БУНДАЙ ДИЁР ҚАЙДА БОР!
Инсон ёши улғайган сари босиб ўтган ҳаёт йўлининг сарҳисобини қилиб, ўзи гувоҳ бўлган воқеа-ҳодисаларни тез-тез хотирлайвераркан. Шунинг учун айтсалар керак-да, кексалик – инсон умрининг энг ҳаққоний хулосалар чиқарадиган палласи, деб.
Менинг болалик даврим Иккинчи жаҳон урушидан олдинги қатағон йилларида кечган. Ҳар куни бир шум хабар эшитиб, юрагимиз безилларди. Гоҳ ён қўшнимизни, гоҳ ўқитувчиларимизни ёки овул-элатнинг бирон бир обрў-эътиборли кишиларини қамоққа олишарди. Бирга ўйнайдиган жўраларимнинг кўпчилиги бир кунда "халқ душманининг ўғли”га айланиб қолиб, камситилганларига гувоҳман.
Ўтган умр йўлларимизнинг аччиқ саҳифалари кўп бўлган. Уруш ва тикланиш йилларидаги халқ чеккан азоб-уқубатлар, иқтисоди тамоман ўтириб қолган совет давлатининг шаҳар-у қишлоқларида аҳвол жуда оғир эди.
Мен ўзим ҳаётимда юз, балки минг бора гувоҳ бўлган воқеаларни кўз олдимга келтириб, мустақил Ўзбекистонимизнинг бугунги тарраққиётини, ривожланиш суръатини том маънода мўъжиза дегим келаверади. Мамлакатимиз дунёнинг иқтисодиёти тез ривожланаётган давлатлари рейтингида 5-ўринни эгаллаганининг ўзи мустақил Ўзбекистонимизнинг порлоқ ке-лажагидан яққол далолатдир. Энг қувонарлиси шундаки, ижтимоий тадқиқотлар натижасига кўра "Бутунжаҳон бахт индекси”да Ватанимиз 158 та мамлакат орасида 44-поғонани, МДҲ мамлакатлари орасида эса фахрли 1-ўринни эгаллаб тургани истиқлол шарофати билан юртимизда инсон омилига берилаётган эътибор, унинг ҳар томонлама бахтли яшаши учун яратилаётган шароитларнинг ифодасидир.
Мен салкам 90 ёшдаман. Умрим бино бўлиб, ҳаётимизнинг барча жабҳаларида бунингдек ўзгариш ва ривожланишни кўрмаганман. Кун сайин қиёфаси ўзгариб, гўзаллашиб бораётган овуллар, мўл-кўл ризқ-насибамизни кўксида тутиб, ҳосилдан тўлишаётган далалар, оилалардаги тўкинлик, файз-барака, кекса-ю ёш, турли миллат вакилларининг давлат ғамхўрлигидан баҳраманд, осойишта, тинч-тотув яшаётганини кўриб, шундай заминда туғилганимдан, шундай Ватанга фарзанд эканлигимдан кўксим ғурур ва ифтихорга тўлади.
Замини, ҳаволари ўзгача, меҳнаткаш ва фидойи, меҳмондўст халқи ўзгача, урф-у одати, маънавияти ва маданияти ўзгача, бетакрор ва гўзал Ватаним би-ан ҳамиша фахрланаман. Ана шу фахр ва ифтихор туйғулари ила баралла айтаман:
- Бетакроримсан, ягонасан, она Ватаним – Ўзбекистоним!
Сафарбой ШОМУРОДОВ, фахрий журналист.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
