Янги йилингиз қутлуғ бўлсин!

Ассалому алайкум, юртимизнинг ҳар бир осуда тонгини эзгу ниятлар билан қарши олиб, бутун куч-ғайратини, салоҳиятини шу азиз Ватанимиз равнақига ҳисса қўшишга бахшида этаётган азиз юртдошлар!

Мана, мамлакатимиз тарихида ўзига хос из қолдирган 2015 йил ҳам поёнига етиб бормоқда. Ўтаётган ҳар бир дақиқа бизни янги 2016 йилга яқинлаштирмоқда. Бундай ҳаяжонли лаҳзаларда одам йил мобайнида босиб ўтган изига назар ташлайди, ўз меҳнатлари натижасини сарҳисоб қилади, янги йилда ўзини янада эзгу, улкан ишларга, хайрли амалларга чоғлайди.

Сиз азизлар билан газетанинг жорий йилдаги охирги сонида ғойибона дийдорлашиш, ўз меҳнатимиз маҳсули – янги сонни ёруғ юз билан ҳукмингизга ҳавола этар эканмиз, ўйлаймизки, "Тараққиёт кўзгуси” ва унинг иловаси "Менинг оилам” газеталари кўнглингизга энг яқин нашрлар бўлди. Газеталар саҳифаларидан туманимиз ҳаётига оид холис, тезкор ва ҳаққоний ахборотлар олиш билан бирга ижтимоий муаммолар ҳақида мушоҳада юритилган мақолалар, туманимиз ижодкорларининг ижодидан намуналар билан танишиб бордингиз.

Шуниси диққатга сазоворки, якунланган йилда "Тараққиёт кўзгуси” газетаси "Ўзбекистоннинг энг яхши ҳудудий газетаси” дея эътироф этилди. Шунингдек, "Тараққиёт кўзгуси”, "Менинг оилам” газеталари ва "amunews.uz” веб сайти Ўзбекистон Республикаси Олий Мажлиси ҳузуридаги ННТларни ва фуқаролик жамиятининг бошқа институтларини қўллаб-қувватлаш жамоат фонди таъсис этган грант танловларида қатнашиб, учта лойиҳамиз ҳам ғолиб чиқди ва йил мобайнида лойиҳа режалари тўлиқ амалга оширилди.

Қўлга киритилган улкан ютуқлардан бири – таҳририят қошида туманимиз ижодкорларини жипслаштирувчи, янги ижодий парвозларга рағбатлантирувчи "Жайхун илҳомлари” нодавлат нотижорат ташкилот тузилиб, фаолиятини бошлаб юборди.

Таҳририят ижодий жамоасининг янги 2016 йил учун режалаштираётган ишлари кўлами янада улкан.

Кириб келаётган янги йилни муҳтарам Юртбошимиз "Соғлом она ва бола” деб номладилар. Шу муносабат билан қабул қилинадиган давлат Дастури бизнинг зиммамизга ҳам улкан вазифаларни юклаши сўзсиз. Юртбошимизнинг Ўзбекистон Республикаси Конституцияси қабул қилинганининг 23 йиллигига бағишланган тантанали маросимда қилган маърузасидаги "Она ва бола соғлом бўлса, оила бахтли, оила бахтли бўлса, жамият мустаҳкам бўлади” деган ҳаётбахш ғоя ҳар бир юртдошимизнинг қалбига чуқур кириб бориши ана шу улуғ ишга муносиб ҳисса қўшиш барчамизнинг муқаддас вазифамизга айланиши лозим”, деган даъватига мамлакатимизнинг ҳеч бир фуқароси ҳам бефарқ қарамайди.

Азизлар! Янги йил остонасида туриб барчангизни кириб келаётган "Соғлом она ва бола” йили билан қизғин қутлаймиз. Ҳаётингизнинг ҳар бир куни эзгу амаллар, қувончли воқеаларга бой бўлсин, деймиз.

"Тараққиёт кўзгуси” газетаси

таҳририяти ижодий жамоаси.

(Фото - http://uza.uz/)