Ёшлар билан очиқ мулоқотда аниқ вазифалар белгиланди

Ёш авлоднинг касб танлаши, меҳнат бозорига кириши ва ўз салоҳиятини рўёбга чиқариши — бугунги ижтимоий сиёсатнинг энг устувор йўналишларидан бири бўлиб, бу борада ҳудудларда олиб борилаётган ишларнинг самарадорлиги кўп жиҳатдан раҳбарлар билан ёшлар ўртасидаги бевосита мулоқотнинг қанчалик мазмунли ташкил этилганига боғлиқ.

Маълумки, ёшларнинг бандлигини таъминлаш фақат бўш иш ўринларини топиш билан чекланмайди. Ҳар бир йигит-қизнинг қизиқиши, олган таълими ва келажакка оид мақсадини инобатга олган ҳолда йўналтириш, зарур бўлса касб-ҳунарга ўқитиш ёки тадбиркорлик фаолиятига жалб этиш талаб этилади. Бу эса ҳар бир ёш билан алоҳида ишлашни, унинг имкониятини ва эҳтиёжини аниқ билишни талаб қиладиган мураккаб жараёндир.

Шу мақсадда Амударё туманида республика миқёсидаги раҳбарлар иштирокида ёшлар билан учрашувлар ташкил этилди. Мазкур мулоқотлардан асосий кўзланган мақсад — ёшларнинг бандлигини таъминлаш, уларнинг муаммо ва таклифларини ўрганиш, иш билан таъминлаш ҳамда келажакдаги касбий фаолиятини йўлга қўйиш борасида амалий кўмак беришдан иборат бўлди.

Учрашувлар тумандаги Тўлқин, Хитой ҳамда Ўртақалъа овул фуқаролар йиғинлари биноларида бўлиб ўтди. Уларда мазкур ҳудудлар ва уларга яқин маҳаллалардан 70 нафарга яқин ёшлар иштирок этди. Учрашувларнинг бир эмас, уч жойда ўтказилиши эса тумандаги турли ҳудудларда яшовчи ёшларни қамраб олиш имконини берди.

Учрашувларда 2026 йилда олий таълим ва профессионал таълим муассасаларини, шунингдек, умумтаълим мактабларини тамомлаган битирувчилар ҳамда ҳозирда ишсиз бўлган ёшлар билан юзма-юз фикр алмашилди. Тадбирда Қорақалпоғистон Республикаси Вазирлар Кенгаши раисининг ўринбосари Байрам Отемуратов, Қорақалпоғистон Республикаси Солиқ бошқармаси бошлиғи Эркин Нурмонов, Амударё тумани ҳокими Собир Хўжаметов, ҳоким ўринбосарлари ҳамда тумандаги барча ташкилот ва идоралар раҳбарлари қатнашди. Бу эса кўтарилган ҳар қандай масала бўйича жавобгар мутасадди билан бевосита ўша ернинг ўзида мулоқот қилиш шароитини яратди. Натижада ёшлар саволига жавоб олиш учун идорадан идорага юришга ҳожат қолмади.

Мулоқот давомида ёшларнинг бандлигини таъминлаш, уларни мавжуд бўш иш ўринларига жойлаштириш, касб-ҳунарга йўналтириш, тадбиркорлик фаолиятига жалб этиш ҳамда ўз қизиқиши ва салоҳиятини рўёбга чиқариш имкониятлари муҳокама қилинди.

Шу ўринда айтиш керакки, учрашувларнинг овул фуқаролар йиғинлари биноларида, яъни ёшларнинг ўзлари яшаб турган ҳудудда ўтказилиши мулоқотнинг эркин ва очиқ кечишига хизмат қилди ҳамда масофа туфайли иштирок этиш имкони бўлмаган ёшлар муаммоси ҳам ўз-ўзидан бартараф этилди. Одатда марказдаги йиғинларга бориш учун вақт ва йўл харажати талаб этилишини ҳисобга олсак, бу усулнинг қулайлиги яна ҳам аён бўлади.

Ҳар бир ёшнинг мурожаати ва таклифи алоҳида тингланиб, мавжуд муаммолар атрофлича таҳлил этилди. Бу жараён расмий ҳисобот тарзида эмас, балки ҳар бир иштирокчи ўз фикрини тўлиқ айтиб олиши учун етарли вақт ажратилган ҳолда ташкил қилинди.

Билдирилган масалалар юзасидан тегишли ташкилот ва идоралар раҳбарларига уларнинг ечимини топиш, ёшларни қўллаб-қувватлаш ҳамда бандлигини таъминлаш бўйича зарур чораларни кўриш юзасидан аниқ вазифалар белгиланди.

Учрашувларда ёшларни тадбиркорликка жалб этиш масаласига ҳам алоҳида эътибор қаратилди. Ўз ишини бошлашга интилаётган йигит-қизлар учун мавжуд имкониятлар, шу жумладан молиявий кўмак ва ўқув-амалий ёрдам тартиблари тушунтирилди. Чунки ёшларнинг кўпчилиги мавжуд имтиёз ва қулайликлар ҳақида тўлиқ маълумотга эга бўлмаслиги сабабли улардан фойдаланмай қолади. Шу боис бундай учрашувларда имкониятларни оддий ва тушунарли тилда тушунтириб бериш алоҳида аҳамият касб этади.

Бундан ташқари, мулоқот чоғида ёшларнинг ўзларидан келиб тушган таклифлар ҳам инобатга олинди. Бу эса кейинги ишларни режалаштиришда ҳудуддаги реал ҳолатдан келиб чиқиб иш юритиш, қоғозда эмас, амалда натижага эришиш имконини берадиган муҳим восита ҳисобланади.

Хулоса қилиб айтганда, мазкур учрашувлар ёшларнинг овозини бевосита эшитиш, уларнинг эҳтиёжини ҳужжатлар орқали эмас, юзма-юз суҳбатда аниқлаш йўлидаги амалий қадам бўлди. Белгиланган вазифаларнинг ижроси ва ҳар бир мурожаатнинг ўз ечимини топиши эса ёшларни жамиятимизнинг фаол аъзоларига айлантиришда муҳим омил саналади. Зеро, ёшлар билан ишлашда асосий мезон — ўтказилган тадбирлар сони эмас, балки ҳал этилган масалалар миқдоридир.