“Биз коррупцияга қаршимиз!” номли грант лойиҳаси доирасида Қиличбой ОФЙда давра суҳбати ташкил этилди

Коррупцияга қарши курашиш — фақат давлат идораларининг эмас, балки бутун жамиятнинг вазифасидир. Мамлакатимизда мазкур иллатнинг олдини олиш, аҳоли ўртасида ҳуқуқий онг ва ҳуқуқий маданиятни юксалтиришга қаратилган кенг қамровли чора-тадбирлар амалга оширилмоқда.

Хусусан, Ўзбекистон Республикаси Олий Мажлиси ҳузуридаги Фуқаролик жамияти институтларини қўллаб-қувватлаш жамоат фонди томонидан молиялаштирилган “Биз коррупцияга қаршимиз!” номли грант лойиҳаси доирасида “Тараққиёт кўзгуси” газетаси таҳририяти ташаббуси билан жойларда маънавий-маърифий тадбирлар, давра суҳбатлари ташкил этилмоқда.

Шу каби тадбирлардан бири яқинда Қиличбой овул фуқаролар йиғини маъмурий биносида бўлиб ўтди. Унда ҳуқуқшунослар, жамоатчилик фаоллари ва маҳаллий аҳоли вакиллари иштирокида жамиятда коррупцияга нисбатан ҳуқуқий иммунитетни шакллантириш масалалари муҳокама қилинди.

Тадбирда Халқ депутатлари туман Кенгаши депутати Хонимжон Ражабова, “Мадад” нодавлат нотижорат ташкилоти Амударё тумани ҳуқуқий маслаҳат бюроси бош мутахассиси Даврон Пирмонов, Қиличбой ОФЙ раисининг Нуронийлар масалалари бўйича маслаҳатчиси Амина Юсупова, “Тараққиёт кўзгуси” газетаси махсус мухбири Робия Йўлдошева, лойиҳа координаторлари, маҳаллий аҳоли вакиллари ҳамда ёшлар иштирок этди.

Учрашув аввалида лойиҳа координаторларидан бири, журналист Шоҳзод Қурбонбоев “Биз коррупцияга қаршимиз!” лойиҳасининг мақсад ва вазифалари, кутилаётган натижалари, аҳоли онгида коррупцияга нисбатан муросасиз муносабатни шакллантиришга қаратилган ёндашувлар ҳақида иштирокчиларга батафсил маълумот берди.

Шундан сўнг “Тараққиёт кўзгуси” газетаси махсус мухбири Робия Йўлдошева сўзга чиқиб, коррупциянинг тарихий илдизлари, ижтимоий-иқтисодий оқибатлари, манфаатлар тўқнашуви, уруғ-аймоқчилик, фирибгарлик ва порахўрлик каби иллатларнинг келиб чиқиш сабаблари тўғрисида ҳаётий мисоллар орқали кенг тушунча берди. Шунингдек, коррупцияга қарши курашишнинг энг самарали йўли — жамият аъзолари онгида ҳуқуқий иммунитетни шакллантириш лозимлиги алоҳида таъкидланди.

Мулоқот давомида “Мадад” нодавлат нотижорат ташкилоти Амударё тумани ҳуқуқий маслаҳат бюроси бош мутахассиси Даврон Пирмонов сўзга чиқиб, сўнгги йилларда мамлакатимизда коррупциянинг олдини олиш ва унга қарши курашиш бўйича амалга оширилаётган ислоҳотлар, хусусан, давлат ва жамият қурилишида коррупциявий омилларга чек қўйиш, бюрократик тўсиқларни бартараф этиш, “яширин иқтисодиёт”ни қисқартириш бўйича амалга оширилаётган ишлар юзасидан атрофлича маълумот берди.

Шунингдек, “Коррупцияга қарши курашиш тўғрисида”ги ва “Манфаатлар тўқнашуви тўғрисида”ги Қонунлар қабул қилиниб, бу борада давлат сиёсати йўналишлари аниқ белгилаб олинганини таъкидлаб,  тадбир иштирокчиларига коррупция билан боғлиқ ҳуқуқбузарликлар, порахўрлик ва манфаатлар тўқнашувининг ҳуқуқий тавсифи ҳамда уларнинг олдини олиш бўйича амалий чоралар ҳақида тушунчалар берилди.

Бундан ташқари, “Мадад” нодавлат нотижорат ташкилоти Амударё тумани ҳуқуқий маслаҳат бюроси фаолияти ва аҳолига кўрсатиладиган хизматлар хусусида ҳам иштирокчиларга атрофлича маълумот тақдим этилди.

Учрашув давомида сўзга чиққан Халқ депутатлари туман Кенгаши депутати Хонимжон Ражабова коррупция жамият ҳаётидаги энг хатарли иллатлардан бири эканини таъкидлар экан, унинг ижтимоий-иқтисодий оқибатлари мамлакат тараққиёти ва халқ фаровонлигига жиддий салбий таъсир кўрсатаётганини алоҳида қайд этди.

Коррупция давлат органларига нисбатан ишончни сусайтириб, жамиятда адолат мезонларининг бузилишига, имкониятлар тенгсизлигининг юзага келишига, энг асосийси эса фуқароларда беқарорлик туйғуларининг кучайишига сабаб бўлади. Шунингдек, ҳар қандай ҳолатда ҳам жиноят жазосиз қолмаслиги, жавобгарликнинг муқаррарлиги таъкидланди.

Тадбир якунида Қиличбой ОФЙ раисининг Нуронийлар масалалари бўйича маслаҳатчиси Амина Юсупова ва бошқалар сўзга чиқиб, шундай муҳим ва долзарб мавзу юзасидан ўтказилган учрашув учун тадбир ташкилотчиларига самимий миннатдорлик билдирди. Шунингдек, бу каби тарғибот тадбирларини мунтазам ўтказиш орқали аҳолининг ҳуқуқий онги ва фуқаролик масъулиятини ошириш, давлат хизматчилари фаолиятининг очиқ ва шаффофлиги таъминланиши таъкидланди.

Коррупцияга қарши курашда жамоатчилик назорати, ҳуқуқий онг ва фуқаролик масъулиятини ошириш ҳал қилувчи аҳамиятга эга. Шу боис, бундай маънавий-маърифий тадбирлар нафақат ҳуқуқбузарликларнинг олдини олиш, балки жамиятда ҳалоллик, адолат ва қонунийлик тамойилларини қарор топтиришда муҳим аҳамият касб этади.

Шоҳзод Қурбонбоев, лойиҳа координатори.