“БИЗ ГИЁҲВАНДЛИККА ҚАРШИМИЗ!”
Ўзига тўқ, бой-бадавлат оила соҳиби уй тўрида керилиб, кибр-ҳаво билан ўтирибди. Гўё ўзини бу дунёнинг барча муаммоларини ҳал этиб қўйган қаҳрамонлардай ҳис қилаётган оила соҳиби аёлидан:
- Хоним, ўғлинг кўринмайди, қизинг қаерда?-дея сўради.
Қаранг, "ўғлимиз, қизимиз”, деяётгани йўқ. Худди оилада оталик мажбуриятини ҳам аъло даражада бажариб қўйгандай, ўз рафиқасига ҳам кибр-ҳаво билан савол бераётир. Ўғил билан қиз эса (ҳаддан ташқари эркатойлиги билиниб турибди) ота-онасига салом бериш, ҳол-аҳвол сўрашиш ўрнига худди келишиб олишгандай, дастурхонга ўтирмаслариданоқ пул сўрашди. Ота жим, она эса эрига ялтоқланиб:
- Отаси, берақолинг, курсдошлари билан "ўтириш”и бор экан, - шугина пул не бўпти, қабилида эрини кўндиришга овора. Бойвачча эр эса: "пул нимага, қандай эҳтиёж учун зарур?”-дея сўрашни ҳам ўзига эп кўрмади шекилли:
- Пулми, мана! – дея ўғлига ҳам, қизига ҳам нақ "кўк”идан 50 таликни тутқазди ва керилиб қўшиб қўйди. – Бош-кўзингнинг садақаси, байрамда бир ҳузур қилинглар.
"Байрамда ҳузур қилган” ўғил билан эрка қиз бири ярим тунда, бири эса тонгда ширакайф бўлиб қайтишди.
Кунлар шу тахлит ўтди. Ота-она ўғил-қизининг раъйини қайтаришмади. Истаганини муҳайё қилишди. Оқибатда эса... Қизнинг ҳаёти издан чиқди, ўғил гиёҳвандликка ружу қўйди. Аввал кайфиятини кўтариш учун қора оғуни тортган бўлса, энди бутун жисм-у жонини оташ-оловдай қақшатаётган хумор хуружини босиш учун доимий истеъмол қилишга ўтди. Оз-оздан бошланган истеъмол қилиш майли ўғилни қип-қизил нашавандга айлантириб, алал-оқибат бу оила учун катта фожиага айланди. Ҳали ўн гулидан бир гули очилмаган барваста, кўркам йигитнинг жасади устида қон қақшаб фарёд чеккан ота-онанинг на мол-давлати, на афсус ва надомати фарзандини ўлимдан асраб қолгани йўқ...
Туманимиз ёшлари – Амударё қишлоқ хўжалик, Амударё хизмат кўрсатиш ва сервис касб-ҳунар коллежлари ҳамда Манғит иқтисодиёт коллежи талабалари томонидан маромига етказиб ижро этилган юқоридаги саҳна кўриниши орқали маънавий ҳаётимиздаги бўшлиқ – оилада ота-онанинг тутган ўрни, пул-бойлик топиб, фарзанд тарбияси борасида ақл-у билим топмагани, лоқайдликка берилиб, фарзандларини моддий жиҳатдан таъминлаб, маънавий тарбия беролмаганликларини ҳаққоний кўрсатиб бера олишди.
"XXI аср вабоси” номини олган ва умумбашарий глобал муаммога айланган гиёҳвандлик ва гиёҳванд моддалар ишлаб чиқаришга қарши кураш тобора авж олиб, ушбу иллатга қарши кураш йўлида мамлакатлар, миллатлар ва элатлар бирлашиб ҳаракат қилаётган бир пайтда ёшларнинг бу муаммо ечимини топишга интилиши барчани тўлқинлантириб юборди.
Шу баробарида ота-онанинг вазифаси фарзандини моддий жиҳатдан таъминлашдан кўра, уларга берадиган маънавий сабоғи барча нарсадан муҳимлигини таъкидлашди.
Туман маданият ва спорт ишлари бўлими, Ўзбекистон Миллий тикланиш демократик партияси туман Кенгаши, Манғит иқтисодиёт, Амударё қишлоқ хўжалик, Амударё хизмат кўрсатиш ва сервис касб-ҳунар коллежларининг ўқувчи-ёшлари томонидан ташкил этилган ва 26 июнь – Халқаро гиёҳвандликка қарши кураш куни муносабати билан ўтказилган тадбирда туманимизда фаолият юритаётган учта ўқув масканининг иқтидорли ёшлари нафақат саҳна кўринишлари, балки гиёҳвандликка қарши кураш мавзусидаги ўз фикрлари билан ҳам тадбирда фаол иштирок этишди.
- Бутун дунёда, - деди тадбирда сўзга чиққан ЎзМТДП туман Кенгаши раиси ўринбосари Ширин Янгибоева – кунига 200 минг нафар гиёҳванд одам вафот этаётир. Бирлашган Миллатлар ташкилотининг хабарларига кўра, фақат 2009 йилнинг ўзида дунё миқёсидаги гиёҳвандлик билан боғлиқ жиноий фаолият 2,1 триллион долларни ташкил этган. Демак, биз бу оғуга қарши ҳар лаҳзада огоҳлик билан кураш олиб бормоғимиз даркор.
- "Биз гиёҳвандликка қаршимиз!” – қўлларини бирлаштириб, жўровоз бўлиб қайта-қайта такрорлашди ёшлар.
Амударё хизмат кўрсатиш ва сервис касб-ҳунар коллежи талабалари томонидан тайёрланган кўргазмали деворий газета орқали шундай маълумотларга алоҳида урғу берилди:
- БМТ хабарига кўра, дунёда 150 млн. одам каннабис гиёҳванд моддасига ружу қўйган;
- 13 млн. киши кокаин истеъмол қилади;
- 10 млн. одам эса ашаддий героин истеъмолчисига айланиб улгурган.
Нафақат бир-бирининг қўлларидан тутган, балки бу гиёҳвандлик балосига қарши кураш борасидаги мақсадлари ҳам бирлашиб, XXIаср вабоси – гиёҳвандлик ва гиёҳванд моддалар ишлаб чиқарилишига қарши бўлган туманимиз ёшлари жамиятимиз равнақи, баркамол авлод тарбияси йўлида барча ғовларга қалқон бўлажакларини ўтказилган тадбир руҳига сингдира олишди.
Тадбирда ўқувчи-ёшлар томонидан ижро этилган ёшликни, бахт-саодатни, тинчликни тараннум этувчи куй-қўшиқлар, ватанпарварлик руҳидаги шеърлар ҳар бир кўнгилга хушнудлик бағишлади.
Тадбир якунида учала ўқув масканининг аълочи ва жамоатчи ўқувчи-ёшларига ЎзМТДП туман Кенгашининг Фахрий ёрлиқлари топширилди.
***
Шу куни Манғит иқтисодиёт коллежи ўқувчиси Азиза Мадраҳимованинг яқинда, "Хоразм” нашриётида нашрдан чиққан "Баҳордан дарак” рисоласининг тақдимот маросими ҳам бўлиб ўтди.
Маросимда сўзга чиққан адабиёт ихлосмандлари Азиза Мадраҳимова қаламига мансуб шеърларнинг маънавий-маърифий аҳамияти ҳақида гапириб, ёш ва умидли қаламкашга ижодий баркамоллик тиладилар.
Робия ЙЎЛДОШЕВА.
(Фото - http://uz24.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
