ЯНГИ ТЕХНИКАЛАР – ДЕҲҚОНГА ҚЎЛ-ҚАНОТ
Мамлакатимизда барча соҳалар қатори қишлоқ хўжалиги соҳасида ҳам ислоҳотлар жадал суръатлар билан олиб борилмоқда. Натижада Ўзбекистонда ғалла, полиз ва сабзавот каби озиқ-овқат маҳсулотлари, шунингдек пахта етиштириш кўлами ҳам сезиларли даражада ошди.
Аграр соҳада эришаётган ютуқларимизда авваламбор мамлакатимизда фермерликни ривожлантиришга алоҳида эътибор берилаётгани муҳим омил бўлмоқда.Тобора ривожланиб бораётган фермерлик ҳаракатини албатта биз юксак унум билан ишлайдиган техникаларсиз тасаввур қила олмаймиз. Шу боисдан ҳам мамлакатимизда фермер хўжаликларининг замонавий техникалар билан таъминланишига алоҳида эътибор берилмоқда.
Айниқса, Ўзбекистон Республикаси Вазирлар Маҳкамасининг 2013 йил 7 майдаги "Қишлоқ хўжалиги учун гусеницали тракторларни сотиб олиш чора-тадбирлари тўғрисида”ги 121-сонли қарори ижросини таъминлаш бўйича туманимизда ҳам кўпгина ишлар амалга оширилди.
2002 йилдан кейинги давр мобайнида туманимизга бир қанча юқори унум билан ишлайдиган қишлоқ хўжалиги техникалари – 13 та Орион-630, 8 та МХ-140, 8 та МХ-135 ва 6 дона ТС60/70, занжирли сурим тракторларидан 71 та ВТ-150Д, 32 та YTO, 450 та ТТЗ-80-11 русумли чопиқ ва 42 дона юк ташиш тракторлари келтирилиб, фермер хўжаликларига лизинг асосида берилди.
Шунингдек, ўтган йил давомида туманимизга 20 та ТТЗ-100 НС, 3 та Т60-70 Орион тракторлари ва 3 та Доминатор комбайни келтирилди.
Туманимизга юқори унум билан ишлайдиган бундай техника ва механизмларнинг келтирилишида масъулияти чекланган жамият шаклидаги "Давр машлизинг” қўшма корхонасининг ёрдами катта бўлди.
Биз туман давлат техника назорати инспекцияси инспектори Давронбек Бобожонов билан чет давлатлардан келтирилаётган техникалар бўйича суҳбатлашганимизда у қуйидагиларни гапирди:
- Туманимиз фермер хўжаликларига Хитой Халқ Республикасида ишлаб чиқарилган YTO русумли сурим тракторининг олиб келиниши ҳам йўлга қўйилди. Бу тракторда бульдозер қурилмасининг мавжудлиги, унинг ерларни ҳайдаш билан биргаликда челларни текислаш, дала четларини тўғрилаш каби ишларни амалга оширишда ҳам қулайлиги эътиборга лойиқ.
Экиш мавсумига тайёргарлик кўриш ва экиш даврида иштирок этадиган техникалар паркини такомиллаштиришда, қишлоқ хўжалиги соҳасини жаҳон талабларига жавоб берадиган замонавий занжирли ҳайдов тракторлари билан таъминлашда, фермер хўжаликлари техникаларига кўрсатиладиган сервис хизматларининг турлари ва сифатини яхшилашда масъулияти чекланган жамият шаклидаги "Давр машлизинг” қўшма корхонаси раҳбарлари катта ёрдам беришаяпти.
Хорижий давлатлардан олиб келинган тракторлар ҳайдовчиларининг малакасини ошириш мақсадида "Агротехсервис МТП” МЧЖда ҳар йили ўқишлар ташкил этилиб келинмоқда. Бу ўқув машғулотларида чет эл тракторлари мавжуд бўлган фермер хўжаликлари раҳбарлари ва трактор операторларига чет элда ишлаб чиқарилган техникаларга сервис хизмати кўрсатиш ва таъмирлаш, техника воситаларидан фойдаланиш самарадорлигини ошириш, тракторларни қишлоқ хўжалиги ишларини бажаришга тайёрлаш, тракторга қишлоқ хўжалик агрегатларини ўрнатиш қоидалари ва техник талаблари, бошқарув тизимлари ва уларни ишлатиш, ўлчов-назорат асбоблари билан танишиш, улардаги маълумотларни таҳлил қилиш бўйича тушунчалар берилади.
"Давр машлизинг” қўшма корхонаси мутахассислари туманимизга тез-тез келишиб, чет эл тракторларининг ишлашини кўздан кечирадилар, айрим масалалар юзасидан тушунчалар берадилар. Шу билан биргаликда ушбу корхона раҳбарлари бизга зарур бўлган тракторлар эҳтиёт қисмларини олишимизга ҳам катта ёрдам беришаяпти.
Дарҳақиқат, мутахассис айтганидек, туманимиз қишлоқ хўжалигини механизациялаш, мавжуд техника ва механизмлардан фойдаланиш самарадорлигини ошириш йўлидаги бундай ҳаракатлар туманимизда қишлоқ хўжалиги экинларидан олинадиган ҳосилдорликни янада оширишга омил бўлиши шубҳасиз.
Техника – деҳқоннинг қўл-қаноти. Шу боисдан ҳам туманимиз қишлоқ меҳнаткашлари замонавий техникалардан унумли фойдаланган ҳолда қишлоқ хўжалиги маҳсулотлари етиштиришни янада кўпайтириш йўлида астойдил ҳаракат қилмоқдалар.
Алламберган ЖУМАНИЁЗОВ,
"Тараққиёт кўзгуси” газетаси мухбири.
Суратда: "Чўтбой
бобо” фермер хўжалиги раиси Олимбой Сафарбоев ҳам YTO русумли трактордан
иш жараёнида самарали фойдаланмоқда.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
