Амударё туманида кузги мавсумда 829 минг кўчат экилади

Табиатни асраш, яшил майдонларни кенгайтириш ва иқлим ўзгаришининг салбий таъсирини юмшатиш бугунги кунда давлат сиёсатининг узоқ муддатга мўлжалланган йўналишларидан бири бўлиб, бу борада қабул қилинаётган ҳужжатлар кўчат экиш ишларини мавсумий тадбирдан тизимли вазифа даражасига олиб чиқмоқда. Шу йўналишдаги ишларнинг асосий ўзаги — «Яшил макон» умуммиллий лойиҳаси бўлиб, у ҳар йили баҳор ва куз мавсумларида аниқ кўрсаткичлар асосида давом эттирилади.

Ўзбекистон Республикаси Президентининг «Яшил макон» умуммиллий лойиҳасини амалга оширишда маҳаллалар ролини кучайтириш ва ҳудудларнинг яшиллик даражасини тубдан оширишга доир чора-тадбирлар тўғрисида»ги фармони билан 2026 йил куз мавсумида лойиҳа доирасида манзарали ва мевали дарахт, бута кўчатлари ҳамда қаламчаларини экишнинг прогноз кўрсаткичлари тасдиқланди.

Ҳужжатда белгиланган вазифалардан келиб чиқиб, жорий йилнинг 1 октябридан бошлаб яшил ҳудудлар жойлашувини аниқлаш, экишга мўлжалланган ерларни тайёрлаш, кўчат ва бута захирасини яратиш бўйича амалий чоралар кўрилди. Бу иш кузги мавсумнинг асосий босқичига пухта тараддуд кўриш, яъни ер майдонлари ва кўчат захираси масаласини мавсум бошланишига қадар ҳал қилиш имконини берди.

Қорақалпоғистон Республикасида кўчат ва буталарни экиш мавсуми 2026 йил 1 ноябрдан бошланди. Шунга мувофиқ ҳудуддаги барча туманларда экиш ишлари белгиланган прогноз кўрсаткичлари асосида, тасдиқланган жадвалга мувофиқ ташкил этилмоқда.

Амударё туманида «Яшил макон» умуммиллий лойиҳаси доирасида 2026 йил кузги экиш даврида 829 минг туп кўчат экиш белгиланган бўлиб, бу мақсадда 50,4 гектар ер ажратилди ҳамда айни кунларда майдонларни экишга ҳозирлаш ва экиш ишлари жадал олиб борилмоқда. Белгиланган кўрсаткич ва ажратилган майдон ҳажми экиш ишларининг кенг қамровда, изчил тарзда ташкил этилишини талаб этади.

Шу билан бирга, Ўзбекистон маҳаллалари уюшмаси ҳамда Экология ва иқлим ўзгариши миллий қўмитасининг таклифига биноан 1 октябрдан бошлаб республикада тозалик ва озодалик долзарб икки ойлиги ўтказилмоқда. Бу тадбир кўчат экиш ишлари билан бир вақтда, уйғун ҳолда амалга оширилмоқда.

Экология ва иқлим ўзгариши миллий қўмитасининг Қорақалпоғистон Республикаси Амударё тумани бўлими ходимлари ҳам бу борада фаол ҳаракатлар олиб бормоқда. Икки ойлик доирасида ҳудудларни тозалаш, кўкаламзорлаштириш ва аҳоли ўртасида экологик маданиятни шакллантиришга қаратилган ишлар уюшқоқлик билан давом этмоқда.

Қайд этиш жоизки, фармон асосида маҳаллаларнинг ролини кучайтириш кўчат экишни фақат ташкилотлар зиммасидаги вазифа эмас, балки аҳоли билан биргаликда амалга ошириладиган умумий ҳаракат сифатида қарашга замин яратмоқда. Шу тариқа ҳар бир маҳалла ўз ҳудудининг яшиллик даражаси учун масъул бўлади ҳамда бу ишга бевосита қизиқиш билан қарайди.

Экилган ҳар бир ниҳолнинг илдиз отиб, кўкариб кетиши ушбу ишларнинг ҳақиқий натижасини белгилайди — шу боис экиш билан бир қаторда парвариш масаласи ҳам доимий эътиборда туради. Яшил майдонларнинг кенгайиши эса ҳудуд ҳавосининг мусаффолиги, иқлим барқарорлиги ва аҳолининг соғлом турмуш муҳити учун узоқ йилларга хизмат қиладиган пойдевор бўлиб қолади.