Амударё туманида кузги шудгорлаш ишларини сифатли ташкил этишга алоҳида эътибор қаратилмоқда

Қишлоқ хўжалигида келгуси йил ҳосилининг мўл ва сифатли бўлиши, аввало, ерга ўз вақтида ва агротехника талабларига мувофиқ ишлов беришга боғлиқ. Шу боис кузги шудгорлаш тадбирларини белгиланган муддатларда, сифатли ва самарали ташкил этиш аграр соҳа олдида турган муҳим вазифалардан бири ҳисобланади.

Шу муносабат билан Амударё тумани Тўлқин овули ҳудудидаги «Амат Тўраев» фермер хўжалиги экин майдонида 2027 йил ҳосилига тайёргарлик кўриш мақсадида ерларни кузги шудгорлаш масалаларига бағишланган амалий семинар бўлиб ўтди.

Унда туман ҳокими Собир Хўжаметов, секторлар раҳбарлари, ҳоким ўринбосари, қишлоқ хўжалиги соҳаси масъуллари ҳамда фермер хўжаликлари раҳбарлари иштирок этди.

Семинарда кузги шудгорлашнинг келгуси ҳосилдорликни таъминлашдаги ўрни, агротехник тадбирларни белгиланган муддатларда амалга ошириш, мавжуд техникалардан унумли фойдаланиш ҳамда ерга сифатли ишлов бериш масалалари атрофлича муҳокама қилинди.

Тадбир давомида таъкидланганидек, ерларни сифатли ва юқори унум билан шудгорлаш учун трактор ва плугларни олдиндан техник кўрикдан ўтказиш, ишга шай ҳолатга келтириш, ҳайдаладиган майдонларни тайёрлаш ҳамда шудгорлаш жараёнини тўғри ташкил этиш талаб этилади.

Шунингдек, бажарилаётган ишлар сифати доимий назорат қилиб борилиши зарур. Зеро, сифатли шудгорланган майдонларда шўр ювиш, эрта баҳорда тупроққа ишлов бериш ва экиш ишларини агротехник талаблар асосида ўз вақтида амалга ошириш учун зарур шароит яратилади.

Туман ҳокими Собир Хўжаметов ўз сўзида туманда кузги шудгорлаш ишларини тизимли ташкил этиш, мавжуд техника ва ресурслардан самарали фойдаланиш, фермер хўжаликлари ўртасида ҳамкорликни кучайтириш ҳамда белгиланган режалар ижросини таъминлаш юзасидан тегишли тавсия ва кўрсатмалар берди.

Маълумотларга кўра, туманда 2027 йил ҳосили учун жами 12 минг гектар майдонда кузги шудгорлаш ишларини амалга ошириш режалаштирилган. Ушбу жараёнга 329 та фермер хўжалиги жалб этилиб, 71 та юқори унумли ҳайдов техникаси билан таъминланган. Мавжуд техникалар 23 та сурим отрядига бириктирилган.

Шудгорлаш ишларини белгиланган муддатларда якунлаш мақсадида 25 октябрдан 10 ноябрга қадар бўлган давр учун аниқ иш графиклари ишлаб чиқилган. Режага мувофиқ, кунлик 162 гектар майдонда, мавсум давомида эса белгиланган 12 минг гектар ерда шудгорлаш ишларини амалга ошириш кўзда тутилган.

Мавжуд маълумотларга кўра, мавсум бошидан шу кунгача жами 1 884 гектар майдонда, яъни умумий режанинг 16 фоизида шудгорлаш ишлари бажарилган. Жараёнга 28 та техника жалб этилган.

Семинар доирасида шудгорлаш ишларини жадаллаштириш, техникалардан самарали фойдаланиш, кунлик иш унумдорлигини ошириш ва бажарилаётган агротехник тадбирлар сифатини таъминлаш масалаларига алоҳида эътибор қаратилди.

Таъкидлаш жоизки, кузги шудгорлаш ишларининг ўз вақтида ва сифатли бажарилиши нафақат келгуси йил ҳосилдорлиги, балки тупроқ унумдорлигини сақлаш, сув ресурсларидан оқилона фойдаланиш ҳамда қишлоқ хўжалиги ишлаб чиқаришининг барқарорлигини таъминлашда ҳам муҳим аҳамият касб этади.

Шу боис туманда белгиланган агротехник тадбирларни ўз муддатида ва сифатли бажариш, фермер хўжаликлари масъулиятини ошириш ҳамда кузги шудгорлаш мавсумини белгиланган режа асосида якунлаш борасидаги ишлар давом эттирилмоқда.

Чарос Арслонова, Амударё тумани ҳокимлигининг Ахборот хизмати раҳбари.