Yangi yilingiz qutlugʻ boʻlsin!

Assalomu alaykum, yurtimizning har bir osuda tongini ezgu niyatlar bilan qarshi olib, butun kuch-gʻayratini, salohiyatini shu aziz Vatanimiz ravnaqiga hissa qoʻshishga baxshida etayotgan aziz yurtdoshlar!

Mana, mamlakatimiz tarixida oʻziga xos iz qoldirgan 2015-yil ham poyoniga yetib bormoqda. Oʻtayotgan har bir daqiqa bizni yangi 2016-yilga yaqinlashtirmoqda. Bunday hayajonli lahzalarda odam yil mobaynida bosib oʻtgan iziga nazar tashlaydi, oʻz mehnatlari natijasini sarhisob qiladi, yangi yilda oʻzini yanada ezgu, ulkan ishlarga, xayrli amallarga chogʻlaydi.

Siz azizlar bilan gazetaning joriy yildagi oxirgi sonida gʻoyibona diydorlashish, oʻz mehnatimiz mahsuli – yangi sonni yorugʻ yuz bilan hukmingizga havola etar ekanmiz, oʻylaymizki, "Taraqqiyot koʻzgusi” va uning ilovasi "Mening oilam” gazetalari koʻnglingizga eng yaqin nashrlar boʻldi. Gazetalar sahifalaridan tumanimiz hayotiga oid xolis, tezkor va haqqoniy axborotlar olish bilan birga ijtimoiy muammolar haqida mushohada yuritilgan maqolalar, tumanimiz ijodkorlarining ijodidan namunalar bilan tanishib bordingiz.

Shunisi diqqatga sazovorki, yakunlangan yilda "Taraqqiyot koʻzgusi” gazetasi "Oʻzbekistonning eng yaxshi hududiy gazetasi” deya eʼtirof etildi. Shuningdek, "Taraqqiyot koʻzgusi”, "Mening oilam” gazetalari va "amunews.uz” veb sayti Oʻzbekiston Respublikasi Oliy Majlisi huzuridagi NNTlarni va fuqarolik jamiyatining boshqa institutlarini qoʻllab-quvvatlash jamoat fondi taʼsis etgan grant tanlovlarida qatnashib, uchta loyihamiz ham gʻolib chiqdi va yil mobaynida loyiha rejalari toʻliq amalga oshirildi.

Qoʻlga kiritilgan ulkan yutuqlardan biri – tahririyat qoshida tumanimiz ijodkorlarini jipslashtiruvchi, yangi ijodiy parvozlarga ragʻbatlantiruvchi "Jayxun ilhomlari” nodavlat notijorat tashkilot tuzilib, faoliyatini boshlab yubordi.

Tahririyat ijodiy jamoasining yangi 2016-yil uchun rejalashtirayotgan ishlari koʻlami yanada ulkan.

Kirib kelayotgan yangi yilni muhtaram Yurtboshimiz "Sogʻlom ona va bola” deb nomladilar. Shu munosabat bilan qabul qilinadigan davlat Dasturi bizning zimmamizga ham ulkan vazifalarni yuklashi soʻzsiz. Yurtboshimizning Oʻzbekiston Respublikasi Konstitutsiyasi qabul qilinganining 23-yilligiga bagʻishlangan tantanali marosimda qilgan maʼruzasidagi "Ona va bola sogʻlom boʻlsa, oila baxtli, oila baxtli boʻlsa, jamiyat mustahkam boʻladi” degan hayotbaxsh gʻoya har bir yurtdoshimizning qalbiga chuqur kirib borishi ana shu ulugʻ ishga munosib hissa qoʻshish barchamizning muqaddas vazifamizga aylanishi lozim”, degan daʼvatiga mamlakatimizning hech bir fuqarosi ham befarq qaramaydi.

Azizlar! Yangi yil ostonasida turib barchangizni kirib kelayotgan "Sogʻlom ona va bola” yili bilan qizgʻin qutlaymiz. Hayotingizning har bir kuni ezgu amallar, quvonchli voqealarga boy boʻlsin, deymiz.

"Taraqqiyot koʻzgusi” gazetasi

tahririyati ijodiy jamoasi.

(Foto - http://uza.uz/)