Жамият 17.06.2015 👁 2,047

Эл хизматидаги инсон

Туманимизда эл хизмати учун жонини фидо қилишга шай инсонлар жуда кўп. Шахсан мен шундай инсонлардан бири Саъдулла ака Давлатбоев деб биламан.

Саъдулла Давлатбоев 1948 йилда Қипчоқ овулида деҳқон оиласида туғилди. Отаси Давлатбой Олланиёзов эл-юртнинг ҳар бир ишига бошчилик қилиб, ҳурматли оқсоқол сифатида "Кўка” номи билан машҳур эди. Онаси Қурбонгул меҳнаткаш, илғор пиллакор сифатида элга танилди.

Саъдулла Давлатбоев 1967 йилда Нукус қишлоқ хўжалиги техникумининг механизация бўлимини муваффақиятли тамомлаб, тумандаги "Уз сельхозтехника” корхонасида слесарь бўлиб иш бошлади. У корхонада турли вазифаларда ишлаб, меҳнатсеварлиги билан барчанинг ҳурматини қозонди.

1985 йилда шу корхонанинг раҳбари этиб тайинланди. 1987 йилда Тошкент халқ хўжалиги институти Планлаштириш факультетини сиртдан битирди. Тажрибали мутахассисни туман раҳбарияти 1995 йилда собиқ Қипчоқ ширкат хўжалигига раис этиб тайинлашди. У 1997 йилда туман ишлаб чиқариш ва таъминот корхонаси директори, 2003 йилдан бошлаб Бердақ фермерлар уюшмасининг раиси лавозимларида ишлади. 2004 йилдан Қипчоқ ўрмон хўжалиги директори лавозимида ишлаб, нафақага чиқди.

Меҳнаткаш инсон қаерда бўлмасин, ўзидан яхши ном қолдириши барчага аён. У "Узсельхоз-техника” корхонасига раҳбарлик қилган даврда қишлоқда ободонлаштириш ишлари ривожланди. Қипчоқ овули газлаштирилди, ёрдамчи хўжаликлар, янги цехлар барпо этилди.

У раҳбарлик қилган даврда Қипчоқ ширкат хўжалигида кўркам мевали боғ барпо этилди, Бердақ фермерлар уюшмасида уюшма маъмурий биноси, биолаборатория, болалар боғчаси қайта таъмирланиб, ишга туширилди. Қипчоқ ўрмон хўжалигида эса боғ, тутзорлар бунёд этилди.

Саъдулла Давлатбоев бир неча бор халқ депутатларитуман Кенгашининг депутати этиб сайланди. Юқори ташкилотлар томонидан "Фахрий ёрлиқ”лар билан мукофотланди.

Туманда кўплаб юқори лавозимларда ишлаган ва ишлаб келаётган Мақсуд Тоиров (марҳум) Ўрозбой Сафарбоев, Бозорбой Отажонов, Жангабой Эшмуродов, Соатбой Хидирбоевлар Саъдулла аканинг энг яқин шогирдлари ҳисобланишади.

Бугунги кунда Саъдулла ака 8 нафар фарзанднинг отаси, 17 невара, 4 чеваранинг суюкли бобоси.

Деҳқон фарзанди эмасми, нафақада бўлишига қарамай, боғ яратишдан, сабзавот-полиз экинларини экиб, тарбиялашдан чарчамайди. Фарзандлари ҳам ота изидан бориб, меҳнаткаш бўлиб вояга етишди. Саъдулла ака яқинда яна бир хайрли ишга қўл урди. Қишлоқ марказида яхши ният билан "Давлатбоев Фахриддин” номли аҳолига савдо ва маиший хизмат кўрсатиш шохобчаси қурилишини бошлади. Шохобча орқали аҳолига ошхона, мини маркет, тикув цехи, ёшлар салони, фото салон, пойафзал таъмирлаш хизматлари кўрсатилади. Шу орқали Саъдулла ака қишлоқ ёшларини янги иш ўринлари билан таъминлашни мақсад қилиб қўйган.

Ҳа, Саъдулла Давлатбоев ана шундай фидойи одам!