari davomida aholini elektr energiyasi tejovchi uskunalardan foydalanishga ragʻbatlantirish, shu orqali ekologik vaziyatni yaxshilashga, yashil olamni asrashga, tabiiy resurslardan tejab-tergab oqilona foydalanishga daʼvat etish maqsadida “Ekologik madaniyat — sogʻlom kelajak asosi” loyihasi doirasida oʻquv-seminarining faol ishtirokchilariga energotejamkor LED lampochkalar tarqatildi.

Bundan tashqari seminarda fuqarolar yigʻinlari huzuridagi ekologiya va atrof-muhitni muhofaza qilish, obodonlashtirish va koʻkalamzorlashtirish boʻyicha komissiyalar faoliyati samaradorligini yanada yaxshilash maqsadida qator takliflar ilgari surilib, tavsiyalar berildi.

Robiya Yoʻldosheva